Read gitonga 1 ŴaTesalonika 3 Bible Online

1 ŴaTesalonika 3 - gitonga bible

1 ŴaTesalonika 3

¹Viyo po tengavi kuziŵa kukunthiyapo kwakurutiliya apa so cha, tingupima kwenga kwamampha kusiyika mu Athene;

²ndipo tingutuma Timote, mbali widu ndi mteŵeti waku Chiuta mu evangeli waku Kristu, kwachikhozge imwe, ndi kumsangaruskani mu chivwanu chinu;

³alinga kuti wareke kuyuzgika, yumoza ndi suzgu zenizi: pakuti muziŵa mwaŵeni kuti nkhwaku chenichi ko ifwe tikumikikiya.

⁴Chifukwa po tenga teche kwinu, tingumkambiyani limu kuti tikayuzgikanga; ndipo nadi kwafiskika nge ndimo namwe muziŵiya.

⁵Chifukwa chenichi ine nane, pakuziŵa kukunthiyapo so cha, ndingumutuma mwakuti ndiziŵe chivwanu chinu, vinu kokuli wakwesa yo wakwesani, ndi kuti mlimu widu waŵa wawaka.

⁶Kweni sono po waza Timote kutuwa kwinu ndipakutigozge makani ghakunozga gha chivwanu chinu ndi chanju chinu, ndi kuti mutitikumbuka umamphavi nyengo zose, pakunweka kutiwona, nge ndimo ifwe nafwe tinweke kumuwonani imwe;

⁷pa chifukwa chenichi, mwa ŵabali, taŵa ŵakusangaruka paku imwe mu ufinyi widu wose ndi musuzgu, pa chifukwa cha chivwanu chinu:

⁸pakuti sono tituta, asani imwe mungangamikiya mu Ambuya.

⁹Chifukwa tingamuwezge Chiuta chiwongu chauli pa chifukwa chinu, pa chimwemwe chose cho timwemwete chifukwa chaku imwe paurongo paku Chiuta widu;

¹⁰taŵakuromba ukongwa limu usiku ndi msana, kuti mphanyi tawona chisku chinu, ndi kumusazgiyaniko ku vyakupereŵe vyamu chivwanu chinu?

¹¹Kweni Chiuta mweneko Auskefwe, ndi Ambuyafwe Yesu, ayinyoroske kwinu nthowa yidu.

¹²Ambuya akukuzgeni ndi akwandaniskeni mu chanju yumoza ku munyake, ndipo so kwaku wose, uli ndimo ifwe titanjiya imwe;

¹³alinga kuti akhozge mitima yinu yizira-kalema mu upaturika paurongo paku Chiuta widu Auskefwe, pa uzi wa Ambuyafwe Yesu pamoza ndi ŵakupaturika ŵake wose.