Read gitonga ŴaKolose 1 Bible Online

ŴaKolose 1 - gitonga bible

ŴaKolose 1

¹Kalata wakutuwa kwaku Paulo, wakutumika waku Kristu Yesu mu khumbo laku Chiuta, ndi Timote mbali widu,

²ku ŵabali ŵakupaturika ndi ŵakuvwana mwaku Kristu, ŵamu Kolose. Wezi kwaku imwe ndi chimangu kwaku Chiuta Auskefwe.

³Tiwonga Chiuta awiske ŵa Mbuyafwe Yesu Kristu, pakurombe imwe nyengo zose,

⁴tati tavwa ndi chivwanu chinu mwaku Kristu Yesu, ndipo ndi chanju cho mwe nacho kwaku wose ŵakupaturika,

⁵chifukwa cha chigomekezgu cho chiŵikikiya imwe kuchanya. Ndipo ichi nchenicho mukuvwa kali mu mazu gha uneneska wa evangeli, wo mukuronda;

⁶uli ndimo mu charu chose ngwakupasiya vipasi ndi kukuliya, viyo so ndimo wachitiya mwaku imwe, kutuwa ku zuŵa lo munguvwiya ndi kuziŵiska wezi waku Chiuta mu uneneska,

⁷uli ndimo so mungusambiriya kwaku Epafra mteŵeti-munyidu wakwanjiwa. Mweniyo ndi mteŵeti wamagomekezgeka waku Kristu pa chifukwa chinu,

⁸mweniyo so watikonkome chanju chinu mu Mzimu.

⁹Chifukwa chenichi ifwe nafwe, kwanda ku zuŵa lo tinguchivwiya, kuti tireka cha kumrombiyani ndi kupempha, kuti muzazike ndi chiziŵisku cha khumbo lake mu zeru ndi chiteska cha mzimu,

¹⁰kuti mwendenge kwakwenere Ambuya, ndi kwakuŵakondweska, pakupasiya chipasi mu mlimu wose wamampha, ndi kukuliya mu chiziŵisku chaku Chiuta.

¹¹Mukhomeskeke mu nthazi yose, kwakulingana ndi nthazi yake ya unkhankhu, ku unkhunthiya wose ndi chilekerezga pamoza ndi chimwemwe;

¹²ndi kumuwonga Dada, mweniyo watenereska kuti tisangane chihara cho cha ŵakupaturika mu ukweru.

¹³Ndiyo wangutitaska ku mtufu wa mdima, ndipo wangutisamiskiya ku ufumu wa mwana wake wakwanjiwa;

¹⁴mwaku mweniyo te nawo uwombozi kuchireke cha vilakwa.

¹⁵Ndiyo chikozgu chaku Chiuta wambura kuwoneka, wakupapika danga wa ulengi wose.

¹⁶Pakuti mwaku iyo vingulengeka vinthu vyose, vya kuchanya ndi vyapa charu, vyakuwoneka ndi vyambura kuwoneka, pamwe vitengu vyaufumu, pamwe maumbuya, pamwe maufumu, pamwe mitufu; vyose vyo vikulengeke mwaku iyo, ndi kwaku iyo.

¹⁷Ndiyo wakudanga pa vinthu vyose, ndipo mwaku iyo vyose vikorana pamoza.

¹⁸Ndiyo mutu wa liŵavu lake, ndilo eklesiya lo; ndiyo chandiru wakupapika danga wakutuwa ku ŵakufwa; alinga kuti mwaku vyose waŵe iyo wakuzungura.

¹⁹Pakuti kungukondweska Dada kuti mwaku iyo ujariye uzali wo wose;

²⁰ndipo kuti mwaku iyo wasopaniskiye vyose kwaku yija, wati wachitiya chimangu mu ndopa za mphinjika yake; ndititi, kwachisopaniskiya mwaku iyo pamwenga vyo vyapa charu, pamwenga vyo vya kuchanya.

²¹Ndipo imwe, mwaŵakuŵa kali ŵakugawukako ndi ŵarwani mu kaghanaghanidu, mu nchitu zinu ziheni,

²²kweni sono wamsopaniskiyani mu liŵavu lake la unthu mu nyifwa, kwachimperekani ŵakhovu ndi ŵambura kalema ndi ŵambura masumulika pa maso pake,

²³asani nadi mujaririya mu chivwanu, ŵakukhazikika ndi ŵakukho, ŵakudezukako cha ku chigomekezgu cha evangeli wo mwavwa, ŵeniwo so ŵataulikiya mu ulengi wose wa pasi pa kuchanya; waku ŵeniwo ine nda Paulo ndaŵiya mteŵeti.

²⁴Sono ndikondwere mu malikomwa ghangu ghapa chifukwa chinu, ndipo mu liŵavu langu ndifiskiyamo vyakupere vya suzgu yaku Kristu pa chifukwa cha liŵavu lake, lenilo ndi eklesiya lo.

²⁵Waku lenilo ndaŵiya mteŵeti, kwakulingana ndi uteŵeti wakupaturika wo ungupaskika kwaku ine pa chifukwa chinu, mwakuti ndifiske kumemeza mazu ghaku Chiuta,

²⁶mangari gho ghakubisika kutuwa ku migonezi ndi zimphapu, kweni sono ghavumbulikiya ku ŵakupaturika ŵake.

²⁷Kwaku ŵeniwo Chiuta wangukhumba kuvumburiya cho mbusambasi wa unkhankhu wa mangari gho mu ŵaMitundu, ghenigho mwaku imwe ndi Kristu, chigomekezgu cha unkhankhu.

²⁸Ndiyo titaula ifwe, taŵakuchenjezga munthu yose ndikusambizga munthu yose muzeru yose, alinga kuti tipereke munthu yose wakufiskika mwaku Kristu.

²⁹Mwaku ichi nditakataka ndawakulimbalimba ndi nthazi yose yo wachitiya mwaku ine.