Read gitonga Machitidu gha Ŵakutumika 9 Bible Online

Machitidu gha Ŵakutumika 9 - gitonga bible

Machitidu gha Ŵakutumika 9

¹Kweni Saulo wenga weche kututiya pa ŵasambizi ŵa ambuya fingu ndi mbanda; ndipo wanguruta ku mzukuru mura yo,

²ndi kupempha kwaku iyo ŵakalata ku masinagoge ku Damasko, viyo kuti, asani wangasaniya ŵanyake, ŵanthurumi ndi so ŵanthukazi, ŵakuŵa ŵa Nthowa yo,[9] wangaŵagumizgiya ku Yerusalemu ŵakumangika.

³Ndipo ŵachiruta, kunguŵa kuti waŵandikanga ku Damasko: ndipo kwamabuchibuchi kungumumwetukiya zingirizge kungweruka kutuwa kuchanya.

⁴Ndipo wati wawa pasi wanguvwa liu lakukamba nayo, “Saulo, Saulo, chifukwa chine utindiŵemba ine?”

⁵Saulo wanguti, “Mwe ayani, Ambuya?” Ndipo iyo wali, “Ine ndine Yesu mweniyo uŵemba iwe;

⁶kweni soka, ndi sere mu msumba wo, ndipo kwamkambika kwako chenicho utenere kuchita.”

⁷Kweni ŵanthurumi wo ŵangurongozgana nayo ŵanguma ŵaka chisisi, pakulivwa liu lo, kweni ŵakuwona yumoza cha.

⁸Ndipo Sauli wangusoka pasi; ndipo po maso ghake ghangujulika, wengavi kuwona kanthu; viyo ŵangumrongozga ndi janja ndi ŵanguza nayo ku Damasko.

⁹Kweni ŵangumrongozga ndi wambura kulereska mazuŵa ghatatu, ndipo kuti wangurghachingana nkhumwa cha.

¹⁰Ndipo kwenga msambizi yumoza mu Damasko, ndi zina lake Hananiya, ndipo mu chiwona Ambuya ŵangumunene, “Hananiya!” Ndipo iyo wanguti, “Awonani, Ambuya, ndine.”

¹¹Ndipo Ambuya angumunene, “Sokanga, rutanga pa kamseu kakuzumbulika ‘Kakunyoroka,’ ndipo ufumbiriye ku nyumba yaku Yuda, pa yumoza, zina lake Saulo, waku Tarso: chifukwa awona, waromba,

¹²ndipo wawona munthurumi, zina lake Hananiya, wasere ndi waŵika pake manja ghake, alinga walereske.”

¹³Kweni Hananiya wangwamuka, “Ambuya, ndavwa ku ŵanandi vyapa munthu mwenuyu, vyose viheni vyo wachitiya ŵakupaturika ŵinu mu Yerusalemu;

¹⁴ndipo panu waronde ku ŵazukuru ŵara mtufu kwachimanga wose wo mbakudana pa zina linu.”

¹⁵Kweni Ambuya angumunene, “Rutanga, pakuti mweniyo nchiyaŵi chakusankhikiya ine, kwachipingiya zina langu pa Mitundu yo ndi so ŵakaronga, ndi ŵana ŵaku Yisraele;

¹⁶chifukwa nkhamurongonga vyo vyose kutenere iyo kukunthiyapo pa chifwa cha zina langu.”

¹⁷Ndipo wanguruta Hananiya, ndi wangusere mu nyumba yo; ndipo pakuŵikiya pake manja ghake, wanguti, “Saulo, mbali wangu, wandituma Mbuya Yesu, mweniyo wangukuwoneke mu nthowa yo wazangamo, alinga kuti ulereske, ndi kuti uzazike Mzimu Wakupaturika.”

¹⁸Ndipo sosonukweni ghangumbotokako ku maso ghake nge ndi mamba, ndipo wangulereska so; ndipo wangusoka, ndi wangubatizika:

¹⁹ndipo wati wargha zinguweremo nthazi. Ndipo Saulo wajanga pamoza ndi ŵasambizi ŵamu Damasko mazuŵa ghakuti.

²⁰Ndipo sosono mu masinagoge wangutaula Kristu, kuti, “Ndiyo Mwana waku Chiuta.”

²¹Ndipo wose ŵakumuvwa ŵazizwanga, ndipo ŵatinge, “Asi ndi mweniyo mu Yerusalemu wangwananga ŵakudaniya pa zina lenili? Ndipo kuno waziya chenichi alinga kuti waŵagumizgiye ŵakumangika ku ŵazukuru ŵara wo?”

