Read gitonga ŴaGalatia 6 Bible Online

ŴaGalatia 6 - gitonga bible

ŴaGalatia 6

¹Mwaŵabali, asani munthu wakoreka mu ubudi wakuti e, imwe mwa ŵamzimu munyoroskeni waviyo mu mzimu wa upovu, pakujithoŵa wamweni, vinu nawe so ungeseka.

²Nyamuliranani mphingu za ŵanyinu, ndipo viyo fiskani dangu lo laku Kristu.

³Chifukwa asani yumoza wajipima kuwa kanthu, pakuŵa kanthu cha, wajifuvya.

⁴Kweni munthu yose wese mlimu waku yija, po ndipo waŵenge ndi chitumbwa mwaku yija pe, ndipo mu munyake cha.

⁵Chifukwa munthu yose wanyamuwenge mphingu yapa mtima wake.

⁶Kweni yo ngwakusambizgika mazu wasanganenge ndi wakusambizga yo mu vyamampha vyose.

⁷Mungarandizgika cha; kuti Chiuta wanyumbika cha: chifukwa chenicho munthu wangamija, chenicho nacho wakavunanga.

⁸Pakuti wakumijiya ku liŵavu lake, ku liŵavu lo wakavunanga chivuzi; kweni yo ngwakumijiya ku Mzimu, ku Mzimu yo wakavunanga umoyo wamuyaya.

⁹Ndipo tingavuka cha pakuchita cho nchamampha: chifukwa pa nyengo yake yiyo tikavunanga, pakureka kuropwa.

¹⁰Viyo na, mo titiri ndi nyengo, tichitiyenge kwaku wose cho nchamampha, ukongwa kuŵa nambumba ŵa chivwanu.

¹¹Awonani, ndakulembiyani ndi malembo gheni ghakuru ndi janja langu.

¹²Wo wose ŵakhumba kuwoneka umampha mu nyama, ndiwo ŵakukakamizgani kuchinjika; kweni mwakuti ŵareke kuŵembeka chifukwa cha mphinjika yaku Kristu.

¹³Chifukwa chingana mbakuchinjika yiwo kuti ŵasunga cha chilangulu; kweni ŵakhumba imwe kuchinjika, alinga kuti ŵatumbwiyenge mu liŵavu linu.

¹⁴Kweni kungandiwiya ine chakutumbwa, kweni mu mphinjika yo ya Ambuyafwe Yesu Kristu, mwaku yo charu chapayikikiya kwaku ine, ndi ine ku charu.

¹⁵Chifukwa chingana ndi mchinju kuti nkhanthu cha, chingana nkhuwura-mchinju, kweni chilengeka chifya.

¹⁶Ndipo paku wose wo ŵamkwende mu karusu kenaka, chimangu chiŵiye paku wo, ndi lisungu, ndi paku Yisraele yo waku Chiuta.

¹⁷Kutuwa ku sono wareke munthu kundijarizga: chifukwa ine ndipinga mu liŵavu langu simbu zaku Yesu.

¹⁸Wezi wo wa Ambuyafwe Yesu Kristu uŵe ndi mzimu winu, mwaŵabali. Ameni.