Read gitonga ŴaRoma 5 Bible Online

ŴaRoma 5 - gitonga bible

ŴaRoma 5

¹Viyo pakurunjiskika ndi chivwanu, chimangu te nacho kuchiri kwaku Chiuta mu Ambuyafwe Yesu Kristu;

²mwaku mweniyo nayo taŵandikiyamo ndi chivwanu mu wezi uwu mwenimo tituma; ndipo titumbwiya mu chigomekezgu cha unkhankhu waku Chiuta.

³Weni ukongwa titumbwiya so mu masuzgu ghidu: pakuziŵa kuti suzgu yitata unkhunthiya;

⁴ndi unkhunthiya, nkharu; ndi nkharu; chigomekezgu;

⁵ndipo chigomekezgu kuti chilengeska cha; pakuti chanju cho chaku Chiuta chasapatiskikiya mu mitima yidu mwa Mzimu Wakupaturika, yo wapaskika kwaku ifwe.

⁶Chifukwa kuti, tenga teche ŵakutomboroka; pa nyengo yakwenere Kristu wangufwiya ŵambura kuziŵa Chiuta.

⁷Pakuti nkhunononu kuti munthu wamfwiye mrunji: chingana ankhumba pa chifukwa cha wamampha munthu wangaganga kufwiya.

⁸Kweni Chiuta wasimikizgiya chanju chaku iyo mweneko kuchiri kwaku ifwe, mwakuti, tengateche ŵakulakwa, Kristu wangutifwiya.

⁹Ukongwa viŵi, tati tarunjiskikiya sono mu ndopa zake, titaskikenge ku kandundu ko ndi iyo.

¹⁰Chifukwa asani, tenga teche ŵamawongu, tingwanjaniskikiya kwaku Chiuta mu nyifwa ya Mwana wake, ukongwako, taŵakwanjaniskika titaskikenge mu umoyu wake.

¹¹Viyo pe cha, kweni so titumbwiya mwaku Chiuta mu Ambuyafwe Yesu Kristu, mwaku mweniyo tarondere sono muwoju wo.

¹²Viyo, uli ndimo mwa munthu yumoza ulakwi unguserere mu charu, ndi nyifwa pa chifukwa cha ulakwi wo, ndi viyo nyifwa yambukiya pa ŵanthu wose, pakuti wose ŵangulakwa,

¹³chifukwa mpaka nyengo ya chilangulu ulakwi wenga mu charu kali: kweni kuti alakwi upimikiya cha pakuuravi chilangulu.

¹⁴Kweni kutuwa kwaku Adamu mpaka kwaku Mosese nyifwa yinguwusa paku ŵeniwo nawo ŵengavi kulakwa kwakulingana ndi ubudi waku Adamu, yo nchikozgu chaku yo wangukhasa kuza.

¹⁵Kweni mpasku waulera kuti wenge ndimo uliri ulakwi cha, viyo ndimo chiriri cha wezi so nacho. Chifukwa asani mu chilakwa cha yumoza yo wangufwiya ŵanandi wo, ukongwa kwakuruska wezi wo waku Chiuta, ndi mpasku wo wamu wezi wa munthu yumoza yo, Yesu Kristu, ungufurwiya ku ŵanandi wo.

¹⁶Ndipo uli ndi mu yumoza wakutokatoka cha, ndimo uliri mpasku wo: pakuti cheruzgu cho chatuwa ku yumoza ku chisusa, kweni chawezi cho chatuwa ku vyakulakwa vinandi ku chirunjisku.

¹⁷Chifukwa asani, ndi ubudi waku yo yumoza, nyifwa yinguwusiya mwaku yo yumoza; ukongwa kwakuruska wo ŵaronde ufurwi wo wa wezi ndi wampasku wa urunji, ŵausiyenge mu umoyo mu yumoza yo, Yesu Kristu.

¹⁸Viyo na, mo mu kachitidu kamoza kaubudi cheruzgu chinguziya ŵanthu wose ku chisusa; viyo so mu kachitidu kamoza kaurunji chawezi chinguziya ŵanthu wose ku chirunjisku cha umoyo.

¹⁹Chifukwa uli ndimo pa chifukwa cha mtafu wa munthu yumoza ŵanandi wo ŵangusanduskika ŵalakwi, viyo so mu mvwiyu wa yumoza ŵanandi wo ŵapimikenge ŵarunji.

²⁰Ndipo chilangulu chingusere kurwandi, kuti kuzare kulakwa; kweni po ulakwi unguzara, wezi wo ungufurwiyapo:

²¹alinga kuti, uli ndimo ulakwi wo unguwusiya ku nyifwa, viyo so wezi wo unguwusiya mu urunji ku umoyo wamuyaya mwaku Yesu Kristu Ambuyafwe.