Read gitonga ŴaGalatia 5 Bible Online

ŴaGalatia 5 - gitonga bible

ŴaGalatia 5

¹Ndi wanangwa Kristu watisanduska ifwe ŵanangwa: viyo ngangamikani, ndipo mungawira so cha mu goŵa la uŵanda.

²Awonani, ine nda Paulo nditumneniyani kuti, asani muchinjika, kuti Kristu wakwanduliyeninge kanthu cha.

³Ndipo ndisimikizgiya so ku munthu yose yo wachinjika, kuti ngwamatewu kuchita chilangulu chose.

⁴Mwagaukako kwaku Kristu mose mwaŵakurunjiskikiya mu chilangulu; mwadezukako ku wezi.

⁵Chifukwa ifwe mu Mzimu tilindizgiya mu chivwanu chigomekezgu cha urunji.

⁶Chifukwa mwaku Kristu Yesu chingana ndi mchinju kuti ngwakovya kanthu cha, chingana nkhuwura mchinju; kweni chivwanu chakutataliya mu chanju.

⁷Mwachimbiyanga umampha; wangumumikani njani, kuti mureke kuvwiya uneneska wo?

⁸Kachichizgidu yaka kengavi kutuliya kwaku yo watumdanani.

⁹Mtupu umanavi utupiska burunga lose.

¹⁰Ine ndakopeka mwinu mu Mbuya kuti mupimenge chinyake so cha: kweni yo wakuyuzgani wavwiyengepo chisusa chake, chingana ndi yani.

¹¹Kweni ine, mwaŵabali, asani ine ndeche kutaula mchinju, chifukwa chine ndeche kuŵembeka? Iku chiguŵisku cha mphinjika chawayuka.

¹²Mphanyi kuti wo ŵati kutimbanizgani ŵangajitemuwako ndipo.

¹³Chifukwa imwe, mwabali, mungudanikiya ku wanangwa; kweni mungasanduska wanangwa winu chitendeku cha liŵavu cha, kweni mu chanju teŵeteranani.

¹⁴Chifukwa chilangulu chose chafiskikiya mu mazu ghamoza, mwaku ghenigho; “Wajenge munyako uli ndi wamweni.”

¹⁵Kweni asani murumana ndi muturghan, cheŵani vinu mungamarizgana.

¹⁶Kweni ndititi, endeyani mu Mzimu, ndipo kuti mufiskenge khumbo la liŵavu cha.

¹⁷Chifukwa liŵavu lilakalakiya pa mzimu, ndi Mzimu pa liŵavu; pakuti vipindikana vyenivyo, viyo kuti vyenivyo mungakhumba, ndivyo kuti mungachita cha.

¹⁸Kweni asani murongozgeka ndi Mzimu, kuti mwe pasi pa chilangulu cha.

¹⁹Ndipo milimu ya liŵavu njakuwoneka, yeniyo mbureŵi,

²⁰wiyu, masomaso, chisopangoza, ufwiti, mawongu, zindeu, zisanji, vikwiya, matukutuku,

²¹zimbembi, mapambuku, viŵinu, mauloŵevu, vindimba, ndi vyakulingana navyo: kuchiri kwaku vyenivyo ndikuchenjezgiyani limu, nge ndimo ndingumuneniyani kali, kuti wakuchita vyaviyo kuti waherenge ufumu waku Chiuta cha.

²²Kweni chipasi cha Mzimu nchanju, chimwemwe, chimangu, chilekerezga, ulemu, umampha, ukongorekwa,

²³upovu, kujitintha; dangu lakukanizga vyaviyo palive.

²⁴Ndipo ŵeniwo mbaku Kristu Yesu ŵapayika nyama pamoza ndi maulakalaka ndi malikhumbira ghake.

²⁵Asani tijariya umoyo ndi Mzimu, ndi Mzimu so tendeyenge.

²⁶Tingaŵangaŵabereŵeza cha, ŵakusosomorana cha, ŵakuŵiniwana cha.