Read gitonga 1 ŴaTesalonika 1 Bible Online

1 ŴaTesalonika 1 - gitonga bible

1 ŴaTesalonika 1

¹Kalata wakutuwa kwaku Paulo, ndi Silvano, ndi Timote, ku mpingu wa ŵaTesalonika mwaku Chiuta Dada ndi Ambuya Yesu Kristu: Wezi kwaku imwe, ndi chimangu.

²Tiwonga Chiuta nyengo zose pa chifukwa chaku imwe mose, tichimzumbuwani mu marombo ghidu;

³pakukumbuka kwambura kurekezga nchitu yinu ya chivwanu ndi chitakataka chinu cha chanju, ndi unkhunthiya wachigomekezgu mu Ambuyafwe Yesu Kristu, paurongo paku Chiuta widu ndi Auskefwe.

⁴Pakuziŵa, mwa ŵabali ŵakwanjika ndi Chiuta, kusankhika kwinu;

⁵pakuti evangeli widu kuti unguziya imwe mu mazu pe cha, kweni so mu nthazi ndi mu Mzimu Wakupaturika, ndi mu uzali wenecho wa chigomekezgu. Uli ndimo muziŵiya po tinguŵiya mwinu wakuti e, pa chifukwa chinu.

⁶Ndipo imwe munguŵa wakwezga ifwe ndi Ambuya, munguti mwaronde mazu mu suzgu yikuru, pamoza ndi chimwemwe cha Mzimu Wakupaturika;

⁷viyo kuti munguŵa chandiru imwe ku ŵakuvwana wose mu Makedonia ndi Akhaia.

⁸Chifukwa kutuwa kwinu ghawandiya mazu gho gha Ambuya mu Makedonia ndi Akhaia pe cha; kweni mu malo ghose chivwanu chinu chamwaku Chiuta chawanda; viyo kuti palive chifukwa kuti tikambepo kanthu ifwe.

⁹Chifukwa iwo ŵeneko ŵakamba gha kurondereka kwidu kwaku imwe ko tinguŵa nako, ndimo mungung'anamukiya kwaku Chiuta kutuwako ku vyangoza kwachiteŵete Chiuta wamoyo ndi muneneska,

¹⁰ndi kwachilindizga Mwana wake wachisoromoka kuchanya, mweniyo wangumyuska ku ŵakufwa Yesu, mweniyo ngwakutitaska ku kandundu ko katuza.