Read gitonga ŴaRoma 14 Bible Online

ŴaRoma 14 - gitonga bible

ŴaRoma 14

¹Yo ngwakutomboroka mu chivwanu mrondiyeni, kweni kwachisuskana pa makayiku ghake cha.

²Uyu wavwana kuti warghe vyose: kweni mtomboroka iyo waturgha tusungwi pe.

³Yo waturgha wangamyeya cha yo wareka kurgha; ndipo yo wareka kurgha wangamsuska cha yo waturgha; chifukwa Chiuta wamronde.

⁴Ndiwe yani iwe uteruzga mteŵeti waŵeni? Ku mbuyake waku yija watuma pamwenga watuwa pasi. Ndipo wakamiskikanga pakuti Ambuya mbanthazi kumumiska.

⁵Yumoza warumba zuŵa limoza kuruska ku zuŵa linyake; kweni munyake wateruzga zuŵalo lose kwakulingana-lingana. Munthu yose wakopeke limu mu chinjeru cha pa mtima wake.

⁶Yo waphwere zuŵa, ku Mbuya waliphwerere: ndipo yo waturgha, ku Mbuya waturghiya, pakuti wamuwonga Chiuta; ndipo wakureka kurgha, ku Ambuya walive kurghiya, ndipo wamwonga Chiuta.

⁷Chifukwa kuti yumoza waku ifwe wajijariya wamoyo cha, ndipo kuti yumoza wajifwiya cha.

⁸Chifukwa asani te ŵamoyo, tijariya ŵamoyo ku Mbuya, ndipo so asani titufwa, tifwiya ku Mbuya: viyo kosekose chingana te wamoyo, chingana titufwa, te ŵa Mbuya.

⁹Chifukwa kwaku chenichi Kristu wangufwiya, ndi wajariya so wamoyo, alinga kuti waŵe Mbuya wa ŵakufwa ndi so wa ŵamoyo.

¹⁰Kweni iwe, utumweruzgiyanji mbali wako? Pamwenga nawe so, utumyeyiyanji mbali wako? Chifukwa tose tamkuma paurongo pa chitengo chakweruzgiyapo chaku Chiuta.

¹¹Chifukwa kwalembeka, “Po ndiriri wamoyo ine, watiti Mbuya, ligwadiyenge ine gongonu lose, ndi lilime lose lizomerezgenge Chiuta.”

¹²Viyo na, munthu ndi munthu waku ifwe wajikambiyenge kwaku Chiuta mazu ghapa mtima waku yija.

¹³Viyo tingeruzgananga so cha: ukongwaku yeruzgani chenichi, kumuŵikiyapo mbali chakumguŵiska pamwenga chakumuwiska cha.

¹⁴Ndiziŵa, ndipo ndawojeka mu Mbuya Yesu, kuti palive kanthu ko nkhamwikhu mwaku kija; kweni kwaku yo wapima kuti nkhamwikhu, kwaku iyo nkhamwikhu.

¹⁵Asani pa chifukwa cha kurgha kwako mbali wako wakwininiskika, kuti utenda so cha mu chanju. Ungamunanganga yo cha ndi kurgha kwake mpha chifukwa chaku mweniyo wangufwiya Kristu.

¹⁶Viyo ungatukika cha umampha winu.

¹⁷Chifukwa ufumu waku Chiuta kuti mbunkharghi ndi unkhamwi cha, kweni urunji ndi chimangu ndi chimwemwe mu Mzimu Wakupaturika.

¹⁸Chifukwa yo wateŵete Kristu mwaku vyenivyo, ngwakukondweska Chiuta, ndi ngwakurumbika ndi ŵanthu.

¹⁹Viyo tivirondonge vya chimangu, ndi vyo vyakuzengana:

²⁰ungabwangandu wanchitu yaku Chiuta chifukwa cha kurgha cha. Nadi vinthu vyose vyakuphotoka; kweni kurgha nkhuheni mwaku yo munthu waturgha ndi chiguŵisku.

²¹Nkhwamampha kurgha nyama cha, chingana nkhuchita kanthu kose kwaku ko mbali wako waguŵa.

²²Chivwanu cho we nacho iwe, uŵiye nacho kwaku wamweni pa maso paku Chiuta. Ngwamwaŵi mweniyo walive kujeruzga yija mwaku chenicho wazomerezga.

²³Kweni yo wakayika, wasuskika asani waturgha, pakuti wareka kurghiya kwamuchivwanu; ndipo chose cho chirive kutuwa mu chivwanu nkhulakwa.