Read gitonga Machitidu gha Ŵakutumika 8 Bible Online

Machitidu gha Ŵakutumika 8 - gitonga bible

Machitidu gha Ŵakutumika 8

¹Ndipo Saulo wazomerezgananga nawo mu kubayika kwake. Ndipo mu zuŵa lo chinguŵapo chiŵembu chikuru pa mpingu wamu Yerusalemu; ndipo ŵangumwaranikiya wose mu vyaru vya Yuda ndi Samaria, kweni ŵakutumika wo pe cha.

²Ndipo ŵanthurumi ŵakopa Chiuta ŵangumuŵika Stefano, ndipo paku iyo ŵanguchitiya chitenje chikuru.

³Kweni Saulo wapopeskanga mpingu wo, pakuporota mu nyumba ndi nyumba, ndi pakuguguza ŵanthurumi ndi ŵanthukazi waŵaperekanga ku ulinda.

⁴Viyo ŵakumwaranika wo ŵangurutiriya, ŵakugozga mazu gho.

⁵Ndipo Filipu wangusikiya ku msumba wa Samaria ndi waŵamemeziyanga Kristu.

⁶Ndipo mizinda yo ndi mtima umoza yategherezganga vyo vyakambikanga ndi Filipu, pakuvwa ndi kuwona visimikizgu vyo wachitanga.

⁷Pakuti mizimu yawiyu, yakukambura ndi liu likuru, yingutuwa mu ŵanandi ŵakuŵa nayo: ndipo ŵanandi ŵavinjenje ndi ŵakupunduka ŵanguchizgika.

⁸Ndipo mwenga chimwemwe chikuru mu msumba muwa.

⁹Kweni munthu yumoza, zina lake Simoni mweniyo kale wenga wamayera mu msumba wo, ndipo watondweskanga khamu la Samaria, pakukamba kuti iyo wenga mura wakufikapo:

¹⁰mweniyo ŵanguphwere wose, ŵamana ndi ŵara, ŵakuti, “Mweniyo ndiyo chanthazi chaku Chiuta, chakutamulika Chikuru.”

¹¹Ndipo ŵangumphwere iyo, chifukwa nyengo yitali waŵatondweskanga ndi mayera ghake.

¹²Kweni penipo ŵanguvwaniya kwaku Filipu, wachigozga ufumu waku Chiuta ndi zina laku Yesu Kristu, ŵabatizikanga ŵanthurumi ndi so ŵanthukazi.

¹³Ndipo Simoni nayo wanguvwana: ndipo wachipatizika, wajaririyanga ndi Filipu; ndipo pakuthoŵa visimikizgu ndi so vyanthazi vikuru vyo vyachitikanga, wangutondwa.

¹⁴Ndipo ŵachivwa ŵakutumika mu Yerusalemu kuti Samaria waronde mazu ghaku Chiuta, ŵangutuma kwaku wo Petro ndi Yohane,

¹⁵ŵeniwo ŵati ŵasikiyako, ŵanguŵarombe, kuti waronde Mzimu Wakupaturika;

¹⁶chifukwa wengavi kuwa pa yumoza waku wo pakudanga: kweni ŵangubatizika mu zina la Ambuya Yesu.

¹⁷Sono ŵanguŵika manja paku wo ndipo ŵanguronde Mzimu Wakupaturika.

¹⁸Kweni wachiwona Simoni kuti mu chiŵika cha manja gha ŵakutumika Mzimu Wakupaturika wapaskikanga, wanguŵatole ndrama,

¹⁹wakuti, “Paskani ine nane mtufu wenuwu, alinga kuti paku yo ndingaŵika manja ine, wangaronde Mzimu Wakupaturika.”

²⁰Kweni Petro wangunena nayo, “Siliva wako wayowe nawe pamoza, pakuti warunguruka kwanduliya ndi ndrama mpasku wo waku Chiuta!

²¹Kuti we nacho iwe cha chigaŵa pamwenga mphenduzga mu mazu yagha: chifukwa mtima wako ulive kurunjika paurongo paku Chiuta.

