Read gitonga Yoswa 14 Bible Online

Yoswa 14 - gitonga bible

Yoswa 14

¹Ndipo ivi ndi vihara vyo ŵaYisraele ŵanguronde mu charu cha Kanani, vyenivyo Eleazara mzukuru, ndi Yoswa mwana waku Nuni, ndi ŵarongozgi ŵa nyumba za auskeu ŵa mafuku gha ŵaYisraele ŵanguŵagaŵiya.

²Vihara vyawo vyenga vya mphenduzga, pa mafuku ghankhonde ndi ghanayi ndi nusu, nge ndimo Ambuya angulanguliya Mosese,

³pakuti Mosese wangupaska chihara cha kusirgha ku Yordane ku mafuku ghaŵi ndi fuku la nusu, kweni ku ŵaLevi kuti wangupaska chihara mukati mwawo cha.

⁴Chifukwa ŵina Yosefe ŵenga mafuku ghaŵi, laku Manase ndi Efraimu; pengavi chigaŵa cho chingupaskika ku ŵaLevi mu charu, kweni misumba pe yakujamo ndiyo ndi charu cha chipozwa cha ng'ombe zawo ndi usambasi wawo.

⁵ŴaYisraele ŵanguchita nge ndimo Ambuya angulanguliya Mosese; ŵangugaŵa charu.

⁶Sono ŵanthu ŵaku Yuda ŵanguza kwaku Yoswa pa Gilgala; ndipo Kalebe mwana waku Yefuni mu Kenizi wangunena nayo, “Iwe uziŵa cho Ambuya angurongoro ndi Mosese munthu waku Chiuta pa Kadeshe-barnea paku iwe ndi ine.

⁷Ndipo nde wa virimika machumi ghanayi wachindituma Mosese mteŵeti wa Ambuya kutuwa ku Kadeshe-barnea kwa chiskola charu, ndipo ndingumuwezge mazu mo ghanguŵiya mu mtima wangu.

⁸Kweni ŵabali wo ŵanguruta pamoza nane ŵangusongonoska mitima ya ŵanthu; ine kwakufikapo ndingurondo Ambuya Chiuta wangu.

⁹Ndipo Mosese wangurapa pa zuŵa liya, kuti, ‘Ndineneska charu cho rundi lako lakandapo chikaŵanga chihara chako ndi ŵana ŵako muyaya, chifukwa kwakufikapo warondo Ambuya Chiuta wangu.’

¹⁰Sono ehe, Ambuya andisunga ŵamoyo, nge ndimo angukambiya, virimika ivi machumi ghanayi ndi vinkhonde (45) kutuliya pa nyengo yo Ambuya angukambiya mazu yagha kwaku Mosese, po Yisraele wenga weche kwenda mu bozwa; ndipo sono; alereni pa zuŵa lino ndendi virimika, machumi ghankhonde ndi ghatatu pachanya vinkhonde (85).

¹¹Ndeche wanthazi nyengo yinu nge ndimo ndinguŵiya pa zuŵa lo Mosese wanditumiyanga, mo nthazi zangu zinguŵiya pa nyengo yiya ndimo ziliri ndasono pano zakurwiya nkhondo, pa kuruta ndi pakuwe.

¹²Viyo sono ndipaske charu cha mtunthu ichi cho Ambuya angunena pa zuŵa liya; pakuti ugujivwiya zuŵa liya mo ŵina Anakimi ŵanguŵiyako, ndi misumba yikuru ya malinga: kokuli Ambuya akaŵanga nane, ndipo ndikaŵatuzgangamo uli ndimo Ambuya angunene.”

¹³Viyo Yoswa wangumutumbika ndipo wangupaska Hebroni kwaku Kalebe mwana waku Yefuni nge nchihara.

¹⁴Henroni wanguŵa chihara chaku Kalebe mwana waku Yefuni mu Kenizi mpaka kunu ku sono chifukwa wangurondo Ambuya Chiuta waku Yisraele ndi mtima wose;

¹⁵kweni zina laku Hebroni pa kudanga lenga Kiriata-arba; uyu Arba wenga chinkhara chakuruska mukati mu ŵina Anakimi. Ndipo charu chingupumuwa ku nkhondo.