Read gitonga ŴaEfeso 5 Bible Online

ŴaEfeso 5 - gitonga bible

ŴaEfeso 5

¹Viyo muŵe ŵakumwezga Chiuta, uli mbana ŵakwanjiwa;

²ndipo yendani mu chanju, nge ndimo Kristu nayo wangumwanjiyani, ndi wangujipereka chifukwa chinu mpasku wachema chamampha ndi sembe kwaku Chiuta.

³Kweni kungazumbulika mwinu cha chingana mbureŵi, chingana mbukazuzi wose, chingana nchiŵinu, uli nkhwakwenere ŵakupaturika;

⁴chingana ndi lilengu, chingana mbubepi, chingana ndi mphekulu yiheni, vyenivyo vyambura kuyamo; kweni ukongwa kuwonga.

⁵Chifukwa namwe muziŵiska chenichi, kuti chingana ndi mureŵi yose, chingana ngwawiyu, chingana ngwachiŵinu, yo ndi msopangoza, walive chihara mu ufumu waku Kristu ndi Chiuta.

⁶Wangamfuvyani cha munthu yumoza ndi mazu ghaŵaka: pakuti chifukwa chaku vyenivi katuziya kandundu kaku Chiuta pa ŵana ŵa mtafu.

⁷Viyo mungaŵanga ŵakusangana nawo cha;

⁸chifukwa kali mwenga mu mdima, kweni sono mwe kungweruka mu Mbuya: yendani ulaka mbana ŵa kungweruka

⁹(chifukwa chipasi cha kungweruka ko nchamu umampha wose ndi urunji ndi uneneska),

¹⁰ŵakwesa cho nchamarumbika ku Ambuya;

¹¹ndipo mungasangana ndi nchitu zambura vipasi za mdima, kweni viŵiviŵi muzisuske nadi;

¹²chifukwa nkhwalilengu chingana nkhukamba vyenivyo vichitika nawo mu ubisibisi.

¹³Kweni vyose vyakususkika virongoleka ndi kungwerukako, pakuti chose chakurongoleka chisanduka kungweruka.

¹⁴Viyo watiti, “Yuka iwe, wakura tulo, ndipo yukanga ku ŵakufwa, ndi wakuwaliyenge Kristu.”

¹⁵Viyo na, lereskani kaunthu po mutende, nge mbambura zeru cha, kweni nge mbazeru,

¹⁶ŵakujiwombole nyengo, pakuti ngaheni mazuŵa gho.

¹⁷Chifukwa chenichi mungaŵanga ŵakupusa cha, kweni ŵakuchiteska cho ndi khumbu la Ambuya.

¹⁸Ndipo mungaloŵenga ndi vinyo cha, mwaku yo mwe utayisi kweni muzazike ndi Mzimu;

¹⁹ndi kukambirana mu buku la Sumu,[2] ndi mu sumu, ndi mu sumu zamzimu, pakumbiya ndi ghankhoŵera mu mtima winu ku Ambuya,

²⁰pakuwonge so nyengo zose Chiuta ndi Dada pa chifukwa chaku vyose mu zina la Ambuyafwe Yesu Kristu.

²¹Ndi pakujithereskiyana mu wofi waku Kristu.

²²Mwaŵanthukazi mwe, jithereskiyeni ku ŵarumi ŵaku mwija, nge nkhu Ambuya.

²³Pakuti munthurumi ndi mutu wa muwoli wake, uli ndimo Kristu nayo ndi mutu wa eklesiya, pakuŵa mweneko mtaski wa liŵavu lo.

²⁴Kweni uli ndimo eklesiya lo lijithereske kwaku Kristu, viyo so ŵanthukazi nawo ku ŵarumi ŵawo mu chinthu chose.

²⁵Mwamadoda mwe, yanjani ŵawoli ŵinu, uli ndimo Kristu nayo wangwanjiya eklesiya lo, ndipo wangujipereka pa chifwa chake;

²⁶alinga kuti walipatuliske, wati walitozge mu chibatizo ndi mazu,

²⁷alinga kuti wajijarikiye nge ndi muwoli wa eklesiya lo launkhankhu, lakuŵavi donthu pamwenga nkhwinya pamwenga kanthu kaviyo, kweni kuti liŵe lakupaturika ndi lambura kalema.

²⁸Viyo nako ŵanthurumi ŵatenere kuŵanja ŵawoli ŵawo nge ndi maliŵavu ghaku ŵija.

²⁹Wakwanja muwoli wake ngwakujanja: chifukwa palive munthu wangatinkha kose liŵavu laku yija; kweni walilera ndi walipakata, uli ndimo Kristu nayo wachitiya eklesiya lo;

³⁰pakuti te viŵaru vya liŵavu lake.

³¹“Chifukwa chenichi munthu wakalekanga wiske ndinyina, ndipo wamiziriyanenge ndi muwoli wake; ndipo wo ŵaŵi ŵaŵenge liŵavu limoza.”

³²Ungari uwu ngukuru: kweni ine ndikamba Kristu ndi eklesiya lo.

³³Kweni imwe namwe, yumoza ndi yumoza, yose wamwanjenge viyo muwoli wake waku yija nge ndi yija; ndipo muwoli wope murumi wake.