Read gitonga 1 ŴaTesalonika 5 Bible Online

1 ŴaTesalonika 5 - gitonga bible

1 ŴaTesalonika 5

¹Kweni, mwa ŵabali, kuti mukavuka cha kuti ghapa zinyengo ndi virimika ghalembeke kwaku imwe.

²Chifukwa mwaŵeni muziŵiya limu kuti nge ndi munkhungu ndi usiku viyo lizenge zuŵa lo, la Ambuya.

³Po ŵatiti, “Chimangu ndi wanangwa,” penipo ndipo phasulu lituŵawiya kwakubuchizga, uli ndimo urwirwi utumuŵiya wanthumbo; ndipo kuti wampozomoka kose cha.

⁴Kweni imwe, mwa ŵabali, kuti mwe mu mdima cha, viyo kuti zuŵa lo lingamkoni nge ndi munkhungu:

⁵chifukwa mose mwe ŵana ŵa kungweruka, ndi ŵana ŵa msana: kuti te ŵa usiku, chingana mbamdima cha.

⁶Viyo na tireke kura tulo nge mbanyake, kweni ticherezge ndi tizize.

⁷Chifukwa ŵakura ŵara ndi usiku; ndi ŵakuloŵe ŵaloŵe ndi usiku.

⁸Kweni ifwe, taŵakuŵa ŵa msana, tizize, taŵakuvwara chivekeru chapa chifuŵa cha chivwanu ndi chanju, ndi nge nchapa mutuchigomekezgu cha chipozomosku.

⁹Pakuti Chiuta walive kutiteme ku kandundu, kweni kwachironde chipozomosku mu Ambuya Yesu Kristu,

¹⁰yo wangutifwiya, alinga kuti, chingana ticherezga, chingana tira, tiŵenge ŵamoyo pamoza nayo.

¹¹Chifukwa chenichi chiskanani, ndi zenganani, uli ndimo muchitiya.

¹²Kweni tikuŵeyereni, mwa ŵabali, phwereni ŵeniwo ŵatakatakiya mwinu, ndi ŵakuŵa pachanya pinu mu wanasi wa Ambuya, ndi ŵakumpangizgani fundu;

¹³kuŵarumba ukongwa mu chanju, chifukwa cha nchitu yawo. Muŵe ndi chimangu mwaku mwaŵeni.

¹⁴Kweni tikuŵeyereni, mwa ŵabali, chinyiyani ŵatimbanizi, ŵachichizgeni ŵakufwa chipoyu mu mtima, chirikizgani ŵanthomboru, muŵe ndi lisungu kwaku wose.

¹⁵Thoŵani kuti paŵevi yumoza wakuwe'ezge munyake uheni pa uheni; kweni nyengo zose penjiyanani cho nchamampha, yumoza ku munyake, ndi kwaku wose.

¹⁶Kondwani nyengo zose;

¹⁷rombani kwambura kulerezga;

¹⁸mwaku vyose Kristu Yesu kuchiri kwaku imwe.

¹⁹Mungazimwa Mzimu;

²⁰mungayuyuwa mauchimi cha;

²¹vyeseni vyose; koreskani cho nchamampha;

²²mujipatuweko ku kawonekedu kose kaheni.

²³Ndipo mweneko Chiuta wa chimangu wakuphotoni kosekose; ndipo mzimu winu ndi vinjeru vinu ndi liŵavu visungike vizirima, kwambura kalema pa chiwoneka cha Ambuyafwe Yesu Kristu.

²⁴Ngwamagomekezgeka yo wakumdanani, mweniyo so wakachichitanga.

²⁵Mwa ŵabali, tirombiyeni.

²⁶Tauzgani ŵabali wose ndi mfyofyonthu wakupaturika.

²⁷Ndikurapiskiyani mu Mbuya, kuti kalata mwenuyo waŵerengeke ku ŵabali wose.

²⁸Wezi wa Ambuyafwe Yesu ukuŵiyeni.