Read gitonga ŴaEfeso 6 Bible Online

ŴaEfeso 6 - gitonga bible

ŴaEfeso 6

¹Mwaŵana, vwiyani ŵapapi ŵinu muMbuya: chifukwa chenichi nchakurunjika.

²“Tumbika ausu ndi anyoko” (lenilo ndi dangu lakudanga lo le ndi phanganu),

³“alinga kuti kuŵiyenge iwe umampha, ndipo kuti ujaririyenge nyengo yitali pa chara.”

⁴Ndipo mwaŵauskeu, mungakaralizga ŵana ŵinu cha, kweni muŵalere mu kulanga ndi kuchichizga kwa Mbuya.

⁵Mwaŵaŵanda mwe, vwiyani wo mbambuyamwe kuchiri ku liŵavu, ndi chopu ndi chitenthe, mu wanangwa wa mtima, uli nkhwaku Kristu;

⁶kwakutataliya jiso cha, nge mbakukondweska ŵanthu, kweni nge mbateŵeti ŵaku Kristu, ŵakuchita khumbu laku Chiuta mu mtima;

⁷ŵakuteŵeta ndi ulemu nge nkhu Ambuya, ndi ku ŵanthu cha:

⁸pakuziŵa kuti chose chamampha chenicho munthu ndi munthu wangachita, chenicho wamronde so ku Ambuya, chingana ndi muŵanda, chingana ndi mwanangwa.

⁹Ndipo, mwaŵambuya mwe, chitiyani iwo vyenivyo pe, kwambura lifingafinga, pakuziŵa kuti Ambuya, ŵawo ndi ŵinu, ŵe kuchanya, ndipo kuti kwaku iwo urumba-chisku kulive.

¹⁰Pakumariya, muŵe ŵanthazi mu Mbuya, ndi mu likongono la ukhomi wake.

¹¹Jiphatiyeni vidya vyose vyaku Chiuta, kuti muŵe ŵanthazi imwe kumikirana ndi mauthyanithyani gha diabolo yo.

¹²Pakuti limbanu lidu kuti le ku ŵanthu cha, kweni ndi maufumu, ndi mitufu, ndi ŵakuwusa charu ŵa mdima wamakono, ndi vya mzimu vya uheni mu vyakuchanya.

¹³Chifukwa chenichi mujitole vidya vyose vyaku Chiuta, alinga kuti mungaziŵa kumikirana navyo mu zuŵa lo liheni, ndipo, mwati mwachita vyose, kuma chi.

¹⁴Viyo mani, pakujichinyiriya mu chiunu ndi uneneska, ndi kuvwara chapachifuŵa cha urunji,

¹⁵kujimangiya ku marwayo ghinu dongosoru la evangeli wa chimangu;

¹⁶pachanya paku vyose mujitole nguru ya chivwanu, ndi yeniyo muziŵa kuzimwa mivwi yose yakukole ya muheni yo.

¹⁷Ndipo jitoleni chivekeru chaku mutu cho mbutaski, ndi so lipanga la Mzimu, lenilo ndi mazu ghaku Chiuta.

¹⁸Mu kuromba ndi kuninizika murombiyenge nyengo zose mu Mzimu, ndi kucherezga kwakufwiririyapo limu kuninizikiya pa chifukwa chakuwose ŵakupaturika,

¹⁹ndi pa chifukwa chaku ine, kuti kwaku ine ghapaskike mazu kubanuwa mlomo wangu, kuvumbuwa ndi chiganga mangari gha evangeli,

²⁰pa chifukwa chaku wo ine nde thenga mu mkoŵa; alinga kuti ndimemeze evangeli pakweru nge ndi mo nditenere kukambiya.

²¹Kweni kuti muziŵe namwe vyakuchiri kwangu, mo ndiriri, wamziŵiskeninge vyose Tukhiko, mbali yo wakwanjiwa ndi mteŵeti wamagomekezgeka mu Mbuya.

²²Mweniyo ndamutuma kwinu pa chifukwa chenichi chakuti muziŵe vyapaku ifwe, ndi kuti wachinthiske mitima yinu.

²³Chimangu chiŵaŵiye ŵabali, ndi chanju pamoza ndi chivwanu, kutuwa kwaku Chiuta Dada ndi Mbuya Yesu Kristu.

²⁴Wezi uŵiye wose ŵakuŵanja Ambuyafwe Yesu Kristu mu chanju chambura kumara.