Read gitonga 2 ŴaKorinte 3 Bible Online

2 ŴaKorinte 3 - gitonga bible

2 ŴaKorinte 3

¹Kumbi tambenge so kujisimikizgiya ifwe taŵeni? Pamwenga tikavuka kumbi, nge mbanyake ŵakalata ŵakutisimikizgiya kwaku imwe, pamwe ŵakutuwa kwaku imwe?

²Imwe ndimwe kalata widu, wakulembeka mu mitima yinu, wakuziŵikwa ndi wakuŵerengeka ndi ŵanthu wose;

³pakurongoleka kuti mwe kalata waku Kristu, wakuperekeka ndi ifwe, wakulembeka ndi inke cha, kweni pa vipadwa vya mitima ya ŵanthu.

⁴Ndipo te nacho chigomezgu chaviyo mwakuKristu kuchiri kwaku Chiuta.

⁵Kuti ndikamba cha kuti te ŵakukwaniya mwaku taŵeni, kujipimiya nge tendi kanthu kakutuliya pa mtima waku taŵeni, kweni kukwaniriskika kwidu nkhwakutuliya kwaku Chiuta,

⁶Mweniyo so watenereska kuŵa ŵateŵeti ŵa chipanganu chifya, cha lembo cha, kweni cha mzimu; chifukwa lembo lo libaya, kweni Mzimu ndiyo wapaska umoyo.

⁷Kweni asani uteŵeti wo wa nyifwa, wakusemeka ndi kulembeka mu mya, unguŵa ndi unkhankhu, viyo kuti ŵana ŵaku Yisraele ŵengavi kuziŵa kulereska pa chisku chaku Mosese chifukwa cha unkhankhu wa chisku chake, unkhankhu wo wenga wakuchujuka;

⁸na uli ukongwako asi uteŵeti wa mzimu ukaŵanga ndi unkhankhu ukuru?

⁹Chifukwa asani uteŵeti wo wa chisusa mbunkhankhu, iku ukongwako mbwenu uteŵeti wa chirunjisku uruska mu unkhankhu.

¹⁰Chifukwa chakukankhuskika cho kuti chakankhuskika mwaku chenichi cha, chifukwa cha unkhankhu wo ngwakuruska.

¹¹Chifukwa asani cho chakungunukanga chenga ndi unkhankhu, iku ukongwako cho nchakujaririya nchamu unkhankhu wakuruska.

¹²Viyo pakuŵa ndi chigomezgu chaviyo, tikamba ndi chiganga chikuru,

¹³ndipo nge ndi Mosese cha, yo wadikanga chidiku pa chisku chake, kuti ŵana ŵaku Yisraele ŵangalereskanga pa umari wa unkhankhu wo wakungunukanga cha.

¹⁴Kweni miwongu yawo yingunonopeskeka, chifukwa mpaka ku zuŵa lino chidiku cho cheche kujaririya chambura kuvwinkhulika, penipo ŵeche kuŵerenga chipanganu chamwake; ndiku kuti chivwinkhu cho cheche kujaririya chambura kuvwinkhulika chifukwa ndi mwaku Kristu pe mo chivwinkhulikiya.

¹⁵Kweni mpaka zuŵa linu, penipo pose Mosese waŵerengeka, chivwinkhu cheche pa mitima yawo.

¹⁶Kweni penipo pose wangang'anamukiya munthu ku Mbuya, chivwinkhu cho chamuvwinkhulikiya limu.

¹⁷Kweni Ambuya ndi Mzimu, ndipo kweniko kwe Mzimu wa Mbuya, kweniko so kwe wanangwa.

¹⁸Ndipo ifwe tose, ndi chisku chakuvwinkhulika, tithoŵa uli ndi mu kayilole unkhankhu wa Mbuya, ndipo tisanduskikiya mu chikozgu icho cha kaŵiru kake, kutuwa ku unkhankhu kuya ku unkhankhu, nge ndimo uziya kutuliya ku Mbuya yo ndi Mzimu.