Read gitonga 1 ŴaTesalonika 4 Bible Online

1 ŴaTesalonika 4 - gitonga bible

1 ŴaTesalonika 4

¹Viyo pakumariya, mwa ŵabali, tiŵeyere ndipo tichiskiya imwe mu Ambuya Yesu, kuti, uli ndimo munguvwiya kwaku ifwe mo mutenere kujariya ndi kukondweske Chiuta, uli ndimo so muchitiya, murutiriyenge kwakukiyakiya.

²Chifukwa muziŵa malangulu ghenigho tingumpaskiyani mu Ambuya Yesu.

³Chifukwa khumbo laku Chiuta ndenili, kutozgeka kwinu nkhwakuti mujitintheko ku ureŵi:

⁴kuti munthu yose waku imwe waziŵe kuŵa nayo muwoli waku yija mu kupaturika ndi ulemu,

⁵mu ulakalaka wa likhumbira cha, nge ndi mitundu yakuura kumziŵa Chiuta;

⁶paŵevi yumoza wakunyumba ndi wakuŵiniwa mbali wake mu kanthu: chifukwa kuti Ambuya ndi mweruzgi mwaku vyenivyo vyose, nge ndimo tingumkambiyani limu ndi kusimikizga.

⁷Chifukwa Chiuta kuti wangutidaniya ku wiyu cha, kweni ku upaturika.

⁸Viyo yose wakukana ichi kuti wakaniya munthu cha, kweni Chiuta, yo wakupaskani Mzimu wake Wakupaturika.

⁹Kweni kuti mukavuka cha kuti yumoza walembe kwaku imwe ghapa kwanja-ŵabali: chifukwa mwaŵeni mwasambizgika ndi Chiuta kwanjana;

¹⁰pakuti nadi mutiŵanja wose ŵabali ŵamu Makedonia. Kweni titikuchiskani, mwa ŵabali, rutiriyani, ukongwaku;

¹¹pakuphwererana mu kuja kwakuzika, ndi kutakatakiya vyaku mwaŵeni, ndi kutataliya ndi manja ghinu, uli ndimo tingumlanguliyani;

¹²alinga kuti mwendenge kwakukongora kuchiri ku ŵakubwaro, ndi kuti mungakavuka kanthu cha.

¹³Kweni kuti tikhumba cha, mwa ŵabali, kuti mureke kuziŵiyapo paku wo mbakura tulo; alinga kuti mungafwa chisungu cha, nge mbanyake nawo wo ŵalive chigomekezgu.

¹⁴Chifukwa asani tivwana kuti Yesu wangufwa ndi wanguyuka, viyo so Chiuta, mwaku Yesu, waŵatoliyenge pamoza nayo wo mbakura tulo.

¹⁵Chifukwa tikukambiyani chenichi mu mazu gha Ambuya, kuti ifwe taŵamoyo, taŵakujaririya ku chiwoneka cha Ambuya, kuti tikaŵadanjiriyanga kose cha wo mbakura.

¹⁶Pakuti Ambuya ŵeneko ŵakasikanga kutuwa kuchanya ndi mdanu, ndi mazu gha mungelo-mura, ndi ndi mbata yaku Chiuta; ndipo ŵakufwiya mwaku Kristu ŵakayukanga danga:

¹⁷pavuli pake ifwe taŵamoyo, taŵakujaririya, tikakwamphulikiyanga pamoza nawo mu mitambo, kwachikumana ndi Ambuya mude; ndipo viyo tikaŵanga muyaya pamoza ndi Ambuya.

¹⁸Viyonthu sangaruskanani ndi mazu yegha.