Read gitonga 1 ŴaKorinte 6 Bible Online

1 ŴaKorinte 6 - gitonga bible

1 ŴaKorinte 6

¹Kumbi yumoza waku imwe, pakuŵa nako kafukwa pa munyake, wangatole mrandu ku ŵaziraurunji mu malo mwaku ŵakupaturika wo?

²Asi muziŵa kuti ŵakupaturika wo ŵakeruzganga charu? Ndipo asani charu chiteruzgika ndi imwe, kumbi imwe mulive kwene kweruzga tumirandu tumanatumana?

³Asi muziŵa kuti tikeruzganga ŵangelo? Na uli ukongwako vinthu vya umoyo uno?

⁴Viyo, asani mwe ndi mirandu ya vinthu vya umoyo uno, chifukwa chine mutiyiŵika pa ŵeruzgi ŵakubwaro wo mbakuyuyulika mu mpingu?

⁵Ndikamba chenichi kumulengeskani. Kumbi kwe viyo kuti mwaku imwe mulive yumoza wazeru, yo wangaziŵa keruzga pakati pa ŵabali?

⁶Kweni awonani mbali watole mbali ku mphara, paurongo pa ŵazira chivwanu!

⁷Awa na, kutore mrandu kumphara zakubwaro yumoza pa munyake nchifukwa chakutondeka kwa umoyo winu wachikristu. Chifukwa chine mureka kuvwiyapo uheni? Ukongwa viŵi murekiyanji kuti imwe ndimwe muphangike?

⁸Kweni imwe ndimwe muchita uheni muphanga, nadi mukwamphuwa ndi vya ŵabali ŵinu.

⁹Pamwenga asi muziŵa kuti ŵaziraurunji kuti ŵakaharanga ufumu waku Chiuta cha? Mungarandizgika cha: ŵareŵi, chingana mbakusopangoza, chingana mbarowozi, chingana mbauyaya, chingana mbakura ndi ŵanthurumi,

¹⁰chingana mbakupoka, chingana mbachipanira, kuti ŵakaharanga ufumu waku Chiuta cha.

¹¹Ndipo mwaŵanyake mwenga ŵaviyo. Kweni mwasambiskika, mwapaturiskika, mwarunjiskikiya mu zina la Ambuya Yesu Kristu, ndi mu Mzimu waku Chiuta widu.

¹²“Kwaku ine vinthu vyose vyamachitika”; kweni kuti vyose vitovya cha. “Kwaku ine vinthu vyose vyamachitika,” kweni kuti nkhaŵanga muŵanda ku kanthu ke kose cha.

¹³“Vyakurgha vikuŵiyako chifukwa cha rufu, ndi rufu chifukwa cha vyakurgha”: kweni Chiuta wakamaranga ilo ndi ivyo so. Kweni liŵavu kuti nda ku ureŵi cha, kweni ku Ambuya; ndi Ambuya ku liŵavu.

¹⁴Inya, mo Chiuta wangumyuskiya Mbuya, ndimu so wayuskiyenge ifwe mu nthazi yake.

¹⁵Asi muziŵa kuti maliŵavu ghinu ndi viŵaru vyaku Kristu? Kumbi nditonge viŵaru vyaku Kristu, ndi kuvisanduska viŵaru vya munthukazi mureŵi? Kungaŵanga viyo cha!

¹⁶Pamwenga mulive kuziŵa kumbi kuti yo ngwakukorana ndi munthukazi mureŵi ndi liŵavu limoza nayo? Chifukwa watiti, “Wo ŵaŵi ŵaŵenge nyama yimoza.”

¹⁷Kweni yo ngwakurungikana ndi Mbuya watuŵa ndi mzimu umoza ndi iyo.

¹⁸Uthaŵeni ureŵi wo, chakulakwa chose cho wangachita munthu che kubwaro ku liŵavu; kweni yo ngwakureŵa walakwiya liŵavu laku yija.

¹⁹Pamwenga mureka kuziŵa kumbi kuti liŵavu linu ndi kasopi wa Mzimu Wakupaturika wakuŵa mukati mwinu, yo mwe nayo kutuwa kwaku Chiuta? Ndipo kuti mwe waku mwaŵeni cha;

²⁰chifukwa mungugulika ndi mtengu. Viyo mkankhuskiyeni Chiuta mu liŵavu linu.