Read gitonga ŴaKolose 2 Bible Online

ŴaKolose 2 - gitonga bible

ŴaKolose 2

¹Chifukwa ndikhumba muziŵe mlimbalimba weni ukuru wo nde nawo chifukwa chinu, ndi chifukwa chaku wo ŵamu Laodikea, ndi chifukwa chaku wo wose ŵalive kuwona chisku changu,

²alinga kuti yikhwimiskike mitima yawo, pakumangana pamoza mu chanju, ndi mu usambasi wose wakuzala wa mziŵiru, kuti ŵaziŵe mangari ghaku Chiuta, ghaku Kristu,

³mwaku mweniyo mwe mbiku zose zakubisika za zeru ndi mziŵiru.

⁴Ndikamba chenichi, wangamrandizgani cha munthu yumoza ndi mazu ghakuwoja ŵaka.

⁵Chifukwa nanga nde kunyake muliŵavu, ndikweni mu mzimu nde namwe pamoza, ndipo ndikondwa kuthoŵa umoyo winu wamampha ndi kukhoma kwa chivwanu chinu mwaku Kristu.

⁶Viyo uli ndimo mungurondere Kristu Yesu Ambuya, ndimo mujariyenge mwaku iyo,

⁷pakumererwa ndi kuzengeka mwake, ndi kukhozgeka mu chivwanu, uli ndimo mwasambizgikiya, ndi kufurwiya mu chiwonga.

⁸Thoŵani vinu munthu wangamuskowani mu zeru ndi fuzi yaŵakaŵaka, uli ndi mdauku wa ŵanthu, uli ndi vyamtendeku vya mizimu ya charu, ndipo uli nkhwakuyana ndi Kristu cha.

⁹Pakuti mwaku iyo ndimo mwe uzali wose wauchiuta muliŵavu,

¹⁰ndipo mwe ŵakuzazika mwaku iyo, mweniyo ndi mutu wa ufumu wose ndimtufu.

¹¹Mwaku mweniyo so mwachinjikiya ndi muchinju wakuchitika ndi manja cha, pa kuzuwa liŵavu la nyama, mu mchinju wo waku Kristu;

¹²mwati mwaŵikikiya pamoza nayo mu ubatizo, mwenimo so munguyuskikiya pamoza nayo mu chivwanu chamu kachitiru kaku Chiuta, mweniyo wangumuyuska ku ŵakufwa.

¹³Ndipo imwe, mwaŵakufwa mu mamphuru ndi uura muchinju wa liŵavu linu, wangumuchitiyani imwe ŵamoyo pamoza nayo, pakutireke mamphuru ghidu ghose;

¹⁴wati wasisita chikoli cho paku ifwe chakurembeka mu langulu, cho chingupindikana nafwe: chenicho so watuzgamo mukati mwidu, pakuchikhoma ku mphinjika yake;

¹⁵wati wabwanganduwa maufumu ndi mitufu, wanguvirongole pakweru, pakuvipundiya mwaku iyo mweneko.

¹⁶Viyo wareke munthu kumweruzgiyani kuchiri ku kurgha, pamwenga kukumwa, pamwenga ku dghera, pamwenga ku mwezi ufya, pamwenga ku masabata.

¹⁷Ivi vyose nchizgezge chaku vyo vitenere kuza; kweni mweneko waku ivi ndi Kristu,

¹⁸mureke kususkika mu uja winu ndi ŵanthu wo ŵatenda mukujinanga maumoyo ghawo ndimu chisopa cha ŵangelo, wo ŵakujimiskiya pa viwona vyawo, ndi kujithamiya bweka ndi chinjeru chawo chanyama,

¹⁹ŵambura kukoreska pa Mutu wo, pakuti kutuwa ku Mutu wo liŵavu ndi viŵaru vyose pakumangika pamoza vironde kovyeka kwawo, viyo pakurangizgika pamoza vikuwa kwakulingana ndi khumbo laku Chiuta.

²⁰Mungufwiya pamoza ndi Kristu, viyo nthazi ya charu yirivi mtufu paku imwe. Chifukwa nchine nanga mweche kuja nge mwe ŵa charu? Mweche kujithereska ku marangu nge ngakuti:

²¹“Ungakonga chenicho cha, Ungalaŵanga ichi cha, Ungakwaskanga chiya cha!”

²²Vinthu vyenivi vimara pa titakataka navyo; vinthu ivi ndi visambizgu ndi marangu gha ŵanthu.

²³Marangu yagha ghawoneka nge ngatuwa ku vinjeru mu nthowa yo wachichizgiya ŵanthu kujipereka ndi kujiyuyuwa mu kuphwere liŵavu weniukongwa, kweni kuti vitovya cha pakurunjiska makhumbu gha liŵavu.