Read gitonga Machitidu gha Ŵakutumika 4 Bible Online

Machitidu gha Ŵakutumika 4 - gitonga bible

Machitidu gha Ŵakutumika 4

¹Ndipo ŵachirongoro iwo ndi khamu lo, ŵanguziya paku wo ŵazukuru ndi nduna ya kasopi ndi ŵaSaduki,

²ŵakutundiya chifukwa kuti ŵasambizganga khamu, ndi ŵatauliyanga mwaku Yesu chiyuka cho chaku ŵakufwa.

³Ndipo ŵanguŵako, ŵanguŵaŵika mu ulinda mpaka mlenji, chifukwa sono kwenga mazulo.

⁴Kweni ŵanandi ŵaku wo ŵangughavwa mazu ŵanguvwana; ndipo unandi wa ŵanthurumi ungufika akhumba vikwi vinkhonde (5,000).

⁵Ndipo kunguŵa ndi mlenji, kuti ŵarongozgi ŵawo ndi ŵara ndi ŵalembi[7] aŵa nguwungana pamoza mu Yerusalemu;

⁶ndipo wanguŵapo Anase, mzukuru mura yo, ndi Kayafa, ndi Yohane, ndi Alekezandara, ndi wose wo ŵenga ŵamu mbumba ya mzukuru mura,

⁷ndipo ŵati ŵaŵamika mukati mo, ŵafumbanga, “Mu nthazi uli, pamwenga zina uli, mwachitiya chenichi?”

⁸Sono Petro wakuzazika ndi Mzimu Wakupaturika, wanguti kwaku wo, “Mwaŵarongozgi ŵa khamu, ndi mwaŵara ŵaku Yisraele,

⁹asani le titeruzgikiya ifwe panchitu yamampha yapa munthu waunthomboru kuti, ndi mu nthazi uli munthu uyu wataskikiya,

¹⁰kuziŵikwe kwaku mose, ndi ku khamu lose laku Yisraele, kuti mu zina laku Yesu Kristu waku Nazarete, mweniyo imwe mungupayika, Mweniyo Chiuta wanguyuska ku ŵakufwa, mwaku iyo munthu uyu watuma paurongo pinu wakuchizgika.

¹¹Mweniyo ndi mwa wo unguyeyeka ndi imwe mwa ŵazengi-nyumba, wo waŵa mutu wa nyondu.

¹²Ndipo kuti mwe utaski mu munyake cha, chifukwa chingana nkhuti kwe zina lamwenga cha pasi pa kuchanya, lakupaskika mu ŵanthu, mwaku lenilo tingataskikiya.”

¹³Ndipo pakuwona chiganga chaku Petro ndi Yohane, ndi pakuthoŵa kuti ŵenga ŵanthu ŵambura kusambira ndi ŵaŵaka, ŵazizwanga ndipo ŵaŵateskanga kuti ŵaŵanga pamoza ndi Yesu.

¹⁴Ndipo pakuthoŵa munthu wakuma pamoza nawo wakuchizgika, ŵengavi kanthu kakususkapo.

¹⁵Kweni ŵati ŵaŵalanguliya kuturiya kubwaro kwa upu wo, ŵangufumbana,

¹⁶ŵakuti, “Tichitengenji kwaku wo ŵanthu? Chifukwa kuti chisimikizgu chakuziŵikwa cho chachitikiya mwaku iwo chawoneka kwaku wose ŵakuja mu Yerusalemu; ndipo kuti tiziŵa kuchikana cha.

¹⁷Kweni alinga kuti chingawandiya kwakuruska mu khamu lo cha, tiŵachenjezgenge kurongoro so cha mu zina lenili, chingana nkhu munthu yumoza.”

¹⁸Ndipo ŵati ŵaŵadana, ŵanguŵalanguliya chingana nkhukamba chingana nkhusambizga mu zina laku Yesu kosekose cha.

