Read gitonga 1 ŴaKorinte 7 Bible Online

1 ŴaKorinte 7 - gitonga bible

1 ŴaKorinte 7

¹Kweni paku vyo mungundilembe: nkhwamampha ku munthu kukwaska munthukazi cha.

²Kweni chifukwa cha ulakalaka wa liŵavu, munthurumi yose waŵe ndi muwoli waku yija, ndi munthukazi yose waŵe ndi mrumi waku yija.

³Munthurumi wamuninkhe muwoli wake cho nchakumwenere: ndipo kwakulingana munthukazi nayo ku mrumi wake.

⁴Kuti munthukazi ngwamtufu pa liŵavu lake cha, kweni mrumi wake: ndipo kwakulingana munthurumi nayo kuti ngwamtufu pa liŵavu lake cha, kweni muwoli wake,

⁵Mungakaniyananga cha, kweni iku asani mpha phanganu kwakanyengo kakuti, mungaziŵa kujipatuwa mwakuti mujipereke ku kuromba pavuli pake muŵe pamoza so, alinga kuti warekenge Satana yo kumwesani chifukwa cha uzirakujitintha winu.

⁶Kweni ichi ndikambiya nge nkhumurongozgani, nge nkhumulangulani cha.

⁷Ndikhumba ŵanthu wose kuŵa ulaka nge ndine. Kweni munthu yose we nacho chawezi chaku yija kutuwa kwaku Chiuta, uyu cha karusu yaka, uyu chaku ka.

⁸Ku ŵamphara ndi vyoko, nkhwamampha kwaku wo kujijariya ulaka nge ndine.

⁹Kweni asani ŵalive kujitintha, ŵatorane: chifukwa nkhwamamphaku kutorana kwakuruska kukolezga mtima.

¹⁰Kweni ndiŵalanguliya wo mbakutorana kali (ine cha, kweni Ambuya), munthukazi wangapatana ndi mrumi wake cha,

¹¹(ndipo asani wapatukako iku wajijariye wambura kuŵirwa, pamwenga wawojeke ku mrumi wake); munthurumi wareke kupata muwoli wake.

¹²Kweni ku ŵakujapo ndikamba ndine Ambuya cha, asani mbali yumoza we nayo muwoli wake wambura kuvwana, ndipo munthukazi wazomera kuja nayo, wangampata cha.

¹³Ndipo munthukazi yo we ndi mrumi wake wambura kuvwana, ndi munthurumi iyo wazomera kuja nayo, wareke kumpata mrumi wake.

¹⁴Chifukwa munthurumi yo wambura kuvwana wapaturiskikiya mu muwoli wake, ndipo muwoli yo wambura kuvwana wapaturiskikiya mu mrumi wake; asani kuti kenga viyo cha, mphanyi ŵana ŵinu ŵenga ŵambura kutowa; kweni sono mbakupaturika.

¹⁵Kweni asani munthurumi pamwenga munthukazi wambura kuvwana yo watijigaruska, ipu wagaukeko; mbali yo munthurumi pamwenga mzichi kuti wakoreka mu uŵanda pa nthowa nge ndi iyi cha. Pakuti Chiuta watidaniya mu chimangu.

¹⁶Chifukwa uziŵa uli wamunthukazi we, kuti vinu panyake umtaskenge mrumi wako? Pamwenga uziŵa uli wamunthurumi we, kuti vinu panyake umtaskenge muwoli wako?

¹⁷Chakwenere nchakuti munthu yose wendenge kwakulingana ndi mo Chiuta wamuteme, ndipo nge ndimo Chiuta wamudaniya. Ili ndi langulu langu mu mipingu yose.

¹⁸Asani yumoza wangudanika wati wachinjika kali; wareke kupenja kuti mphanyi wangutuzgapo umchinju wake. Asani munyake wangudanika wenga wandachinjike, wareke kupenja kuti mphanyi wanguchinjika.

¹⁹Mchinju wo kuti nkhanthu cha, ndipo uwuramchinju kuti nkhanthu cha; kweni kusunga marangu ghaku Chiuta ndiko.

²⁰Munthu yose wajaririye mu mdanu mwenimo wanudanikiya.

