Read gitonga ŴaFilipi 2 Bible Online

ŴaFilipi 2 - gitonga bible

ŴaFilipi 2

¹Viyo asani mwe masangu ghakuti mwaku Kristu, asani mwe sangarusku lakuti la chanju, asani mwe wanase wakuti wa Mzimu, asani mwe vyachitima vyakuti ndi vyalisungu.

²Fiskani chimwemwe changu, chakuti mughanaghane chimoza, pakuŵa ndi chanju chakulingana, ŵa mtima umoza, ŵakurunguruka chimoza.

³Kuchita kanthu kose kwandeu cha, pamwenga kwathamu laŵaka cha, kweni kwakujiyuyuwa mu mtima; mose mupime ŵanyinu kuŵa ŵakuruska imwe.

⁴Munthu yose kuphwere vinthu vyaku yija cha, kweni vya ŵanyake navyo.

⁵Kaghanaghanidu ko kenga mwaku Kristu Yesu, kaŵe mwinu,

⁶mweniyo pakuŵa mu muŵiru waku Chiuta, wengavi kulipima yanu lake ndi Chiuta kanthu kakuphangika,

⁷kweni wangujikhutuwa, wakujitole muŵiru wa mu ŵanda, ndi pakuŵa mu chikozgu cha ŵanthu;

⁸ndipo wati wasanirika mu kawonekedu ka munthu, wangujiyuyuwa, pakuŵa wakuvwiya mpaka ku nyifwa, nyifwa nayo yapa mphinjika.

⁹Chifukwa chenicho so Chiuta wamtumphuskiya pachanya limu, ndipo wampaska kwawanangwa zina lapachanya pa zina le lose;

¹⁰kuti mu zina laku Yesu gongonu lose ligwadiyenge, la ŵakuchanya, ndi la ŵapa charu, ndi la ŵakusi kwa charu,

¹¹ndipo kuti lilime lose lizomerezge kuti Yesu Kristu ndi Mbuya, ku unkhankhu waku Chiuta Dada.

¹²Viyo na, mwaŵakwanjiwa ŵangu, uli ndimo nyengo zose mwavwiyanga ndi penipo ndinguŵako kwinu pe cha kweni ukongwa limu sono pa kuŵako kwangu kunyake, takatakiyani utaski waku mwaŵeni mu wofi ndi chitenthe;

¹³chifukwa ndi Chiuta yo watakataka mwinu pose paŵi pa kukhumba ndi pa kuchita, chifukwa cha likondwa lake lamampha.

¹⁴Chitani vinthu vyose kwambura madinginiku ndi masuskanu,

¹⁵alinga kuti muŵe ŵambura masumulika ndi ŵazizimu, ŵana ŵaku Chiuta ŵambura kalema mukati mu mgonezi wakunyongoroka ndi wakupuruska, mwaku wo muwoneka ulaka ndi vyenje me charu,

¹⁶pakughafumbatiya mazu gha umoyo mwakuti mphanyi ine ndinguzachijikuzga pa zuŵa laku Kristu, pakuziŵa kuti ndengavi kuchimbiya ŵaka chingana nkhutakataka kwa ŵaka.

¹⁷Ndikweni, nanga ndipungulikiya pa chisopu ndi uteŵeti ukhovu wa chivwanu chinu, ndikondwa, ndipo ndikondwere ndi imwe mose.

¹⁸Ndipo kwakulinganalingana imwe namwe so kondwani, ndi kondwerani pamoza nane.

¹⁹Kweni ndigomekezga mu Mbuya Yesu kumtumiyani ruŵi Timote, alinga ine nane ndisangaruke pakuzachiziŵa vya paku imwe.

²⁰Chifukwa ndirive yumoza wakuyana nayo, yo wangaphwere kaunthu vya paku imwe.

²¹Pakuti wose ŵalembe vyaku ŵija, vyaku Yesu Kristu cha.

²²Kweni umampha Timote muzi ŵa, mo nge ndi mwana ndi wiske, wateŵete pamoza nane mu kutaula uthenga wamampha.

²³Viyo ndigomezga kumtuma sosono kweni mo ndiwoniyenge vinthu vikandiŵiyanga.

²⁴Kweni ndigomekezga mu Mbuya kuti nane so ndamweni nkhazanga ruŵi.

²⁵Kweni nge nkhu mbali yo Epafroditu, mteŵati munyangu ndi wakhondo-munyangu, nthumi yinu ndi mteŵeti waku ukavu wangu, ndingupima kuti nchakwenere kumutuma kwinu;

²⁶pakuti waŵa wakumunwekani mose, ndipo wasuzgika ukongwa, chifukwa munguvwa kuti watama.

²⁷Inya watamanga nadi, pafupi nyifwa: kweni Chiuta wamuchitiya lisungu, ndipo iyo pe so cha, kweni ine nane so, alinga kuti ndireke kuŵa ndi chisungu pachanya pa chisungu.

²⁸Viyo ndatinthimika ukongwa kumtuma, mwakuti pakumuwona so mukondwe, ndikuti ine nane chisungu chimare.

²⁹Viyo mjekuliyeni mu Mbuya ndi chimwemwe chose; ndipo ŵatumbikeni ŵaviyo,

³⁰pakuti chifukwa chamlimu waku Kristu wenga pafupi kufwa, kutaya umoyo wake mwakuti wafiske nchitu yo imwe mwengavi kufiska kwaku ine.