Read gitonga 1 ŴaKorinte 3 Bible Online

1 ŴaKorinte 3 - gitonga bible

1 ŴaKorinte 3

¹Ndipo ine, mwa ŵabali, kuti ndinguziŵa cha kukukambiyani nge nkhu ŵamzimu, kweni nge nkhu ŵaliŵavu, nge nkhu ŵamjedu ŵamwaku Kristu.

²Ndingumuhiŵiyani mkaka, ndi chakurgha chikhomi cha; pakuti mwengavi kuziŵa kuchironde: chingana ndi sono naku kuti muziŵa kuchironde cha;

³chifukwa mweche ŵaliŵavu. Pakuti po pe bina ndi ndeu mukati mwinu, asi mwe ŵaliŵavu, ndi mutenda ulaka mbanthu bweka?

⁴Chifukwa penipo yumoza watiti, “Nde waku Paulo ine,” ndi munyake, “Ndine waku Apolo,” asi mwe ŵanthu?

⁵Apolo nkhane? Ndipo Paulo nkhane? Mbateŵeti mwaku ŵeniwo munguvwaniya; uli ndimo Ambuya angupaskiya kwaku yose.

⁶Ine ndingupanda, Apolo wangudiriya maji; kweni Chiuta ndiyo wangumezga.

⁷Ndiviyo wakupanda yo kuti nkhanthu cha, chingana ngwakudiriya maji yo; kweni Chiuta wakumezga ndiyo.

⁸Ndipo wakupanda ndi wakudiriya maji mbamoza: kweni yose wajirondiyenge mphotu yaku yija kwakulingana ndi chitakataka chaku yija.

⁹Chifukwa te ŵanchitu-ŵanase ŵaku Chiuta; ulimi waku Chiuta, uzengi waku Chiuta ndimwe.

¹⁰Mwa wezi waku Chiuta wo ungupaskika kwaku ine, nge ndi mzengi mura wazeru ndinguŵika chiŵanja; ndipo munyake wazengapo. Kweni munthu yose walereske mo wazengiyapo.

¹¹Chifukwa chiŵanja chinyake kuti waziŵa munthu kuŵika cha, kweni chenicho pe chararikika, ndicho Yesu Kristu.

¹²Kweni asani munthu wazenga pachiwanjacho ndi golide, siliva, myayamtengu, miti, uteka, mbuwa;

¹³nchitu yake yose yikawonekanga: chifukwa zuŵa lo yikayirongonga, pakuti yikavumbulikanga mu moto; ndipo nchitu yaku yose mo yiriri, moto ndiwo wesenge nchituyo.

¹⁴Asani nchitu ya munthuyo wazenga pa chiŵanja cho yijaririyenge, wakarondenga mphotu.

¹⁵Asani nchitu ya munthu yochekenge, chikamuŵiyanga chitayiku: chingana iyo mweneko nadi wapozomoskekenge; kweni viyo nge ndimu moto porotu.

¹⁶Asi muziŵa kuti mwe kasopi[1] waku Chiuta, ndikuti Mzimu waku Chiuta uja mwainu?

¹⁷Asani yumoza wananga kasopi waku Chiuta, Chiuta wamunangenge iyo; chifukwa kasopi yo waku Chiuta ngwakupaturika, ndipo kasopi yo wakupaturika ndimwe.

¹⁸Paŵevi wakujifuvya. Asani munthu mwaku imwe watijipima kuti ngwazeru mu mgonezi uwu ikuwaŵe wakupusa, alinga kuti waŵenge wazeru.

¹⁹Chifukwa kwaku Chiuta zeru ya charu chino nkhupusa. Chifukwa kwalembeka, “Ngwakuŵakole ŵazeru mu uchenjezi wawo,”

²⁰ndipo so, “Mbuya waziŵa marunguruku gha ŵazeru wo, kuti ngaumbughuya.”

²¹Viyo wangatumbwanga yumoza cha mu ŵanthu. Chifukwa vyose vye vinu;

²²manyi ndi Paulo, pamwe Apolo, pamwenga Kefa, pamwenga charu, pamwenga umoyo, pamwenga nyifwa, pamwenga vyasono, pamwenga vyamkucha; vyose vye vinu:

²³imwe mwe ŵaku Kristu; ndipo Kristu ngwaku Chiuta.