Read gitonga ŴaGalatia 1 Bible Online

ŴaGalatia 1 - gitonga bible

ŴaGalatia 1

¹Kalata wakutuwa kwaku Paulo, wakutumika pamwenga wakumikika ndi munthu cha, kweni ndi Yesu Kristu, ndi Chiuta Dada, mweniyo wangumyuska ku ŵakufwa.

²Ŵabali wose wo ŵe kunu ŵasangana nane pakumutauzgani imwe mwa ŵamipingu ŵamu Galatia.

³Wezi kwaku imwe ndi chimangu kutuwa kwaku Chiuta Dada, ndi Mbuyafwe Yesu Kristu,

⁴yo wangujipereka pa chifukwa cha vilakwa vidu, mwakuti watitaske ku mgonezi uwu uheni, kwakulingana ndi khumbu laku Chiuta widu, Auskefwe;

⁵kwaku mweniyo kuŵiye unkhankhu muyaya-muyaya. Ameni.

⁶Ndizizwa kuti musamako viyo ruŵi kwaku mweniyo wangumdanani ndi wezi waku Kristu,

⁷ndi kuti murata ku evangeli munyake; ndikweni kuti ngunyake cha: kweni ŵanyake ŵalipo wo ŵatumkweŵeskani, ndipo ŵakhumba kupepetuwa evangeli waku Kristu.

⁸Kweni chingana ndifwe, chingana ndi mungelo kutuwa kuchanya wangatauliya imwe evangeli wakumikana ndi weniwo tingumtauliyani, waŵe wakutembeka!

⁹Uli ndimo takambiya kali, sono naku ndiwerezgapo, Asani yumoza wakutauliyani evangeli wakupambana ndi weniwo munguronde, waŵe wakutembeka!

¹⁰Chifukwa kumbi ndiwoja ŵanthu, pamwenga Chiuta iyo? Pamwenga ndilembe kukondweska ŵanthu? Asani ndale ndakondweskanga ŵanthu, mphanyi kuti ndingawa mteŵeti waku Kristu cha.

¹¹Chifukwa, mwa ŵabali, ndikuziŵiskani kuti evangeli weniwo ungutaulika ndi ine, kuti ngwa munthu cha.

¹²Chifukwa chingana nkhuti ndinguuronde ku munthu cha, chingana nkhuti ndingusambizgika cha, kweni ungundiwiya mu uvumbuzi waku Yesu Kristu.

¹³Chifukwa mwavwa mo ndajariyanga kale mu chisopa cha chi Yuda, mwakuti ukongwa viŵi ndaŵembanga eklesiya lo laku Chiuta, ndipo ndalipopotanga:

¹⁴ndipo mu chi Yuda cho ndarutiriyanga kwakuruska ŵanandi ŵanthanga mu fuku langu, pakuŵa warwana kwakuruska mu miyambu ya ŵaseku.

¹⁵Kweni penipo kungumkondweska Chiuta, mweniyo wangundipatuwa kutuwa ku kawi kangu, ndipo wangundidana mu wezi wake,

¹⁶kuvumbuliya mwangu Mwana wake, alinga kuti ndimtaule iyo mu ŵaMitundu; kuti ndingufumba munthu we yose cha cho nditenere kuchita;

¹⁷chingana nkhuti ndingukwere ku Yerusalemu ku ŵakutumika ŵa paurongo pangu cha: kweni ndinguya ku Arabia; ndipo pavuli ndinguwere so ku Damasko.

¹⁸Pavuli penipo, vinguti vyakapo virimika vitatu, ndingukwere ku Yerusalemu kwachichezga ndi Kefa, ndipo ndinguswa kwake mazuŵa chumi ndi ghankhonde.

¹⁹Kweni munyake wa ŵakutumika ndengavi kumwona, kweni Yakobe pe, mhurwa wa Ambuya.

²⁰Ndipo nge nkhwaku vyo nditukulembiyani, wonani, paurongo paku Chiuta, kuti nditeta cha.

²¹Pavuli pake ndinguza ku vigaŵa vyaku Siriya ndi Kilikia.

²²Kweni kuti ndaziŵikwanga pa chisku cha mipingu ya mu Yuda yaku Kristu cha:

²³ndikweni yavwanga waka kuti, “Yo kale watiŵembanga le ngwakutaula chivwanu cho kali wapopotanga.”

²⁴Ndipo yamkankhuskiyanga Chiuta mwaku ine.