Read gitonga ŴaRoma 8 Bible Online

ŴaRoma 8 - gitonga bible

ŴaRoma 8

¹Viyo sono palive chisusa kwaku ŵeniwo mbamwaku Kristu Yesu.

²Chifukwa langulu la Mzimu wa umoyo mwaku Kristu Yesu landifwatuwa ku dangu lo la ulakwi la nyifwa.

³Cho langulu lingutondeka kuchita chifukwa kaŵiro ka unthu kenga kakutomboroka, Chiuta wanguchita. Wanguwa-yuwa ulakwi mu kaŵiro ka unthu pakutuma Mwana wake yo wanguja mu kaŵiro, kaŵiro ka munthu wakulakwa kwazachiwayuwa ulakwi.

⁴Chiuta wanguchita yichi mwakuti cha urunji cha langulu chifiskike mwaku ifwe, taŵeni fweti ja kwakuyana ndi Mzimu, kwakuyana ndi kaŵiro ka unthu cha.

⁵Wo ŵaja kwakuyana nge ndimo kaŵiro kawo ka unthu katuŵanene, makhumbu ghawo gharongozgeka ndi vyo kakhumba. Wo ŵaja kwakuyana ngendimo Mzimu wawo utuŵanene, vinjeru vyawo virongozgeka ndi vyo Mzimu ukhumba.

⁶Asani vinjeru vyako virongozgeka ndi vyo kaŵiro ka unthu kakhumba, vikakurongozgiyanga ku nyifwa, kweni asani vinjero vyako virongozgeka ndi vyo Mzimu ukhumba vikakurongozgiyanga ku umoyo ndi chimangu.

⁷Viyo munthu watuŵa wamawongo waku Chiuta penipo vinjeru vyake virongozgeka ndi vinthu vyo kaŵiro kake ka unthu kakhumba; chifukwa kuti wavwiya langulu laku Chiuta cha, ndipo kwakuneneska kuti wangalivwiya cha.

⁸Wo ŵavwiya kaŵiro kawo ka unthu kuti ŵangavwiya Chiuta cha.

⁹Kweni kuti imwe muja kwakuyana nge ndimo kaŵiro ka unthu winu katikuneniyani cha, muja uli ndimo Mzimu watikuneniyani, pakuti nadi, Mzimu waku Chiuta uja mwaku imwe. We yose yo walive Mzimu waku Kristu, kuti ngwaku iyo cha.

¹⁰Kweni asani Kristu waja mwaku imwe, chingana liŵavu linu lingaŵa lakufwa chifukwa cha ulakwi, ndipuuli Mzimu mbumoyo kwaku imwe chifukwa mwarunjiskika ndi Chiuta.

¹¹Asani Mzimu waku Chiuta yo wanguyuska Yesu ku nyifwa, waja mwaku imwe, viyo yo wanguyuska Yesu ku nyifwa, wakapaskanga so umoyo ku maliŵavu ghino ghachifweni pakuŵa mu Mzimu mwaku imwe.

¹²Viyo na, mwa ŵabali, teŵa matewo, kweni ku nyama cha, kwachijariya ŵamoyo kwakulingana ndi nyama;

¹³chifukwa asani mujariya ŵamoyo kwakulingana ndi nyama, mukafwanga; kweni asani ndi Mzimu mufwiska machitidu gha liŵavu lo, muŵenge wamoyo,

¹⁴chifukwa ŵeniwo wose ŵarongozgeka ndi Mzimu waku Chiuta, yiwo mbana ŵaku Chiuta.

¹⁵Chifukwa kuti munguronde cha mzimu wa uŵanda wa chofyu, kweni munguronde mzimu wa ulezi, mwaku wo tikutiya, “Aba, Ada!”

¹⁶Mzimu iyo wasimikizgana ndi mzimu widu, kuti te ŵana ŵaku Chiuta:

¹⁷kweni asani te ŵana, te ŵakuhara so; ŵakuhara ŵaku Chiuta, ndi ŵakuhara ŵamasanga ndi Kristu; asani tikomwe pamoza nayo, alinga kuti tikankhuskikiye so pamoza nayo.

¹⁸Chifukwa ndipima kuti vinkhurukusweka vya nyengo yamakono kuti vi tenere cha kulinganizgika ndi unkhankhu wo ukavumbulikanga kwaku ifwe.

