Read gitonga ŴaGalatia 4 Bible Online

ŴaGalatia 4 - gitonga bible

ŴaGalatia 4

¹Kweni ndiditi kuti mhara yo pa nyengo yose weche mjedu, kuti wapambananako kanthu cha ndi muŵanda, chingana ndi mweneko waku vyose;

²kweni we pasi pa ŵalinda ndi ŵalereze mpaka ku nyengo yo yakutemeka ndi awiske.

³Viyo ifwe nafwe, tenga teche ŵamjedu, tenga ŵaŵanda pasi pa vyamtendeku vyacharu:

⁴kweni yati yaza nyengo yakufiskika, Chiuta wangutuma Mwana wake, wakupapika ndi munthukazi, wakuwiya pasi pa langulu,

⁵alinga kuti wawombo ŵapasi pa langulu, kuti tirondenge ulezi wa ŵana.

⁶Ndipo pakuti mwe ŵana, Chiuta watuma Mzimu wa Mwana wake mu mitima yinu, wakubongo, “Aba, Ada!”

⁷Ndiviyo kuti weche muŵanda so cha, kweni mwana; ndipo asani mwana, mhara so mwaku Chiuta.

⁸Kweni pa nyengo yiya, mwengavi kuziŵa Chiuta, munguŵa ŵaŵanda kwaku wo pa kawi kuti mbachiuta cha.

⁹Kweni sono, pakuziŵa Chiuta, ndi ukongwako pakuziŵikwa ndi Chiuta, muwere uli kuvuli ku vyamtendeku viteta ndi visauchi vyo, kwaku vyenivyo mukhumba kuŵa so ŵaŵanda kachiŵi?

¹⁰Mupatuwa mazuŵa ndi myezi ndi zinyengo ndi virimika.

¹¹Nditope imwe, vinu posepose ndatakatakiya imwe kwaŵaka.

¹²Ndikuŵeyereni, mwa ŵabali, muŵe ulaka ndine, pakuti nane so ndinguŵa uli ndimwe. Kuti mungunangiya ine kanthu cha:

¹³kweni muziŵa kuti chifukwa cha unthomboru wamu liŵavu langu ndingumtauliyani evangeli pakudanga pa:

¹⁴ndipo kesedu ko kamu liŵavu langu ko kangwesa imwe, kuti mungutoza cha, chingana nkhuzira; kweni mungundironde nge ndi mungelo waku Chiuta, uli ndi Kristu Yesu iyo.

¹⁵Viyo kwepani kukankhaŵiya kwinu kuwa? Chifukwa ndikusimikizgiyani kuti, asani kwenga kwamachitika kuti ndizowo maso ghinu, mphanyi mungughapaska kwaku ine!

¹⁶Viyo na, kumbi ndaŵa wamawongo winu pakumuneneskiyani?

¹⁷Ŵanthu ŵenaŵa kuti wakukhumbiyani umampha cha; kweni ŵakhumba kukujariyani kubwaro, viyo kuti mukhumbire iwo.

¹⁸Nadi nkhwakwenere kuti muchitenge chamampha nyengo zose, penipo nde namwe pamoza pe cha.

¹⁹Mwatwana twangu, paku twenito ndilimbiya so mu urwirwi mpaka Kristu wangaumbika mwinu,

²⁰ndakhumbanga kuŵapo namwe sono, ndi kughasanduska mazu ghangu, pakuti ndizizikika namwe.

²¹Ndineniyeni, mwaŵakukhumba kuwa pasi pa chilangulu, asi muvwenge chilangulu cho?

²²Chifukwa kwalembeka, “Kuti Abrahamu wanguŵa ndi ŵana ŵanthurumi ŵaŵi, yumoza ku muŵanda munthukazi yo, ndi yumoza ku munthukazi mwanangwa yo.”

²³Kweni yo wa ku muŵanda-munthukazi wangupapika kwakulingana ndi liŵavu; kweni waku mwanangwa yo wangupapikiya mu chipanganu.

²⁴Vyenivyo vyose vyakambika kwantharika: pakuti ŵanthukazi wo ŵe mapanganu ghaŵi; limoza lakutuwa ku phiri Sinai, lakupapiya ŵana ku uŵanda, lenilo ndi Hagara.

²⁵Chifukwa Sinai lo ndi phiri lamu Arabia, ndipo lilingana ndi Yerusalemu wasono: pakuti iyo we mu uŵanda pamoza ndi ŵana ŵake.

²⁶Kweni Yerusalemu wakuchanya ngwanangwa, ndipo ndiyo nyinafwe.

²⁷Chifukwa kwalembeka, “Kondwa, chumba mzirakupapa iwe; banuka ndi luluta, wambura kulimbiya kupapa iwe: chifukwa mbanandi ŵana ŵa mranda kwakuruska ŵaku yo we ndi munthurumi.”

²⁸Kweni imwe, mwaŵabali, mwe ŵana ŵa chipanganu, kwakulingana ndi Yisaki.

²⁹Kweni nge ndi penipa yo wangupapika kwakulingana ndi liŵavu wangumuŵemba yo wangupapika kwakulingana ndi Mzimu, viyo sono nako.

³⁰Kweni lembo lo lititinji? “Dikamo muŵanda-munthukazi yo ndi mwana wake; chifukwa mwana yo wa muŵanda-munthukazi wangahara cha pamoza ndi mwana yo wa mwanangwa.”

³¹Viyo na, mwaŵabali, kuti teŵanaŵa muŵanda-munthukazi cha, kweni ŵa munthukazi mwanangwa yo.