¹⁹Kweni Petro ndi Yohane, pakuŵamuka, ŵanguti, “Asani nkhwakurunjika paurongo paku Chiuta kuvwiya imwe kwakuruska Chiuta, yeruzgani;

²⁰chifukwa ifwe kuti tiziŵa cha kureka kurongoro vyenivyo tawona ndi tavwa.”

²¹Ndipo ŵati ŵaŵachenjezga so, ŵanguŵafwatuwa, kwambura kubowozga mo ŵangaŵalanguliya, chifukwa cha khamu lo; pakuti wose ŵakankhuskanga Chiuta paku cho chinguŵapo.

²²Chifukwa munthu yo wenga navyo virimika kwakuruska machumi ghanayi, mweniyo changumuŵiya chisimikizgu chenichi cha mchizgu.

²³Ndipo ŵanguti ŵafwaturika ŵanguza ku ŵanasi ŵawo ndipo ŵangukonkhoma vyo vyose ŵazukuru ŵara ndi ŵara ŵanguŵanene,

²⁴ndipo ŵachivwa iwo, ndi mtima umoza ŵangusamphuskiya mazu kwaku Chiuta, ndipo ŵanguti, “Ambuya, ndimwe mwata kuchanya ndi panupasi ndi nyanja ndi vyose vya mwawo,

²⁵mwaŵakukambiya ndi Mzimu Wakupaturika mu mlomo wa auskefwe, mteŵeti winu Davidi. ‘Chifukwa chine yingukalipa Mitundu, ndi makhamu ghangurunguruka vyaŵaka?

²⁶Ŵangujindandaliska ŵakaronga ŵa charu, ndipo nduna zo zinguwungana pamoza, pa Ambuya ndi pa Wakupakika wawo.’

²⁷“Chifukwa mu msumba uno ŵanguwungirana pa Muŵanda winu Wakupaturika Yesu, yo mungupatuwa, Herode ndi so Pontio Pilato, pamoza ndi Mitundu ndi makhamu ghaku Yisraele,

²⁸kwachichitiya vyo vyose janja linu ndi khumbu linu linguteme limu kuŵapo.

²⁹Ndipo sono, Ambuya, lereskanipo pa mafingu ghawo: ndi paskani ku ŵateŵeti ŵinu kurongoro ndi chiganga chose mazu ghinu,

³⁰muchitambasuwa janja linu kwachichizga; ndi kuti visimikizgu ndi vyaminthondwi vichitikiye mu zina la Muŵanda winu Wakupaturika, Yesu.”

³¹Ndipo ŵati ŵaromba, ghanguyaghayika malo mwenimo ŵanguwungana ndipo ŵanguzazika wose ndi Mzimu Wakupaturika, ndipo ŵarongoronga mazu ghaku Chiuta ndi chiganga.

³²Ndipo wenga umoza mtima ndi mzimu wa urapasi waku wo ŵanguvwana, ndipo pengavi so yumoza yo wakambanga kuti kanthu kaku vyo wenga navyo, kenga kaku yija; kweni vyawo vyose vyenga vyamasanga.

³³Ndipo ndi nthazi yikuru ŵakutumika ŵapaskanga ukaboni wa chiyuka cho cha Ambuya Yesu, ndipo wezi ukuru wenga paku wo wose.

³⁴Chifukwa kwengavi so mwaku wo yumoza msauchi: chifukwa wose ŵeneko ŵa vyaru pantwenga zinyumba ŵangusaska, ndi ŵangutole mitengu ya misasku yo,

³⁵ndipo ŵaŵikanga pa marundi gha ŵakutumika: ndipo ŵagaŵiyanga kwaku yose uli ndimo munthu yose wakavukiyanga.

³⁶Ndipo Yosefe, wakutamulika ndi ŵakutumika Barnaba (lenilo ling'anamuwa kuti, Mwana wa masangu), mlevi, Mkupro pa kawi pakuŵa ndi munda,

³⁷wanguwusaska, ndi wanguto ndrama, ndipo wanguziŵika pa marundi gha ŵakutumika.