Read gitonga Yoswa 23 Bible Online

Yoswa 23 - gitonga bible

Yoswa 23

¹Pavuli pa nyengo yitali, penipo Ambuya angupaska chipumulu kwaku Yisraele ku ŵarwani wose ŵakuŵazunguliya, Yoswa wangukota wakuŵa ndi virimika vinandi;

²wangudana ŵaYisraele, wose ŵaraŵara ŵawo ndi ŵarongozgi, ŵeruzgi ŵawo ndi zinduna, Yoswa wanguti kwaku wo, “Ine sono ndakota nde wa virimika vinandi;

³ndipo mwawona vyose vyo Ambuya Chiuta winu wachita ku mitundu yose iyi chifukwa chinu, pakuti ndi Ambuya Chiuta winu mweniyo wamurwiyani nkhondo.

⁴Awonani, ndakugaŵiyani kuŵa chihara cha mafuku ghinu mitundu yo yichalipo, pamoza ndi mitundu yose yo ndikudumuwa kali, kutuwa ku Yordane mpaka ku Nyanja Yikuru ku zambwe.

⁵Ambuya Chiuta winu wakaŵadikiskiyanga kuvuli, ndi kuŵatuzgapo pamaso pinu; ndipo mukajanga mu charu chawo, uli ndimo Ambuya Chiuta winu wangupangirana namwe.

⁶Pa chifukwa ichi muŵe ŵakukoreska kusunga ndi kuchita vyose vyo vikulembeka mu buku laku Mosese, kwambura kung'anamukako kwaku lo kurazga ku marghe pamwenga ku maze,

⁷kuti mureke kusazgikana ndi mitundu iyi yasiyika mukati mwinu, pamwenga kuzumbuwa mazina gha ŵachiuta ŵawo nanga nkhurapiya mwaku wo, pamwenga kuŵatataliya, nanga nkhu ŵajikamiya,

⁸kweni meremetiyani Ambuya Chiuta winu nge ndimo mwachitiya kufika ku zuŵa lino.

⁹Pakuti Ambuya adikiska mitundu yikuru ndi yanthazi paurongo pinu, ndipo nge nkhwaku imwe, palivi munthu yo waŵa wakulimbana namwe mpaka ku zuŵa lino.

¹⁰Munthu yumoza waku imwe wadikiska ŵanthu chikwi, pakuti mba Mbuya Chiuta winu yo watikurwiyani nge ndimo wangupangirana namwe.

¹¹Jiphwereni imwe mwaŵeni, kwanja Ambuya Chiuta winu.

¹²Chifukwa asani muwere kuvuli, ndi kujibatika ku ŵakujapo, ŵa mitundu iyi ye mukati mwinu, kutorana nawo, mwakuti mutonge ŵanthukazi ŵawo ndi iwo kuto ŵinu,

¹³ziŵani kwa kuneneska kuti Ambuya Chiuta winu kuti wakalutiriyanga cha kudikiska mitundu iyi paurongo pinu; kweni wakaŵanga chikhwiriki ndi chiŵana kwaku imwe, likhwechu mu mbaghara zinu, ndi minga mu maso ghinu, mpaka po mwasisitika kutuwamo mu charu chamampha ichi cho Ambuya Chiuta winu wakupaskani imwe.

¹⁴“Ndipo sono ine nde pafupi kuruta mu nthowa ya charu chose, ndipo imwe mose muziŵa mu mitima ndi umoyo winu, kuti palivi kanthu kamoza ka vinthu vyamampha vyo Ambuya Chiuta winu wangupangana paku imwe katondeka; vyose vyafiskikiya imwe, palivi ko katondeka.

¹⁵Kweni ulaka ndimo Ambuya Chiuta winu wafiskiya vyamampha vyose vyo wangupangana paku imwe, viyo so ndimu Ambuya akatoriyanga paku imwe viheni vyose, mpaka po amubwanganduwani mu charu chamampha ichi cho Ambuya Chiuta winu wakupaskani,

¹⁶asani mukarengeskanga phanganu la Ambuya Chiuta winu, lo wangukulanguliyani, kuruta ndi kuteŵete achiuta ŵanyake ndi kuŵajikamiya wo, penipo ndipo ukari wa Ambuya ukakolenga paku imwe, ndipo mukafwanga ruŵi mu charu chamampha ichi cho wakupaskani.”