Read gitonga 1 ŴaKorinte 16 Bible Online

1 ŴaKorinte 16 - gitonga bible

1 ŴaKorinte 16

¹Kweni nge nkhu mpasku wo wapa chifukwa cha wakupaturika, uli ndimo ndingulanguliya mipingu yaku Galatia, imwe namwe chitani viyo.

²Pa zuŵa lakudanga la sabata munthu yose waku imwe wajiŵikiye mbiku yake pade uli ndimo wasakatiya, alinga kuti vyakupereka vinu vireke kwazichitika ndichiza ine.

³Ndipo ndichiza ine wo mungatondo ndiŵatumenge ndi kalata kuti ŵakapereke vyawanangwa vinu ku Yerusalemu.

⁴Ndipo asani kungayiyamu ndichiruta ine ŵangaruta pamoza nane.

⁵Kweni nkhazanga kwinu, pakutuliya ku Makedonia; chifukwa ndikhumba kwachifika danga ku Makedonia,

⁶kweni akhumba ndazamja namwe, pamwenga kutandara namwe muchipwepwe, alinga kuti imwe muzindiperekezge mu nthowa kweniko kose ndazamruta.

⁷Chifukwa kuti ndikhumba kuwona imwe sono pakurutiriya mu nthowa pe cha; ndigomekezga kwazitandara namwe nyengo yakuti, asani Ambuya azomera.

⁸Kweni nkhajanga mu Efeso mpaka Pentekoste,

⁹chifukwa khumo likuru la mlimu likujurikiya ine, ndipo ŵamphindikwa pe mbanandi.

¹⁰Kweni asani wazenge kwinu Timote, lereni kuti waŵe kwinu kwambura ofi, chifukwa watakataka mlimu wa Mbuya ulaka ndine.

¹¹Viyo wangamyuyuwanga munthu cha. Kweni muperekezgeni pa nthowa mu chimangu, kuti wawere so kunu: chifukwa ine pamoza ndi ŵabalitirindizga iyo.

¹²Kweni nge nkhu mbali Apolo, ndingumuŵeyere ukongwa kuti wazi kwinu pamoza ndi ŵabali wo: ndipo kuti lenga khumbo lake cha kuti wazi ko nyengo yinu; kweni wakazanga asani wangaŵa ndi nyengo yakwenere.

¹³Khazgani, ngangamikani mu chivwanu chinu muŵe ulaka mbanthurumi.

¹⁴Vyose vyo muchita, vichitikiye mu chanju.

¹⁵Sono ndikuŵeyereni, mwa ŵabali-uyiziŵa nyumba yaku Stefano, kuti ndiwo ŵakudanga kuŵa ŵaKristu mu Akhaia, ndipo ŵakujipatuliya ku kuteŵete wakupaturika,

¹⁶iku namwe mujithereske ku ŵaviyo, ndi kwaku yose wakusanganamo mu mlimu wo ndi ŵakutakataka.

¹⁷Ndipo ndikondwere pa kuza kwaku Stefano ndi Fortunata ndi Akaiku; pakuti vyo ndingusauka mwinu ŵakwaniska iwo.

¹⁸Chifukwa ŵawerezga mo mzimu wangu ndi winu so. Waphwereni ukongwa ŵaviyo.

¹⁹Mipingu yaku Asia yakutauzgani. Akula ndi Priskila, pamoza ndi ŵampingu ŵamu nyumba yawo ŵakutauzgani ukongwa mu Mbuya.

²⁰Ŵakutauzgani ŵabali wose. Tauzgani ndi mfyofyonthu ukhovu.

²¹Tauzgo lenilo lilembeka ndi janja laku ndamweni nda Paulo.

²²Asani munthu wareka kwanja Ambuya, waŵe wakutembeka. Ambuyafwe ŵatuza.

²³Wezi wa Ambuya Yesu Kristu uŵe namwe.

²⁴Chanju changu chiŵe ndi imwe mose mwaku Kristu Yesu. Ameni.