²¹Mungudanika kumbi pakuŵa muŵanda? Urigaphwerengako ndi ichi cha. Asani napo ungaŵa mwanangwa, ipo ukoreske wanangwa wo.

²²Chifukwa yo wangudanikiya mu Ambuya, pakuŵa muŵanda, ndi mwanangwa mu Ambuya: kwakulingana nayo wangudanika pakuŵa mwanangwa, ndi muŵanda waku Kristu.

²³Mungugulika mtengu; mungaŵanga ŵaŵanda ŵa ŵanthu cha.

²⁴Mwa ŵabali, munthu we yose wajaririye pamoza ndi Chiuta mwenimo wangudanikiya.

²⁵Kweni pa zimbeta ndirive langulu la Mbuya: kweni ndipaska cheruzgu nge ngwakuchitikiya lisungu ndi Mbuya kuŵa wamagomezgeka.

²⁶Viyo ndipima kuti pakufinyirizgika ndi umoyo wa makono ghano, nkhwamampha ku munthu kujijariya mo waliri.

²⁷Kumbi wamangikiya ku munthukazi? Ungalembenga munthukazi cha.

²⁸Kweni asani napo ungato kuti walakwa cha; ndipo asani mbeta yingaŵirwa kuti yalakwa cha. Kweni kwaku wo ŵatorana ŵaŵenge ndi suzgu mu umoyo waliŵavu: ndipo ine fundu yangu njakumutuzganiko.

²⁹Kweni chenichi ndititi, mwa ŵabali, nyengo njakufupiskika; viyo kwanda sono wo mbakuŵa ndi ŵawoli ŵaŵe nge mbakuŵavi.

³⁰Ndipo wo mbakuliya, ŵaŵe nge mbakuliya cha; wo mbakukondwere, ŵaŵe nge mbakukondwa cha; wo mbakugula, ŵaŵe nge kuti ŵenga navyo cha,

³¹ndipo wo mbakutakataka ndi charu, ŵaŵe nge mbakutangwanikamo viŵi cha. Chifukwa karuta viyo kaŵiru kacharu chino.

³²Kweni ndikhumba muŵevi malikweŵeka. Yo ngwambura kuto wakweŵeke vya Ambuya, mo wangakondweske Ambuya;

³³kweni wakuto wakweŵeke vya charu, mo wangakondweske muwoli wake,

³⁴ndipo likondwa lake ligaŵikana. Viyo munthukazi nayo wakuŵirwa wapambana ndi mbeta. Yo ngwambura kuŵirwa wakweŵeke vya Ambuya, alinga kuti waŵe wakupaturika mu liŵavu ndi so mu mzimu: kweni yo ngwakuŵirwa wakweŵeke vya charu, mo wangakondweske mrumi wake.

³⁵Ndipo chenichi ndikambiya ku wanduzi waku mwaŵeni; alinga kuti ndikuŵikiyeni chikhwiriki cha, kweni ndovyeko kwaku cho nchamarumbika, ndi kuti Ambuya kwambura nthangwatangwa.

³⁶Kweni asani munthu wapima kuti wachitiya mbeta yake kwambura kwene, ndikuti wendi chilakolako chikuru paku iyo, po watondeka kujiko, wachite cho wakhumba; kuti walakwa cha; ŵatorane.

³⁷Kweni yo ngwakujiko mu mtima wake wambura khumbiru ili, kwani ngwakuŵandi mtufu pa khumbu laku yija, ndipo wateme mu mtima wake chenichi, chakuti wayisunge mbeta yake yambura kuŵirwa, wachitenge umampha.

³⁸Viyonthu yo watonge mbeta yake wachita umampha; ndipo yo wareka kuyito wachitenge umampha kwakuruska.

³⁹Munthukazi wamangika nyengo yose po weche wamoyo mrumi wake; kweni asani wafwa mrumi wake ndi mwanangwa kuŵirwa kwaku yo wakhumba malinga ndi nthengwa ya mu wanasi wa Ambuya.

⁴⁰Kweni mucheruzgu changu ndititi ngwakukondwa kwakuruska asani wajaririya mo waliri. Ndipo nane so ndirunguruka kuti nde ndi Mzimu waku Chiuta.