¹⁹Pakuti chilereze chakunweka cha ulengi chilindizga kuvumbulika kwa ŵana ŵaku Chiuta.

²⁰Chifukwa ulengi unguthereskeke ku umbughuya, mwa khumbu lake cha, kweni nchifukwa chaku yo wanguwuthereska,

²¹mu chigomekezgu kuti ulengi nawo ufwatulikengeko ku uŵanda wa chivuzi kwachisere mu wanangwa wa unkhankhu wa ŵana ŵaku Chiuta.

²²Chifukwa tiziŵa kuti ulengi wose utamanthiya ndi ulangiya pamoza mpaka ku sono.

²³Ndi viyo pe cha, kweni taŵeni nafwe, taŵakuŵa ndi mruwuku wa Mzimu, nafwe titamanthiya mkatikati mwaku taŵeni, taŵakulindizga kuŵa ŵana, uwombozi wo wa maliŵavu ghidu.

²⁴Chifukwa ndi chigomekezgu cho tataskika: kweni chigomekezgu chakuwoneka kuti nchigomekezgu cha: chifukwa njani wagomekezga chenicho wawona?

²⁵Kweni asani tigomekezga chenicho tirive kuwona ndi chizizipizgu tichilereze.

²⁶Ndipo kwakulingana viyo Mzimu nayo watovya unthomboru widu: pakuti tirive kuziŵa cho tirombenge mo kutenere, kweni Mzimu iyo watininizikiya ndi mitamanthu yambura makambika;

²⁷ndipo yo wapenja mu mitima waziŵa maphweredu gha Mzimu, pakuti kwakuyana ndi khumbu laku Chiuta waninizikiya ŵakupaturika.

²⁸Ndipo tiziŵa kuti vinthu vyose vichitiya pamoza ku umampha kwaku wo mbakumwanja Chiuta, kwaku ŵeniwo mbakudanikiya uli ndi chitema chake.

²⁹Pakuti ŵeniwo wanguŵaziŵiya limu, wanguŵateme limu wo kuyana ndi chikozgu cha Mwana wake, kuti waŵe iyo muku wawo wa ŵabali ŵanandi;

³⁰ndipo wo wanguteme limu, ŵeniwo nawo wangudana: ndipo wo wangudana, ŵeniwo nawo wangurunjiska; ndipo wo wangurunjiska, ŵeniwo nawo wangukankhuska.

³¹Viyo tikatingenji kwaku vyenivi? Asani Chiuta we kuchiri kwaku ifwe, wakumikana nafwe njani?

³²Mweniyo nadi wengavi kureka Mwana waku yija, kweni wangumpereke pa chifukwa chaku tose, warekenge so uli kutipaska kwawezi vinthu vyose pamoza nayo?

³³Njani waŵasumuwenge ŵakusankhika ŵaku Chiuta? Chiuta ndiyo warunjiska; wakususka njani?

³⁴Kristu Yesu ndiyo wangufwa, inya, ndiyo wanguyuskika ku ŵakufwa mweniyo we ku marghe ghaku Chiuta, mweniyo nayo waninizikiya pa chifukwa chidu.

³⁵Njani watigauwenge ku chanju cho chaku Kristu? Suzgu kumbi, pamwenga urwirwi, pamwenga chiŵembu, pamwenga chilala, pamwenga nkhuli, pamwenga urwani, pamwenga lipanga?

³⁶Uli ndimo kwalembeke, “Pa chifukwa chaku imwe tibayika msana wose; tapimika nge ndi mberere zakwachibayika.”

³⁷Awa! Mwaku vyenivi yose tiruskiya kupunda mwaku yo wangutanja.

³⁸Chifukwa ndoŵeka kuti chingana ndi nyifwa, chingana mbumoyo, chingana mbangelo, chingana ndi maufumu, chingana ndi vyo viripo, chingana ndi vyo vitazanga, chingana ndi vyanthazi,

³⁹chingana ndi wima, chingana ndi mtota, chingana nchakulengeka chose chamwenga, kuti chiziŵa kutipatuwa cha kutuwa ku chanju chaku Chiuta mwaku Yesu Kristu Ambuyafwe.