Read gitonga ŴaEfeso 3 Bible Online

ŴaEfeso 3 - gitonga bible

ŴaEfeso 3

¹Chifukwa chenichi ine nda Paulo, wamagoŵa waku Kristu Yesu pa chifukwa chaku imwe mwa ŵamitundu,

²asani mwavwa ndi uteŵeti wa wezi waku Chiuta wo ungupaskika kwaku ine kuchiri kwinu;

³nge ndimo mu uvumbuzi ghanguvumbulikiya ine mangari gho, uli ndipo ndingulembe kali ghawida,

⁴mwakuti, muchiŵerenga mungaziŵa kuteska kuwamu kwangu mu mangari ghaku Kristu;

⁵ghenigho mu migonezi yinyake ghengavi kuziŵikwa ku ŵana ŵa ŵanthu, uli ndimo sono ghavumbulikiya ndi Mzimu ku ŵakutumika ŵake ŵakupaturika ndi ŵamchimi;

⁶pakuti ŵaMitundu ŵaŵa ŵakuhara nafwe, ndi ŵa liŵavu limoza pamoza nafwe, ndi ŵasangazi-ŵanase ŵa chipanganu mwaku Kristu Yesu mu evangeli.

⁷Waku wo ndinguchitika mteŵeti, kwakulingana ndi mpasku wa wezi wo waku Chiuta, weniwo ungupaskika kwaku ine uli nkhachitidu ka nthazi yake.

⁸Kwaku ine mumanako ku ŵamana limu waku wode ŵakupaturika, ungupaskika wezi wenuwu, kuŵatauliya ŵaMitundu usambasi wambura mapenjeka wo waku Kristu;

⁹ndi kuŵangweruskiya wose mo uliri uteŵeti wa mangari ghenigho kutuwa ku muyaya ghabisika mwaku Chiuta Mlengi wa vinthu vyose;

¹⁰mwakuti sono zeru ya mtundumtundu yaku Chiuta yiziŵikwiye mu eklesiya ku miwusu ndi mitufu yo ye mu malo ghakuchanya;

¹¹kwakulingana ndi chitema[1] cha muyaya, chenicho wanguchitiya mwaku Kristu Yesu Ambuyafwe,

¹²mwaku mweniyo te ndi chiganga ndi chiŵandiku mu chigomekezgu chamuchivwanu mwaku iyo.

¹³Viyo na, ndiŵeyere imwe kuropwa cha mu mtima pa visuzgu vyangu vyapa chifukwa chinu, vyenivyo mbunkhankhu winu.

¹⁴Chifukwa chenichi ndijikamiya makongonu ghangu ku Dada,

¹⁵kutuwa kwaku mweniyo ŵanambumba wose kuchanya ndi panupasi ŵadanika zina, kuti wapaske imwe;

¹⁶kwakulingana ndi usambasi wa unkhankhu wake, kukhomeskeka ndi nthazi mu Mzimu wake mu munthu wamukati:

¹⁷kuti Kristu wajariye ndi chivwanu mu mitima yinu; alinga kuti, pakumererwa ndi kupandika mu chanju,

¹⁸mukhome kujikole pamoza ndi ŵakupaturika wose cho mbusani, ndi utali, ndi mtota, ndi wima,

¹⁹ndikuziŵiska chanju cho chaku Kristu chakuzungura mziŵiru, alinga kuti muzazikiye ku uzali wose waku Chiuta.

²⁰Sono kwaku mweniyo ngwanthazi kwachichita ukongwa limu kwakuruska vyose vyenivyo tipempha chingana nkhupima, kwakuyana ndi nthazi yo yakutataliya mwidu,

²¹kwaku iyo kuŵiye unkhankhu wo mu eklesiya ndi mwaku Kristu Yesu ku migonezi yose ya muyaya-muyaya. Ameni.