Read gitonga ŴaRoma 13 Bible Online

ŴaRoma 13 - gitonga bible

ŴaRoma 13

¹Mzimu wose uthere ku mitufu yira: chifukwa kulive mtufu kwambura kuti we pasi paku Chiuta: ndipo mitufu yo yiripo, yatemeka ndi Chiuta.

²Viyonthu yo ngwakujimiskirana ndi mtufu wo, wamikana ndi chitema chaku Chiuta: ndipo ŵakumika nawo ŵamkujironde chisusa.

³Chifukwa ŵakuwusa wokuti mbakofya cha ku nchitu yamampha, kweni ku yiheni. Ndipo asani ukhumba kureka kopa mtufu wo, chitanga cho nchamampha, ndipo ukaŵanga ndi rumbu kwaku wo,

⁴pakuti ndi mteŵeti waku Chiuta ku umampha wako. Kweni asani uchita uheni, wopanga; chifukwa kuti wapinga ŵaka lipanga lo cha; chifukwa ndi mteŵeti waku Chiuta, wakutayiya kandundu paku yo wachita uheni.

⁵Viyo mujithereske, chifukwa cha kandundu ko pe cha, kweni so chifukwa cha njuŵi.

⁶Pakuti chifukwa chenichi nacho mulipa msonkhu; chifukwa mbamirizi ŵaku Chiuta ŵakuchita chenichi.

⁷Lipani kwaku wose vyakuŵenere: ku wamsonkhu, msonkhu wake; ku wamthulu, mthulu wake; ku wachofyu, chopu chake; ku waulemu, ulemu wake.

⁸Mungateuwako kanthu ku yumoza cha, kweni kwanjana pe ndiko: chifukwa wakwanja munyake wafiska dangu.

⁹Yagha ndigho marangu, “Ungareŵa, engabaya, ungaba, ungakhumbira,” ndipo asani kwe dangu linyake, likurulika mu mazu yagha ghakuti, “Wanjenge munyako uli ndi wamweni.”

¹⁰Kuti chanju chitataliya munyake kaheni cha; viyo chanju ndi mfisku wa dangu.

¹¹Ndipo so chenichi, pakuziŵa nyengo yino, kuti sonu ndi ora lakuti muyukeko ku tulu: chifukwa sono utaski we pafupiku kwaku ifwe kwakuruska penipo tinguvwaniya.

¹²Usiku wakapo, ndipo msana we kufupi: viyo tizizuwe nchitu za mdima,

¹³kweni tivware vidya vya ukweru. Tendenge kwakukongora nge ndi mu msana; mu vitimbeheka ndi mauloŵevu cha, mu maureŵi ndi mauyaya cha, mu ndeu ndi mu bina cha.

¹⁴Kweni vwarani Ambuya Yesu Kristu ndi mungaghanaghaniya ku vyaliŵavu cha, kwachifuska maulankhasi ghake.