Read gitonga ŴaKolose 4 Bible Online

ŴaKolose 4 - gitonga bible

ŴaKolose 4

¹Mwaŵambuyau, cho nchakurunjika ndi chakuyamu ŵachitiyeni ŵaŵanda ŵinu, pakuziŵa kuti imwe namwe mwe nayo Mbuya kuchanya.

²Fwiririyani mu kuromba, ndipo mucherezge mwenimo ndi kuwonga.

³Mutirombe ifwe nafwe, mwa kuti Chiuta watijuriye khomo la mazu gho, kukamba vyakubisika vya mu mazu ghaku Kristu, chifukwa chaku ghenigho nde mukumangika,

⁴alinga kuti ndighavumbuwe mo nditenere kughakambiya.

⁵Mwendenge mu zeru kuchiri ku ŵakubwaro, fiskani kwakulingana ndi mwaŵi wo ulipo.

⁶Mazu ghinu ghaŵe ghawezi nyengo zose, ghakunoweskeka ndi mche, kuti muziŵe mo kutenere imwe kumwamukiya munthu yose, yumoza ndi yumoza.

⁷Vyose vya paku ine wamkukuziŵiskani Tukhiko, mbali wakwanjiwa ndi mteŵeti wamagomekezgeka, ndi muŵanda-munyangu mu Mbuya.

⁸Mweniyo ndamutuma kwinu chifukwa chaku chenichi, chakuti muziŵe vya paku ifwe, ndipo kuti wachinthiske mitima yinu;

⁹pamoza ndi Onesimo, mbali wamagomekezgeka ndi wakwanjiwa, yo njumoza namwe. Wakakuziŵiskaninga vyose vyo vye kuno.

¹⁰Aristarko, wamkoli-munyangu, wakutauzgani, ndi Marko, msiŵani waku Barnaba (paku mweniyo munguronde malangulu; asani watuza ko mrondiyeni),

¹¹ndi Yesu, wakuzumbulika Yusto. Yaŵa pe ŵija ndiwo mba muchinju mukati mu ŵanchitu ŵanyangu mu ufumu waku Chiuta, wo wose ŵandiŵiya sangarusku.

¹²Wakutauzgani Epafra, yumoza namwe, muŵanda waku Kristu Yesu, wakurimbarimba mu marombu ghake nyengo zose chifukwa chaku imwe, kuti muŵe ŵakufiskika ndi ŵakukhozgeka mu khumbo lose laku Chiuta.

¹³Chifukwa nditimusimikizgiya kuti ngwakufukafuka limu chifukwa chakuimwe, ndi chifukwa chaku wo ŵamu Laodikea, ndi ŵamu Hierapoli.

¹⁴Wakutauzgani Luka, ng'anga yo yakwanjiwa, ndi Demase.

¹⁵Ŵatauzgeni ŵabali ŵamu Laodikea, ndi Numpha, ndi mpingu wakuungana pa nyumba yake.

¹⁶Ndipo asani kalata uyu waŵerengeka mwaku imwe, panikizgani ndi kuti waŵerengeke so ku mpingu waku Laodikea, ndikuti namwe so muŵerenge yo watuwa ku Laodikea.

¹⁷Ndipo muneniyeni Arkipo kuti, “Fiska uteŵeti wo waronde mu Mbuya.”

¹⁸Tauzgo laku ine nda Paulo, lakulembeka ndi janja langu. Kumbukani magoŵa ghangu. Wezi uŵe namwe.