Read gitonga 1 ŴaKorinte 13 Bible Online

1 ŴaKorinte 13 - gitonga bible

1 ŴaKorinte 13

¹Asani ndirongoro ndi marongoroledu gha ŵanthu ndi gha ŵangelo, kweni ndirive chanju, ndituŵa nge ndi sapuli yakuyeyeta, pamwenga chijeri chakujewereska.

²Ndipo asani ndi ndi umchimi, ndipo ndiziŵa mangari ghose ndi mziŵiru wose; asani nde ndi chivwanu chose, viyo kuti ndinganderezga mapiri, kweni chanju ndirive, kuti nde kanthu cha.

³Ndipo asani ndingagaŵa vyangu vyose kovya ŵakavu, asani ndingapereka liŵavu langu kuti ndocheke, kweni chanju ndirive, kuti ndanduwengepo kanthu cha.

⁴Chanju chilekerezga, ndipo ncha ulemu, chanju kuti chiŵiniwa cha; chanju kuti chijirumba cha;

⁵kuti chitukumuka cha, kuti chichita nkhaza cha. Kuti chilembe vyaku chija cha, kuti nchachikaralizga cha, kuti chitundiriya pa uheni wo chikunthiyapo cha,

⁶kuti chikondwere pa uwura-urunji cha, kweni chikondwere ndi uneneska.

⁷Chikandirizga vyose, chivwana vyose, chigomekezga vyose, chikunthiyapo vyose.

⁸Nyengo zose kuti chanju chipereŵe cha; kaya manyi ndi mauchimi, ghawayukenge, pamwenga marongoroledu, ghamarenge; pamwenga mziŵiru, uwayukenge.

⁹Chifukwa tiziŵa kwamalinga, ndipo titaula kwamalinga;

¹⁰kweni penipo chikazanga chakufikapo cho, cho chamalinga chikawayukanga.

¹¹Ndenga ndeche kana, ndarongoronga nge nkhana, ndathoŵanga nge nkhana, ndaghanaghanagha nge nkhana; ndati ndaŵa doda, ndareka vya wanaumana.

¹²Chifukwa sono tiwona kazimuzimu nge ndimo tilereske, pa chakuwonapo (galasi) kwakusachizga kweni penipa tazamuwonana chisku ku chisku, sono ndiziŵa kwamalinga; kweni penipa nkhaziŵisiskanga uli ndimo ndaziŵikwiya.

¹³Ndipo sono chijariya chivwanu, chigomekezgu, chanju, vitatu; kweni chakuruska ukongwa chaku vyo, nchanju.