Read gitonga ŴaFilipi 4 Bible Online

ŴaFilipi 4 - gitonga bible

ŴaFilipi 4

¹Viyo, mwa ŵabali ŵangu, ŵakwanjiwa ndi ŵakunwekeka, chimwemwe changu ndi chifuku changu ngangamikani viyo mu Mbuya, mwaŵakwanjiwa.

²Ndichichizga Euodia, ndipo ndichichizga Suntuke, kuti ŵaŵa ŵakuvwanana mu Mbuya.

³Inya, ndiŵeyere iwe nawe, wamagoŵa munyangu mwenimweni, uwovye ŵanthukazi yaŵa, wo wose ŵangulimbalimbiya mu evangeli pamoza nane, pamoza ndi Klemente nayo, ndi ŵakujapo wo ŵanchitu ŵanyangu, ŵeniwo mazina ghawo ghe mu buku la umoyo.

⁴Kondwere ni mu Mbuya nyengo zose; ndikambenge so, Kondwani.

⁵Kuzika kwinu kuziŵikwe ku ŵanthu wose. Ambuya ŵe kufupi.

⁶Mungakweŵeke kose cha; kweni mu kanthu kose, mu rombu ndi mu niniziku pamoza ndi kuwonga, mapemphu ghinu ghaziŵikwe kwaku Chiuta.

⁷Ndipo chimangu cho chaku Chiuta, cho chizungura kuwamo kose, chikalindiyanga mitima yinu ndi vinjeru vinu mwaku Kristu Yesu.

⁸Pakumariya, mwa ŵabali, vyo vyose vyakuneneska, vyo vyose vyavitumbiku, vyo vyose vyakurunjika, vyo vyose vikhovu, vyo vyose vyamanjika, vyo vyose vyamarumbika; asani kwe umampha, wakuti, ndipo asani kwe thamu lakuti, pimani ndi vyenivyo.

⁹Vyo navyo mungusambira ndi munguronde ndi munguvwa vyo munguwona mwaku ine, chitani vyenivyo; ndipo Chiuta yo wa chimangu wakaŵanga namwe.

¹⁰Kweni ndikondwere ukongwa muMbuya, kuti sono ndipo mwawerezga so kwakurutizga kurunguruka vya paku ine; vyenivyo nadi kali munguvirunguruka, kweni mwasoŵanga nyengo yakuchitiya.

¹¹Kuti nchakuti ndikamba usauchi cha: chifukwa ndasambira ine, kukhorwa mwaku vyo ndenavyo.

¹²Ndiziŵa kusauka, ndiziŵa so kusakata: mwaku chose kosekose ndasambizgika kugutiskika ndiso kufwa msara, kufurwa ndi so kusauka.

¹³Ndiziŵa kuchitiya vyose mwaku Kristu mweniyo watindikhomeska.

¹⁴Ndikweni wenga ulemu winu pakusangana nane mu suzgu.

¹⁵Imwe mwa ŵaFilipi mwaŵeni muziŵa umampha kuti penipo ndingutuwako ku Makedonia mu mazuŵa ghakwamba kwangu kumusambizgani evangeli, mwenga imwe pe mpingu wo ungundovya; mwenga imwe pe mungusangana nani vyanduwu vyangu ndi vyakupereŵe vyangu.

¹⁶Pakuti chingana ndi mu Tesalonika kamoza pamwenga kaŵi mungunditumiya vyaku ukavu wangu.

¹⁷Kuti nchakuti ndipenjapo mpasku cha; kweni ndipenja chipasi chakuzariya ku mbiri yinu.

¹⁸Kweni nde navyo vyose, ndipo ndisakata; ndazara, ndati ndaronde kwaku Epafroditu vyakutuliya kwinu, fungu la chema, chisopu chamarondeka, chakumkondweska Chiuta.

¹⁹Ndipo Chiuta wangu wampaskeninga vyose vyo mukavuka uli mbusambasi wake mu unkhankhu mwaku Kristu Yesu.

²⁰Ndipo kwaku Chiuta iyo Auskefwe kuŵiye unkhankhu ku muyaya. Ameni.

²¹Tauzgani wakupaturika yose mwaku Kristu Yesu. Akutauzgani ŵabali ŵa pamoza nane.

²²Ŵakupaturika wose ŵakutauzgani, ukongwa viŵi wo ŵamu nyumba yaku Kaisare.

²³Wezi wa Ambuya Yesu Kristu uŵe ndi mzimu winu.