²²Kweni ukongwako Saulo wakuliyanga mu nthazi, ndipo wavwanananga ndi ŵaYuda ŵakuja mu Damasko, pakupanikizga kuti mweniyo ndi Kristu.

²³Kweni penipo ghangufiskika mazuŵa ghanandi, ŵaYuda ŵangupangirana kumbaya: kweni fingu lawo linguziŵika kwaku Saulo.

²⁴Ndipo ŵamukhazganga nanga mpha malikomo, msana ndi usiku, kuti ŵambaye;

²⁵kweni ŵasambizi ŵake ŵangumto ndi usiku, ndipo ŵangumsiska mu chitete, porotu mu linga.

²⁶Ndipo wati wafika ku Yerusalemu, wesanga kumeremete ku ŵasambizi wo; ndipo wose ŵamopanga, pakureka kuvwana kuti wenga msambizi.

²⁷Kweni Barnaba wangumto, ndipo wangumrongozge ku ŵakutumika, ndipo wanguŵatauliya mo mu nthowa wanguwone Ambuya, ndi kuti ŵangukamba nayo, ndi mo mu Damasko wangutauliya kwachiganga mu zina laku Yesu.

²⁸Ndipo wanguŵa pamoza nawo pakusere ndi pakutuwa mu Yerusalemu,

²⁹wakusambizga kwachiganga mu zina lo la Ambuya: ndipo so warongoronga ndi wasuskananga ndi ŵaHeleniste; kweni iwo ŵalembenga kumbaya.

³⁰Kweni ŵabali, ŵachiziŵa, ŵangumsiskiya ku Kaisarea, ndipo ŵangumtuma ku Tarso.

³¹Viyo mu Yuda mose ndi mu Galile ndi mu Samaria mpingu waŵanga ndi chimangu, ndipo unguzengeka; wakwenda mu chopu cha Ambuya ndi mu unkhoswi wa Mzimu Wakupaturika ungwandana.

³²Ndipo kunguŵa, po Petro waporotanga mu malo ghose, kuti wangusikiya ku ŵakupaturika nawo wo ŵajanga mu Luda.

³³Ndipo wangusaniya kweniko munthu yumoza, zina lake Eneya, yo waranga pa chita virimika vinkhonde ndi vitatu; pakuti wenga wavinjenje.

³⁴Ndipo Petro wangunena nayo, “Eneya, Yesu Kristu wakuchizga; yuka, ndi tanduwa chita chako.”

³⁵Ndipo sosonukweni wanguyuka. Ndipo wose ŵakuja mu Luda ndi Sharone ŵanguwona, ŵeniwo ŵangung'anamukiya ku Ambuya.

³⁶Ndipo mu Yopa mwenga msambizikazi yumoza, zina lake Tabita lo ling'anamuwa kuti Dorka: mweniyo munthukazi wenga wakuzara milimu yamampha ndi vyalisungu vyo wachitanga.

³⁷Ndipo kunguŵa kuti mu mazuŵa yagha wangutama, ndi wangufwa: ndipo ŵati ŵamusambika ŵangumuŵika mu chipinda chamuchanya.

³⁸Ndipo pakuŵa Luda kufupi ku Yopa, ŵasambizi, ŵati ŵavwa kuti Petro wenga kweniko, ŵangutuma ŵanthurumi ŵaŵi, ŵakumuŵeyere, “Ungaziulika cha kufika kwidu.”

³⁹Ndipo wangusoka Petro, ndi wanguruta pamoza nawo. Ndipo wachifika iyo ŵangumkwezga ku chipinda cha muchanya cho: ndipo vingumapo pakumzunguliya vyoko vyose, vyakutenje, ndi vyakurongo maraya ndi minjirira yo yose wasonanga Dorka, weche nawo pamoza.

⁴⁰Kweni Petro, wati waŵatuzgiya wose kubwaro, wangugwada pasi, ndi wanguromba; ndipo pakung'anamukiya ku thupi lo, wanguti, “Tabita, yuka!” Ndipo iyo wangubanuwa maso ghake; ndipo wachiwona Petro, wanguja songa.

⁴¹Ndipo Petro pakumpaska janja lake, wangumsoska; ndipo wati wadana ŵakupaturika ndi vyoko vyo, wangumjarika paurongo pawo wamoyo.

⁴²Ndipo kunguziŵikwa mu Yopa yose: ndipo ŵanandi ŵanguvwaniya mu Ambuya.

⁴³Ndipo kunguŵa kuti wangutandara iyo mazuŵa ghanandi mu Yopa kwaku yumoza, Simoni, mfufuta.[10]