Read gitonga ŴaRoma 1 Bible Online

ŴaRoma 1 - gitonga bible

ŴaRoma 1

¹Kalata wakutuwa kwaku Paulo, mteŵeti waku Yesu Kristu, wakutumika wakusankhika ndi wakudanika ndi Chiuta kwachisambizga uthenga wamampha waku Chiuta:

²uthenga wo wangupangizga ŵamchimi ŵake kali mu malembo ghakupaturika;

³wapa Mwana wake, mweniyo kuchiri ku liŵavu wangupapika ku mbeu yaku Davidi,

⁴ndipo kuchiri ku Mzimu Wakupaturika, wangusimikizgika ndi nthazi kuŵa Mwana waku Chiuta ndi chiyuka cha ŵakufwa, Yesu Kristu Ambuyafwe;

⁵mwaku mweniyo tarondere wezi ndi utumiki waku mvwiyu wa chivwanu mu ŵaMitundu wose, pa chifukwa cha zina lake;

⁶mwaku weniwo imwe namwe mudanikiya kuŵa ŵaku Yesu Kristu.

⁷Viyo ndilemba kwaku wose ŵamu Roma, ŵakwanjiwa ŵaku Chiuta, wakudanika kuŵa ŵakupaturika. Wezi kwaku imwe, ndi chimangu, kutuliya kwaku Chiuta Auskefwe ndi Ambuya Yesu Kristu.

⁸Ndiwonge danga Chiuta wangu mwaku Yesu Kristu pa chifwa chaku imwe mose, pakuti chivwanu chinu chiwanda mu charu chose.

⁹Chifukwa Chiuta ndi kaboni wangu, mweniyo ndimteŵete mu mzimu wangu mu evangeli wa Mwana wake, kuti kwambura kulekezga ndizumbuliya imwe mu marombo ghangu,

¹⁰ndawakuninizika nyengo zose kuti vinu sono viyo ndirongozgekenge mu khumbu laku Chiuta kuzachifika kwinu.

¹¹Chifukwa ndinweka kumwonani, alinga kuti ndikupaskeni chawezi chamzinu, alinga mukhozgeke;

¹²ndiku kuti pamoza namwe ndisangaruskike mwinu, tose ndi chivwanu chamu munyake chinu ndi so changu.

¹³Kweni kuti ndikhumba cha mureke kuziŵa, mwa ŵabali, kuti panandi ndingukhumba kuzako kwinu (ndipo mpaka sono ndamikika), alinga kuti ndiŵe nacho chipasi mwaku imwe namwe, uli ndi mu ŵaMitundu ŵanyake.

¹⁴Nde wamateu ku ŵaGriki ndi so ku ŵaHeriberi, ku ŵazeru ndi so ku ŵazereza.

¹⁵Viyo ndinweka ine kugozga evangeli kwaku imwe namwe mwa ŵamu Roma.

¹⁶Chifukwa kuti ndikanyara ndi evangeli wo cha: chifukwa ndi nthazi yaku Chiuta, yakutaskiya yose yo ngwakuvwana; kuti muYuda danga, ndi so ku muGriki.

¹⁷Chifukwa mwenimo uvumbulikiya urunji waku Chiuta, wakutuliya ku chivwanu ndi wakuyiya ku chivwanu: ndimo kwalembeke, “Murunji iyo wajariyenge wamoyo ndi chivwanu.”

¹⁸Chifukwa kandundu kaku Chiuta kavumbulika kutuwa kuchanya paku wose ŵanthu ŵambura kuziŵa Chiuta, ndi ŵalakwi; ŵeniwo ŵamika uneneska ndi ulakwi wawo;

¹⁹chifukwa kuti chakuziŵikwa chaku Chiuta nchakuwoneka mwaku wo; pakuti Chiuta wachirongo kwaku wo.

²⁰Chifukwa kutuwa ku ulengi wa charu vyambura kuwoneka vyake, ndivyu nthazi yake yamuyaya ndi so uChiuta wake, viwoneke limu, pakuteskeka mu machitidu ghake, viyo yaŵa ŵanthu mbambura mphandira.

²¹Chifukwa pakumziŵa Chiuta ŵengavi kumkankhuska uli ndi Chiuta, chingana nkhuti ŵangumwonga cha; kweni ŵangupusa mu maghana-ghanu ghawo ndi mtima wawo wauzereza ungufipiskika,

²²pakujitamula ŵazeru, ŵanguzerezeka,

²³ndipo ŵangusanduska unkhankhu waku Chiuta wambura kuwo ku ngoza wakulinganizgika ndi munthu yo wawo, ndi viyuni, ndi vya marundi ghanayi, ndi vyakukwaŵa.

²⁴Chifukwa chenichi Chiuta wanguŵapereka ku ukazuzi mu maulakalaka gha mitima yawo kuti ŵayuyuwe maliŵavu gha ŵeneko;

²⁵mwakuti iwo ŵangusinthiskana uneneska waku Chiuta ndi chautesi, ndipo ŵangusopa ndi ŵanguteŵete chakulengeka kwakuruska Mlengi yo, mweniyo ngwakutumbikika muyaya. Ameni.

²⁶Chifukwa chenichi Chiuta wanguŵapereka ku maulakalaka ghaunyakazi: chifukwa ŵanthukazi ŵawo ŵangusanduska kachitiro ka kawi kuŵa kambura kawi.

²⁷Kwakulingana so ŵanthurumi nawo, ŵangureka kachitiro kakawi ka ŵanthukazi, ndipo ŵanguzazika ndimakhumbo ghawo, ŵanthurumi ku ŵanthurumi ŵakuchitiyana chamwikhu, ndi ŵakujirondere mphotu ya ubudi wawo yeniyo yaŵenerenga.

²⁸Ndipo uli ndimo ŵangukaniya kuŵa ndi Chiuta mu mziŵiru wawo, Chiuta iyo wanguŵapereka ku chinjeru chauzereza kuchita vyamwikhu,

²⁹pakuzazika iwo ndi uwuraurunji wose, uheni, bina, nkhaza; pakuzara chiŵinu, mbanda, ndeu, fuzi, kapimidu kaheni; ŵamtokutoku,

³⁰ŵakusuza, ŵakutinkha Chiuta, ŵaphuzu, ŵajanu, ŵakhakatu, ŵakwata viheni, ŵakutafuliya ŵapapi ŵawu,

³¹ŵazereza, ŵakuswa mapanganu, ŵambura chanju cha kawi, ŵambura lisungu:

³²ŵeniwo, pakuziŵa cheruzgu chaku Chiuta, chakuti ŵakuchita vyaviyo mbakwenere nyifwa, kuti ŵavichita pe cha, kweni ŵazomerezgana so ndi ŵeniwo mbakuvichita.