Read gitonga 2 ŴaKorinte 13 Bible Online

2 ŴaKorinte 13 - gitonga bible

2 ŴaKorinte 13

¹Aka nkhachitatu nthuza kwinu. Pa mlomo wa ŵakaboni ŵaŵi pamwenga ŵatatu nkhani yose yikakhozgekanga.

²Ndakambiya pakweru, ndipo pakweru ndikambiya nge mphenipo ndinguŵiyapo pa ulendo wa chiŵi, viyosono napo pakuŵapo cha ndikamba kwaku wo ŵalakwa kali, ndi ku ŵakujapo wose, kuti, asani ndingaza so, kuti nkhalekerezganga imwe cha.

³Po mulembe chisimikizgu chaku Kristu wakurongorole mwaku ine; mweniyo kuchiri kwinu kuti watomboroka cha, kweni ngwanthazi mwinu.

⁴Chifukwa nanga wangupayikikiya mu unthomboru, ndikweni wajariya wamoyo mu nthazi yaku Chiuta. Chifukwa nafwe te ŵakutomboroka mwake, kweni pakutakataka ndi imwe tijariyenge ŵamoyo pamoza ndi iyo mu nthazi yaku Chiuta.

⁵Mujese, vinu mwe ŵakukoleze chivwanu cho mujirozge mwaŵeni. Pamwenga kumbi mureka kujiziŵiya, kuti Yesu Kristu we mwinu? Vinu kokuli mwe ŵakupatika.

⁶Kweni ndigomekezga kuti mukaziŵanga kuti ifwe te ŵakupatika cha.

⁷Ndipo timromba Chiuta, kuti mureke kwananga; kuti nchakuti ifwe tiwoneke ŵakurumbika cha, kweni kuti muchite imwe cho nchikongorekwa, chingana tingaŵa ifwe nge mbakupatika.

⁸Chifukwa kuti tiziŵa cha kuchitiya kanthu pa uneneska, kweni chifukwa cha uneneska.

⁹Chifukwa tikondwa, penipo titomboroka ifwe, ndipomwe ŵanthazi imwe: chenichi nacho tirombe, kukongora kwinu,

¹⁰chifukwa chenichi ndilemba vyenivi pakuŵa kunyake, alinga kuti, pakuŵapo, ndingachitiya kwakufyanga cha, kwakulingana ndi mtufu weniwo ŵandipaska Ambuya kwachizenga, ndi kwachibwanganduliya pasi cha.

¹¹Pakumariya, mwa ŵabali, paweme! Mukongoreke: musangaruskike; mupimiye chakuyana pe; mujaririyane mu chimangu; ndipo Chiuta wa chanju ndi chimangu waŵenge pamoza namwe.

¹²Tauzganani ndi mufyofyonthu ukhovu.

¹³Ŵakupaturika wose ŵakutauzgani.

¹⁴Wezi wa Ambuya Yesu Kristu, ndi Chanju chaku Chiuta, ndiŵanase wa Mzimu Wakupaturika vikuŵiyeni imwe mose.