Read gitonga ŴaGalatia 3 Bible Online

ŴaGalatia 3 - gitonga bible

ŴaGalatia 3

¹Mwa ŵaGalatia mwaŵakupusa, njani warowa imwe, pa maso ghaku maŵenimwe Yesu Kristu wakupayikika wataulikiya pakweru?

²Chinichi pe ndikhumba kuziŵapo kwinu, kumbi munguronde Mzimu yo ku milimu ya chilangulu, pamwenga ku kuvwa kwa chivwanu?

³Mupusiyanji viyo na? Mwaŵakwandiya mu Mzimu, kumbi mufiskikiya sono mu liŵavu?

⁴Kumbi mwakunthiyapo vyenivinandi vyo kwaŵaka? Kwakuneneska penga kanthu.

⁵Kumbi mweniyo wakupaskani Mzimu yo, ndi ngwakutataliya mwinu vyanthazi, wachita viyo kutuwa ku milimu ya chilangulu, pamwenga kutuwa mu kuvwa kwa chivwanu?

⁶Uli ndimo “Abrahamu wanguvwaniya mwaku Chiuta, ndipo kungupimikiya iyo ulaka mburunji.”

⁷Viyo na, ziŵani kuti ŵeniwo mbaku chivwanu, iwo nawo mbana ŵaku Abrahamu.

⁸Ndipo lembo lo, pakuwone limu kuti Chiuta kutuwa ku chivwanu warunjiskenge ŵaMitundu, lingutauliya limu evangeli kwaku Abrahamu, lakuti, “Mwaku iwe yikatumbikikanga mitundu yose.”

⁹Ndi viyo wo mbamu chivwanu watumbikika pamoza ndi Abrahamu wachivwanu yo.

¹⁰Chifukwa ŵeniwo wose mbakugomekezge milimu ya chilangulu ŵe pasi pa tembo: chifukwa kwalembeka kuti, “Ngwakutembeka yose yo walive kujaririya mwaku vyose vyo vyalembeka mu buko lo la chilangulu, kuvichita.”

¹¹Kweni kuwoneka kuti ndi langulu palive munthu warunjiskika paurongo paku Chiuta: pakuti, “Murunji yo wakaŵanga wamoyo ndi chivwanu”;

¹²kweni chilangulu cho kuti ncha mu chivwanu cha; kweni, “Mweniyo wavichita, wakaŵiyanga wamoyo mwake.”

¹³Kristu watiwombo ifwe ku tembo la chilangulu cho, pakuŵa wakutembeka pa chifukwa chidu: chifukwa kwalembeka, “Ngwakutembeka yose yo ngwakupayikika pa muti”:

¹⁴alinga kuti pa ŵaMitundu chiŵiyenge mwaku Kristu Yesu chitumbiku cho chaku Abrahamu; viyo kuti mu chivwanu tirondiyenge chipanganu cha Mzimu.

¹⁵Mwa ŵabali, ndikamba uli ndi munthu: chingana phanganu lakukozgeka nda munthu, palive yumoza walikana pamwenga wakuskiyako.

¹⁶Kweni kwaku Abrahamu ghanguneneke mapanganu gho, ndi ku mbeu yake, walive kukamba, “Ndi ku zimbeu,” nge mpha zinandi; kweni nge mpha yimoza “Ndi ku mbeu yako,” yo ndi Kristu.

¹⁷Kweni chenichi ndititi; langulu lakutemeka pavuli pa virimika machumi pe chumi ghanayi ndi machumi ghatatu kuti lipenevya cha phanganu lakukhozgeka kali ndi Chiuta, viyo kuti liwayuwe chipanganu cho.

¹⁸Chifukwa asani chihara cho nchakutuwa ku langulu, kuti ncha ku chipanganu so cha: chifukwa Chiuta wanguchpaska kwawezi kwaku Abrahamu mu chipanganu.

¹⁹Ndavine nanga langulu lo? Linguŵikikapo pa chifukwa cha maubudi, mpaka yingaza mbeu yo, kwaku yeniyo chipaskika chipanganu; ndipo chingurongosoleke ndi ŵangelo mu janja la mwendapakati.

²⁰Kweni mwendapakati kuti ngwa yumoza cha; kweni Chiuta iyo njumoza.

²¹Viyo langulu lo ndakumikana ndi mapanganu ghaku Chiuta kumbi? Kungaŵanga viyo cha! Chifukwa asani lingupaskika langulu lanthazi kwachipaska umoyo, nadidi mphanyi urunji watuwa ku langulu.

²²Kweni lembo lo laŵajariya wose pasi pa ulakwi, alinga kuti chipanganu cho chamu chivwanu mwaku Yesu Kristu chapaskike kwaku wo mbakuvwana.

²³Kweni chenga chindaze chivwanu cho, tasungikanga pasi pa langulu, nge mbamikoli mpaka po chivwanu cho chazanga, chinguvumbulika.

²⁴Ndiviyo langulu lo lenga msambizgi widu mpaka kuza kwaku Kristu, alinga kuti mu chivwanu tirunjiskike.

²⁵Kweni chati chaza chivwanu cho, kuti teche pasi pa msambizgi yo cha.

²⁶Chifukwa mose mwe ŵana ŵaku Chiuta mu chivwanu mwakuKristu Yesu.

²⁷Pakuti mose mwaŵakubatizikiya mwaku Kristu, munguvwa Kristu.

²⁸Mwaku Kristu mulive muYuda chingana ndi muGriki, mulive muŵanda chingana, ndi mwanangwa, mulive munthurumi ndi munthukazi; chifukwa mose mwe yumoza mwaku Kristu Yesu.

²⁹Ndipo asani mwe waku Kristu, po ndipo mwe mbeu yaku Abrahamu, ndi ŵakuhara uli ndi chipanganu.