Read gitonga 1 ŴaTesalonika 2 Bible Online

1 ŴaTesalonika 2 - gitonga bible

1 ŴaTesalonika 2

¹Chifukwa mwa ŵabali, mwaŵeni muziŵa mo tinguserere kwaku imwe, kuti chenga chinthu chaumbuwuya cha;

²tinguŵa ndi chiganga tati takunthiyapo kali, ndi kuyuzgika ku Filipi, uli ndimo muziŵiya, tinguŵa ndi chiganga mwaku Chiuta kukambiya imwe evangeli waku Chiuta mu kulimbalimba kukuru.

³Chifukwa chichichizga chidu kuti nchakutuwa ku urandizgi cha, chingana nkhu unyakazi, chingana ndi mu fuzi;

⁴kweni uli ndimo tazomerezgeke ndi Chiuta kutipingizga evangeli wo, viyo tikamba; nge mbakukondweska ŵanthu cha, kweni Chiuta yo watesa mitima yidu.

⁵Chifukwa, uli ndimo muziŵiya, chingana nkhuti kosekose tinguŵa ŵakukamba utesi mu mazu cha, chingana nkhuti tinguŵa ŵarghargha mu bina cha, Chiuta ndiyo kaboni;

⁶chingana nkhuti tapenjanga unkhankhu ku ŵanthu cha, pamwenga kwaku imwe, pamwenga ku ŵanyake, chingana nge mbakutumika ŵaku Kristu tinguziŵa kujiŵangiya ulemu.

⁷Kweni tinguŵa ŵapovu mukati mwinu, nge ndimo mlezi wapakati ya ŵana ŵapa mtima wake.

⁸Viyo taŵakunweka imwe tingukondwa kukupaskani evangeli waku Chiuta pe cha, kweni ndi mauzima ghidu nagho, pakuti mwenga ŵakwanjiwa kwaku ifwe.

⁹Chifukwa mukumbuka, mwa ŵabali, mtima widu ndi chitakataka chidu; tichitakataka usiku ndi msana, alinga kuti tingamzitiska yumoza waku imwe cha, tichikutauliyani evangeli waku Chiuta.

¹⁰Mwe ŵakaboni imwe, ndi Chiuta viyo, mo tingujaririya kuchiri kwaku imwe mwaŵakuvwana, kwakupaturika, ndi kwaurunji, ndi kwambura kalema:

¹¹uli ndimo muziŵiya mo tinguchitiya ndi munthu yose waku imwe, mo wiske wachitiya pa ŵana ŵaku yija, kuŵeyere ndi kuchiska ndi kusimikizgiya imwe,

¹²kwenda kwakwenere chiuta, yo wakudaniyanimo mu ufumu ndi unkhankhu waku iyo mweneko.

¹³Chifukwa chenichi nafwe so timwonga Chiuta kwambura kulekezga, kuti pakuronde kwaku ifwe mazu gha uthenga waku Chiuta, mungugharonde nge ndi mazu gha ŵanthu cha, kweni, mo ghaliri, nge ndi mazu ghaku Chiuta, ghenigho nagho ghatakataka mwaku imwe mwaŵakuvwana.

¹⁴Chifukwa imwe, mwa ŵabali, munguŵa wakwezga mipingu yaku Chiuta mwaku Kristu Yesu gho ghe muYuda: pakuti namwe so mungukunthiyapo vyaviyo pe kutuliya mu ŵanthu ŵamtundu winu uli ndimo nawoso ŵangukunthiyapo ku ŵaYuda.

¹⁵Wo nawo ŵangubaya Ambuya Yesu ndi ŵamchimi, ndipo ŵangutidikiska ifwe, ŵambura kumkondweska Chiuta, ndipo mbakumikirana ndi ŵanthu wose;

¹⁶pakuti ŵatitikanizga kuŵakambiya ŵaMtundu kuti ŵataskike. Nyengo yose iyi ŵatakatakanga kuti ŵazaze mweso wa maulakwi ghawo. Ndipo sono ukari waku Chiuta wafikiya paku iwo.

¹⁷Kweni imwe, mwa ŵabali, pakutuwako kwaku imwe kanyengo kamanavi (ku chisku, ku mtima cha), tingutunthwiya ukongwa ndi linweka lakuruska kuwona chisku chinu:

¹⁸chifukwa chenichi tingukhumbiska kuza so kwinu, ine nda Paulo, kaŵikaŵi; kweni Satana wangutitangwamiska.

¹⁹Chifukwa nchine chigomekezgu chidu, pamwenga chimwemwe, pamwenga chifuku cha chitumbwa paurongo pa Ambuya Yesu pa uzi wake? Asi ndimwe na?

²⁰Chifukwa imwe mwe unkhankhu widu ndi chimwemwe chidu.