Read gitonga ŴaRoma 15 Bible Online

ŴaRoma 15 - gitonga bible

ŴaRoma 15

¹Kweni ifwe taŵanthazi titenere kupinga maunthomboru gha ŵamburanthazi, ndi kujikondweska taŵeni cha.

²Yose, yumoza ndi yumoza waku ifwe, wakondweske mwanasi wake pakumchitiya umampha, kwachimzenga.

³Chifukwa Kristu nayo kuti wangujikondweska cha; kweni, mo kwalembeke, “Matozu gha ŵakutoza iwe ghanguwiya paku ine.”

⁴Pakuti vyo vyose vingulembeke limu, vingulembeke kusambizgika kwidu, alinga kuti mu unkhunthiya ndi mu uchiska wa malembo tiŵe ndi chigomekezgu.

⁵Ndipo Chiuta yo wa unkhunthiya ndi wa chisangarusku wakupaskeni chipimiranu chakulingana, uli ndi chikozgu chaku Kristu Yesu,

⁶alinga kuti ndi mtima umoza mukankhuskiye ndi mlomo umoza Chiuta ndi Auskeu ŵa Ambuyafwe Yesu Kristu.

⁷Viyo muronderani, uli ndimo Kristu nayo wangurondere imwe, ku unkhankhu waku Chiuta.

⁸Chifukwa ndititi, Kristu wachitika mteŵeti wa mchinju chifukwa cha uneneska waku Chiuta, kuti wakhozge mapanganu ghakupaskika ku ŵambuyafwe,

⁹ndi kuti Mitunduyo yikankhuski Chiuta chifukwa cha lisungu lake, uli ndimo kwalembeke, “Chifukwa chenichi ndimzomerezgeninga mu ŵaMitundu, ndipo mu zina linu ndimbiyenge.”

¹⁰Ndipo so watiti, “Kondwereni, mwa ŵaMitundu, pamoza ndi khamu lake.”

¹¹Ndipo so, “Mrumbeni Mbuya, mose mwa Mitundu imwe; ndipo makhamu ghose ghamthamikenge.”

¹²Ndipo so Yesaya watiti, “Kuŵengepo nkhorozu yaku Jese, ndiyo wayukiyenge kwachiusa Mitundu; mwaku iyo yigomekezgiyenge Mitundu.”

¹³Ndipo Chiuta yo wa chigomekezgu wakuzazeni ndi chimwemwe chose ndi chimangu mu kuvwana, kuti musambasenge mu chigomekezgu, mu nthazi ya Mzimu Wakupaturika.

¹⁴Kweni ine ndamweni ndakhorwa mwaku imwe, mwa ŵabali ŵangu, kuti imwe namwe muzara umampha, pakutizika mziŵiru wose; ŵanthazi so kuchiskana.

¹⁵Kweni ndakulembiyani kwaulera, kurwandi nge nkhumkumbuskani, chifukwa cha wezi wakupaskikiya ine ndi Chiuta,

¹⁶kuti ndiŵe ine mumirizi waku Kristu Yesu ku ŵaMitundu, wakuteŵete evangeli waku Chiuta, viyo kuti ŵaMitundu nawo ŵaŵenge mpasku wamarondeka, pakupaturiskikiya ndi Mzimu ŵakupaturika.

¹⁷Viyo ndendi chitumbwa mwaku Kristu Yesu pa vyakuchiri kwaku Chiuta.

¹⁸Chifukwa kuti ndamgangiya kurongoro kanthu cha, kweni kaku vyo Kristu wangutataliya mwaku ine, kuti ŵamuvwiye ŵaMitundu mu mazu ndi milimu,

¹⁹mu nthazi ya visimikizgu ndi minthondwi, mu nthazi ya Mzimu Wakupaturika; viyo kuti, kutuwa ku Yerusalemu, ndi kwakuzunguliya mpaka ku Iluriko, ndafiska kumemeza evangeli waku Kristu,

²⁰kweni pakukweŵeke kutaula evangeli ko Kristu wengavi kutamulika kali, alinga kuti ndingazenga pa chiŵanja cha munyake cha;

²¹kweni, uli ndimo kwalembeke, “Ŵamwona iwo, kwaku ŵeniwo ghengavi kutaulikiya makani gha paku iyo, ndipo wo ŵalive kuvwapo, ŵawengemo.”

²²Chifukwa chenichi nacho ndamikika panandi kuza kwinu.

²³Kweni sono, pakuŵavi so malo mu mitundu yeniyi, ndipo pakuŵa ndi linweka virimika vinandi lakuziya kwinu,

²⁴penipo ndirutenge ku Spanya, ndigomekezga kumwonani ndichidumuwako, ndi kuperekezgeka kweniko ndi imwe, asani ndadanga ndasangaruka kuseŵe namwe kanyengo.

²⁵Kweni sono ndiruta ku Yerusalemu kuŵateŵete wakupaturika.

²⁶Chifukwa Makedonia ndi Akhaia ŵakondwere kwachichitiya mpasku wamasanga ku ŵakavu ŵamu ŵakupaturika wo ŵamu Yerusalemu.

²⁷Viyo ŵangukondwa kuchita ichi; ndipo mbamateu kwaku wo; chifukwa asani ŵaMitundu ŵasanganapo vyamzimu vyawo mbamateu kuŵateŵete mu vyaliŵavu navyo.

²⁸Viyo ndati ndafiska chenichi, ndi kuŵakhozge chipasi chenichi, ndidumuwengemu mwinu, ndichiya ku Spanya.

²⁹Ndipo ndiziŵa kuti ndichiza kwinu ndisenge mu uzari wa chitumbiku chaku Kristu.

³⁰Kweni ndikuŵeyereni, mwa ŵabali, pa chifukwa cha Ambuyafwe Yesu Kristu, ndi pa chifukwa cha chanju cha Mzimu iyo, kuti mulimbiye pamoza nane mu marombo kwaku Chiuta ghapa chifukwa changu;

³¹kuti nditaskike ku ŵakutafula ŵamu Yuda, ndi kuti uteŵeti wangu waku Yerusalemu uŵenge wamarondeka ku wakupaturika;

³²alinga kuti ndiziye kwinu ndi chimwemwe mu khumbu laku Chiuta, ndi kuti ndisisipulikiye pamoza namwe.

³³Ndipo Chiuta wa chimangu waŵe ndi imwe mose. Ameni.