Read gitonga ŴaKolose 3 Bible Online

ŴaKolose 3 - gitonga bible

ŴaKolose 3

¹Viyo asani mwayuskika pamoza ndi Kristu, lembeni vya kuchanya, kweniko kwe Kristu, wakujariya ku janja lamarghe laku Chiuta.

²Ghanaghaniyani vya kuchanya, vyapanupasi cha.

³Chifukwa mungufwa, ndipo umoyo winu wabisikiya pamoza ndi Kristu mwaku Chiuta.

⁴Penipo Kristu, yo mbumoyo widu, wamuwoneka, penipo ndipo imwe namwe mwamuwoneka pamoza nayo mu unkhankhu.

⁵Viyo fwiskani viŵaru vinu vya panupasi; ureŵi, wiyu, ulakalaka, likhumbira liheni, ndi bina, lenilo nkhusopa ngoza;

⁶chifukwa chaku vyenivyo katuza kandundu kaku Chiuta pa ŵana ŵa mtafu,

⁷mwaku vyenivyo imwe namwe mwendangamo kali, pakuŵa ndi umoyo wa mwaku vyo.

⁸Kweni sono, vipateni ivi vyose; kandundu chikwiya, mwendanato ndi utokose wakutuwa mu mlomo winu.

⁹Mungateterananga cha; pakuti mwazuwa munthu wakali pamoza ndi machitidu ghake,

¹⁰ndipo mwavwara munthu mufya, mweniyo wazgoka mufya uli nchikozgu chaku yo wangumlenga ndi kukuliya mu kumuziŵa Chiuta.

¹¹Kweniko kuti kukaŵanga muGriki ndi muYuda cha, muchinju ndi wakuura-muchinju, muheriheri, muSkutia, muŵanda, mwanangwa: kweni Kristu ndiyo ndi vyose mwaku vyose.

¹²Viyo vwarani, uli mbakusankhika ŵaku Chiuta, ŵakupaturika ndiŵakwanjiwa, chitima cha lisungu, ulemu, kujiyuyuwa, upovu, chilekerezga;

¹³muŵe ŵakukunthiriyana ndi ŵakurekiyana, yumoza ndi munyake; asani munthu wangaŵa ndi kafukwa pa munyake uli ndimo Ambuya agowoke imwe, namwe so muchite viyo.

¹⁴Ndipo pachanya paku vyose ivi vwarani chanju, chenicho chimanga pamoza vyose mu wanasi wakufikapo.

¹⁵Ndipo chimangu chaku Kristu chiuse mu mitima yinu, kwaku chenicho so mungudanikiya mu liŵavu limoza; ndipo muŵe ŵakuwonga.

¹⁶Mazu ghaku Kristu ghaje mwinu kwakusambasa, pa kusambizgana ndi kuchinyirana mu zeru yose, ndi penipo mutumba mu buku la sumu ndi mu sumu ndi sumu zamzimu, kumuwonga Chiuta mu mitima yinu.

¹⁷Ndipo chose cho mungachita, mu mazu pamwenga mu nchitu, chitiyani vyose mu zina la Mbuya Yesu, ndipo muwongeni Chiuta Dada mwaku iyo.

¹⁸Mwa ŵawoli mujithereske ku ŵarumi ŵinu, pakuti ichi nchakwenere mu Mbuya.

¹⁹Mwa ŵanthurumi, mwanjenge ŵawoli ŵinu, ndipo mungaŵakaripiyanga cha.

²⁰Mwaŵana vwiyani ŵapapi ŵinu mwaku vyose, chifukwa ichi nchakukondweska Ambuya.

²¹Mwaŵauskeu, mungachenyanga ŵana ŵinu cha, vinu ŵangagongowa mtima.

²²Mwaŵaŵanda, mwaku vyose vwiyani ambuyamwe ŵamu charu; mu kutakataka kwapa maso pe nge mbabukondweska ŵanthu cha kweni mu wanangwa wamtima, pakumopa Mbuya.

²³Chose cho mungachita, chitani nge mbakutakatakiya Ambuya ŵanthu cha,

²⁴pakuziŵa kuti ku Mbuya mwamuronde mphoto yinu ya chihara cho: muteŵete Ambuya Kristu.

²⁵Chifukwa wakwananga wamuronde so kwananga kwake: ndipo kuti kwe kurumba chisku cha.