Read gitonga 2 ŴaKorinte 5 Bible Online

2 ŴaKorinte 5 - gitonga bible

2 ŴaKorinte 5

¹Chifukwa tiziŵa kuti asani nyumba yapa charu ya hema lidu yabwanganduka, uzengi wakutuliya kwaku Chiuta te nawo, nyumba yakuchitika ndi manja cha, yamuyaya, mu machanya.

²Chifukwa nadi mwaku yeniyi titamantha, taŵakunweka kuvwalikika uja widu wo wakutuliya kuchanya,

³mwakuti titakuti tavwalikika kuti tikasanirikanga ŵankhuli so cha.

⁴Chifukwa nadi po teche mu hema la liŵavu lenili titamantha ndi kuzitiskika, chifukwa kuti tikhumba kuvwinkhulika cha, kweni kuvwalikika, alinga kuti lachifweni ili limezeke ndi umoyo.

⁵Kweni yo watichitiya chenichi chaviyo ndi Chiuta, mweniyo watipaska Mzimu nge nchamatomi cha umoyo wo utuza.

⁶Viyo tikhwima mtima nyengo zose, po tiziŵa kuti po teŵalendo pano mu liŵavu ili te kunyake ndi Ambuya,

⁷chifukwa titende mu chivwanu, mu kawonedu cha.

⁸Kweni tikwimadi mtima ndipo ukongwako tinweka kutuwamo mu liŵavu ili ndi kwachija ndi Ambuya.

⁹Chifukwa chenichi likhumbira lidu ndakuti manyi tepamoza ndi Mbuya, manyi te kunyake, kweni tiŵe nge mbanthu wo ŵatenere kumkondweska Iyo.

¹⁰Pakuti tose tikawonekanga paurongo pa chitengu chakweruzgiyapo chaku Kristu; kuti yose waronde vyapa liŵavu, kwakulingana ndi vyo wachita, pamwe vyamampha, pamwe viheni.

¹¹Viyo pakuziŵa wofi wa Ambuya tichichizga ŵanthu, kwani ifwe mo tiliri tawoneka kwaku Chiuta; ndipo ndigomekezga kuti tawoneka mu njuŵi zinu so.

¹²Kuti tijanizgiya so kwaku imwe cha, kweni timpaskani pakutumbwiyapo pa chifukwa chidu, alinga mungaŵa nacho chakwamukiya weniwo ŵatumbwiya mu kawonekedu, ndi mu mtima cha.

¹³Chifukwa asani tiwoneka nge tifuntha, nchifukwa cha mlimu waku Chiuta; ndipo asani tiziza, nkhwaku imwe.

¹⁴Chifukwa chanju chaku Kristu chititikakamizga, taŵakweruzga chenichi, chakuti Yumoza wangufwiya wose, viyo wose wangufwa;

¹⁵ndipo chifukwa chaku wose wangufwiya, alinga kuti wo mbakuŵa ndi umoyo ŵangajijariya ŵija so cha, kweni mweniyo pa chifukwa chawo wangufwa ndi kuyuka so.

¹⁶Viyo na, ifwe kutuwa ku sono kuti tiziŵa yumoza uli nkhu liŵavu cha: chingana napo tamziŵa Kristu uli nkhu liŵavu, ndikweni sono kuti timziŵa viyo so cha.

¹⁷Ndiviyo asani yumoza we mwaku Kristu, nchakulengeka chifya: vyakale vyarutapo; awonani, vyaza vifya.

¹⁸Kweni vyose ivi vituliya kwaku Chiuta, yo watanjaniskiya kwaku yija mwakuKristu, ndipo wapaska ifwe uteŵeti ndi wa chanjanisku;

¹⁹nge nkhuti Chiuta wenga mwaku Kristu wakwanjaniskiya charu kwaku yija, wakuŵapimiya vilakwa vyawo cha, ndi wakutipazgiya ifwe mazu gha chanjanisku cho.

²⁰Viyo te mathenga pa chifukwa chaku Kristu, nge Chiuta waŵeyererenga mwaku ifwe: tininizikiya imwe pa chifwa chaku Kristu, mwanjaniskikiye kwaku Chiuta.

²¹Yo ngwambura kuziŵa ulakwi wangumuchita wakusangana nafwe ulakwi, mwakuti ifwe pakubatikana nayo, tisangane nayo urunji waku Chiuta.