²²Viyo nyongokako ku uheni wako uwu, ndi uŵeyere Chiuta, alinga kuti vinu lingagowokereka khumbiro lo la mtima wako.

²³Chifukwa ndiwona wemu nduru yakurunda ndi mu chimangiru cha chambura urunji.”

²⁴Ndipo wangwamuka Simoni, wanguti, “Muŵeyere imwe ku Ambuya pa chifukwa changu, viyo kuti kangandiziya cha kamoza kaku vyo mwakamba.”

²⁵Viyo iwo ŵati ŵasimikizga ndi kukamba mazu gha Ambuya ŵanguwere ku Yerusalemu, ŵakutaula evangeli mu mizi yinandi ya ŵaSamaria.

²⁶Kweni mungelo wa Ambuya wangumunene Filipu, kuti “Soka, ndi ruta ku maraŵi pa nthowa yo yisika kutuwa ku Yerusalemu mpaka ku Gaza,” yo nja bozwa.

²⁷Ndipo wangusoka ndi wanguruta: ndipo, onani, munthurumi waku Etiopia, wamthenu wamazaza waku Kandake, karongakazi wa ŵaEtiopia, yo wenga mlereze pa mbiku yake yose,

²⁸yo wanguza kuzachisopa mu Yerusalemu; ndipo wawenga, ndipo pakuja mu gareta lake waŵerenganga mchimi Yesaya.

²⁹Ndipo Mzimu wangumunene Filipu, “Uŵandike ndiumeremete ku gareta lenili.”

³⁰Ndipo pakuchimbiriyako Filipu, wangumuvwa wachiŵerenga Yesaya mchimi yo; ndipo wanguti, “Kumbi muteska, na ghenigho muŵerenga?”

³¹Ndipo wali, “Ndingaziŵa uli, kwambura kuti yumoza wandirongozga?” Ndipo wangumuŵeyere Filipu, wakweremo kwachija nayo pamoza.

³²Kweni fundu ya lembo yeniyo waŵerenganga yenga yeniyi, “Nge ndi mberere wangugumizgikiya ku chibayika; ndipo uli ndimo mwana-mberere paurongo pa msengi wake walive liu. Viyo ndimo kuti wajuriya mlomo wake cha.

³³Mu kajiyuyulidu kake cheruzgu chake chingukanizgika. Ndipo mgonezi wake wakonkhoskenge njani? Pakuti umoyo wake ukwamphulika ku charu.”

³⁴Ndipo wamthenu yo wangwamuka, ndi wangumunene Filipu, “Ndikufumbeni, mchimi wakamba ichi paku yani? Paku yija, pamwenga pa munthu munyake?”

³⁵Ndipo Filipu, pakujura mlomo wake ndi pakwambako ku lembo lo, wangumtauliya Yesu.

³⁶Ndipo ŵachiruta mu nthowa yo, ŵanguza pa maji ghakuti; ndipo wamthenu yo wanguti, “Awonani, maji! Chitindikanizga chine kubatizika?” [

³⁷Filipu wangumunene, “Ungabatizika, asani ugomezga ndi mtima wako wose.” Wangwamuka wanguti, “Ndigomezga kuti Yesu Kristu ndi Mwana waku Chiuta.”]

³⁸Ndipo wangulangula kuti lime jo gareta lo: ndipo ŵangusikiyamo mu maji wose ŵaŵi, Filipu iyo ndi so wamthenu yo; ndipo wangumbatiza.

³⁹Kweni penipo ŵangukwera kutuwamo mu maji gho, Mzimu wa Mbuya wangumkwamphuwa Filipu; ndipo wamthenu yo wengavi kumwona so cha, kweni iyo warutanga nthowa yake wakukondwere.

⁴⁰Kweni Filipu wangusanirika mu Azotu; ndipo pakuporotamu wagozgeyanga evangeli ku mizi yose mpaka wanguziya ku Kaisarea.