Read gitonga ŴaRoma 3 Bible Online

ŴaRoma 3 - gitonga bible

ŴaRoma 3

¹Nchine viyo chanduku cha muYuda? Pamwenga ngune wanduzi wa mchinju wo?

²Nchinandi kosekose; chakudanga na, nchakuti ghangupazgikiya iwo manenedu ghaku Chiuta.

³Na kwati, asani ŵengavi kuvwana ŵanyake? Kumbi uwura chivwanu wawo uwayuwenge umagomekezgeka waku Chiuta?

⁴Kungaŵa viyo cha! Kweni waŵe muneneska Chiuta chingana munthu yose waŵa mtesi; nge ndimo kwalembeke, “Alinga kuti murunjiskike mu mazu ghinu, ndi mupunde mucheruzgika imwe.”

⁵Kweni asani uwura-urunji widu usimika urunji waku Chiuta, tikatingenji? Kumbi ngwambura-urunji Chiuta, pakutitole kandundu? (Ndikamba ulaka ndi munthu.)

⁶Kungaŵanga viyo cha! Ipu Chiuta wamkweruzga uli charu?

⁷Kweni asani chifukwa cha utesi wangu uneneska waku Chiuta ungufurwiya ku unkhankhu wake, chifukwa chine ine nane ndeche kweruzgika uli ndi mlakwi?

⁸Ndipo chifukwa chine tireka kukamba (nge ndimo titukikiya, ndi nge ndimo ŵanyake ŵatiti ifwe tikamba), tichitenge viheni, alinga vizenge vyamampha? Chisusa cha waviyo nchakurunjika.

⁹Na kwati? Kumbi tipambanapo? Cha pe, kosekose: chifukwa tapanikizga kali ŵaYuda ndi so ŵaGriki, kuti wose ŵe pasi pa ulakwi;

¹⁰uli ndimo kwalembeke, “Palive murunji, chingana njumoza;

¹¹palive wakuwamo, palive wakumpenjapenja Chiuta.

¹²Ŵapatukako wose pamoza, ŵanangika ŵaka; palive wakuchita umampha, palive, chingana njumoza.”

¹³“Singu lawo ndi muunda wamwazi; afuvya ndi malilime ghawo.” “Liwozga la ŵakhaku le kusi ku milomo yawo.”

¹⁴“Mlomo waku wo uzara kutemba ndi kurunda.”

¹⁵“Marundi ghawo ghapusumphiya kudiya ndopa;

¹⁶phasulu ndi usokwa vye mu nthowa zawo;

¹⁷ndipo nthowa ya chimangu ŵalive kose kuyiziŵa.”

¹⁸“Palive chopu chaku Chiuta pa maso pawo.”

¹⁹Kweni tiziŵa kuti vyenivyo vyose chikamba chilangulu cho, chikambiya wo ŵe pasi pa chilangulu; alinga kuti uchetamiskike mlomo wose, ndi kuti charu chose chitoleke ku cheruzgu chaku Chiuta.

²⁰Chifukwa kuti kuchiri ku nchitu za chilangulu paŵengevi kurunjiskika munthu wamoyo pa maso pake: pakuti mu chilangulu mwe mziŵiru wa ulakwi.

²¹Kweni sono pade pa chilangulu warongoleka urunji waku Chiuta, wakusimikizgika ndi chilangulu cho ndi ŵamchimi wo;

²²urunji nawo wakuchiuta wamu chivwanu mwaku Yesu Kristu, wa kwaku wose ŵakuvwana; pakuti mpambanu palive;

²³chifukwa wose ŵakulakwa, ŵapereŵe pe unkhankhu waku Chiuta;

²⁴ndipo mbakurunjiskikiya kwaulera ndi wezi wake mu uwombozi wa mwaku Kristu Yesu:

²⁵mweniyo Chiuta wangumumika kuŵa mphepeska mu chivwanu, mu ndopa zake, kwachirongo urunji wake, pa chifukwa cha kujumphapo maulakwi ghakuŵapo kali, mu chilekerezga cho chaku Chiuta, ndititi,

²⁶kwachirongo urunji wake mu nyengo yamakono; kuti waŵe iyo mweneko murunji, ndi so warunjiska we yose wakuvwana mwaku Yesu.

²⁷Viyo na, kwe pani kutumbwa? Kukanizgikiya limu. Ndi langulu lakutinji? La zinchitu kumbi? Awa; kweni ndi langulu la chivwanu.

²⁸Viyo tipima kuti munthu warunjiskika ndi chivwanu pade pa nchitu za chilangulu.

²⁹Pamwenga kumbi Chiuta ngwa ŵaYuda pe? Asi ngwa ŵaMitundu nawo? Inya, ngwa ŵaMitundu so;

³⁰asani njumoza Chiuta, mweniyo wamrunjiskiya mchinju ku chivwanu, ndi uwura-mchinju ndi chivwanu cho.

³¹Viyo ndi chivwanu tiwayuwa chilangulu kumbi? Kungaŵanga viyo cha! Kweni tikhozga chivwanu.