Read gitonga 1 ŴaKorinte 1 Bible Online

1 ŴaKorinte 1 - gitonga bible

1 ŴaKorinte 1

¹Kalata wakutuwa kwaku Paulo, wakudanikiya kuŵa wakutumika waku Yesu Kristu mu khumbu laku Chiuta, ndi Sosthene mbali widu,

²ku mpingu waku Chiuta wamu Korinte, ku ŵakupaturika mwaku Kristu Yesu, wakudanikiya kuŵa wakupaturuka, pamoza ndi wose mu malo ghose wo ŵadana pa zina laku Yesu Kristu Mbuyafwe, tose pamoza Mbuya wawo ndi widu.

³Wezi kwaku imwe ndi chimangu kutuwa kwaku Chiuta Auskefwe ndi ku Ambuya Yesu Kristu.

⁴Ndiwonga Chiuta nyengo zose paku imwe, pa chifukwa cha wezi wo waku Chiuta weniwo ungupaskika kwaku imwe mwaku Kristu Yesu;

⁵kuti mwaku vyose mwasakatiskika mwaku iyo, mu kakambidu kose ndi mziŵiru wose,

⁶uli ndimo chisimisimi ndi uneneska wa mwaku Kristu wakhozgeke mwaku imwe:

⁷viyo kuti mupereŵe mu chawezi cha mzimu che chose so cha pakulindizga uvumbuzi wa Ambuyafwe Yesu Kristu;

⁸mweniyo nayo wakakhozganga imwe mpaka ku umari, wambura masumulika mu zuŵa la Ambuyafwe Yesu Kristu.

⁹Ngwamagomekezgeka Chiuta, mwaku mweniyo mungudanikiya ku wanase wa Mwana wake Yesu Kristu Ambuyafwe.

¹⁰Kweni ndikuŵeyereni, mwa ŵabali, mu zina la Ambuyafwe Yesu Kristu, kuti mose mukambe chakuyanayana, ndi kuti mwinu muŵevi magaukanu; kweni kuti muŵe ŵakumangana pamoza mu chinjeru chakuyana ndi mu cheruzgu chakuyana.

¹¹Chifukwa ndi wo ŵaku Kloe kwandivumbulikiya vya paku imwe, mwa ŵabali, kuti suskanu ziripo mukati mwinu.

¹²Cho ndikamba nchakuti yumoza ndi yumoza waku imwe watiti, “Ine nde waku Paulo”; munyake watiti, “Ine nde waku Apolo”; munyake watiti, “Ine nde waku Kefa”; munyake watiti, “Ine ndi waku Kristu.”

¹³Kumbi Kristu iyo wapandukana? Kumbi Paulo wangupayikikiya pa chifukwa chinu? Pamwenga kumbi mungubatizikiya mu zina laku Paulo?

¹⁴Ndimuwonga Chiuta pakuti ndirivi kubatizapo yumoza waku imwe, kweni Krispu ndi Gayo pe;

¹⁵vinu munthu wanganena kuti mungubatizikiya mu zina langu.

¹⁶(Kweni ndingubatiza wa nyumba so yaku Stefano. Pade paku wo, kuti ndiziŵa cha kuti ndingubatiza munyake so.)

¹⁷Chifukwa Kristu kuti wangundituma kwachibatiza cha, kweni kwachigozga evangeli: mu zeru ya mazu cha, vinu yingawayuka nthazi ya mphinjika yaku Kristu.

¹⁸Chifukwa kwaku wo mbakuyowa mazu gha mphinjika nkhupusa; kweni kwaku ifwe taŵakutaskika ndi nthazi yaku Chiuta.

¹⁹Pakuti kwalembeka, “Nkhapasuwanga zeru ya ŵazeru, ndi uchenjezi wa ŵakuchenje nkhawayuwanga.”

²⁰We pani wazeru? We pani mlembi? We pani wasuskano wa mgonezi uno? Asi Chiuta wayipusiska zeru ya charu?

²¹Chifukwa kwakulingana ndi zeru yaku Chiuta charu cho mu zeru yake chengavi kumziŵa Chiuta, kungukondweska Chiuta mu kupusa kwa chitaula kwachitaskiya ŵakuvwana.

²²Pakuti ŵaYuda ŵafumbiriya visimikizgu, ŵaGriki ŵapenja zeru,

²³kweni ifwe titaula Kristu wakupayikika, ku ŵaYuda nchiguŵisku, ku ŵaMitundu nkhupusa;

²⁴kweni kwaku ŵeniwo ŵadanika, ŵaYuda ndi so ŵaGriki, Kristu ndi nthazi yaku Chiuta ndi zeru yaku Chiuta.

²⁵Pakuti chakupusa chaku Chiuta nchazeru kwakuruska ŵanthu; ndi chaunthomboru chaku Chiuta nchalikongonu kwakuruska ŵanthu.

²⁶Chifukwa thoŵani kudanika kwinu, mwa ŵabali, ŵalive kudanika ŵanandi ŵazeru uli nkhu liŵavu, ŵanthazi ŵanadi cha, ŵanangwa ŵanandi cha;

²⁷kweni Chiuta wasankha vyakupusa vya charu, alinga kuti waŵalengeske ŵazeru; ndi vyakutomboroka vya charu wasankha Chiuta, alinga walengeske vyanthazi,

²⁸wasankha Chiuta vyawakawaka vya charu, ndi vyakuyeyeka, ndi vinthu vyakuŵapo cha, alinga wawayuwe vyakuŵapo.

²⁹Viyo kuti wareke munthu yose kutumbwa paurongo paku Chiuta.

³⁰Mweniyo ndi funda ya umoyo winu mwaku Kristu Yesu, mweniyo Chiuta wamuchita kuŵa vinjeru vidu, urunji widu, utozi widu ndi uwombozi widu;

³¹alinga kuti, uli ndimo kwalembeke, “Wakutumbwa watumbwiye mu Ambuya.”