Read gitonga Yoswa 4 Bible Online

Yoswa 4 - gitonga bible

Yoswa 4

¹Linguti lambuka khamu lo lose, Ambuya angunena ndi Yoswa,

²“Utomo ŵanthu chumi ndi ŵaŵi mu khamu lo pa fuku ndi fuku munthu yumoza,

³uŵanene kuti, ‘Toni mya chumi ndi yiŵi pano pakati pa Yordane, pamalo ipo po marundi gha ŵazukuru ghanguma, muruti nayo mukayilalike pasi penipo mwamugona usiku uno.’ ”

⁴Viyo Yoswa wangudana ŵanthu chumi ndi ŵaŵi mu ŵaYisraele, wo wangutondo, munthu yumoza pa fuku limoza;

⁵wangunena nawo, “Jumphani paurongo pa bokosi la Ambuya Chiuta winu mukati mu Yordane, ndipo jitoliyeni yumoza ndi yumoza waku imwe mwa umoza pa phewa lake, kwakuyana ndi unandi wa mafuku gha ŵaYisraele,

⁶mwakuti ichi chikuŵiyeni chikumbusku, penipo ŵana ŵinu ŵazamufumba mukucha, ‘Kumbi mya yo ying'anamuwanji kwaku imwe?’

⁷Sono mukaŵaneniyanga kuti maji gha Yordane ghangudumulika paurongo pa bokosi la phanganu la Ambuya; po lambukanga pa Yordane, maji ghangugaŵikana. Rekani mya iyi yikaŵanga chikumbusku cha muyaya ku ŵaYisraele.”

⁸Nge ndimo Yoswa wanguŵalanguliya ndimu ŵanthu ŵanguchitiya, ŵanguto mya chumi ndi yiŵi mukati mu Yordane, kwakuyana ndi unandi wa mafuku gha ŵaYisraele, mo Ambuya angunene Yoswa; ŵangupinga ndi kuruta nayo pa malo po ŵangugona, ŵanguyilalika pasi.

⁹Ndipo Yoswa wangumika mya chumi ndi yiŵi mukati mu Yordane penipo marundi gha ŵazukuru ŵakunyamuwa bokosi la phanganu ghanguma; yepenipo mpaka ku zuŵa lino.

¹⁰Pakuti ŵazukuru wo ŵangunyamuwa bokosi ŵanguma mukati mu Yordane, mpaka penipo vyose vyo Ambuya angulanguliya Yoswa kunene ŵanthu vingufiskika, kwakuyana ndimo Mosese wangulanguliya Yoswa. Ŵanthu ŵangwambuka kwakuthaŵiriya;

¹¹wose ŵanguti ŵamara kwambuka, bokosi la Ambuya ndi ŵazukuru ŵakulipinga ŵangudanjiyapo.

¹²Ŵana ŵanthurumi ŵaku Rubene, ndi ŵana ŵanthurumi ŵaku Gadi, ndi ŵanyake ŵa fuku laku Manase ŵangwambuka ŵakuskoma vidya paurongo pa ŵanthu, nge ndimo Mosese wanguŵanene;

¹³akhumba vikwi machumi ghanayi (40,000) ŵakulongosoreke nkhondo ŵangwambuka paurongo pa Ambuya ku kurwana, ku madambo ghaku Yeriko.

¹⁴Pa zuŵa liya Ambuya angukuzga Yoswa mu maso gha ŵaYisraele wose; ndipo ŵanthu ŵanguma ndi kumopa iyo, uli ndimo ŵangope Mosese, mu mazuŵa gha umoyo wake wose.

¹⁵Ndipo Ambuya angunena ndi Yoswa,

¹⁶“Ŵanene ŵazukuru ŵakunyamuwa bokosi la chisimisimi kuti ŵazuwuke mu Yordane.”

¹⁷Viyo Yoswa wanguŵanene ŵazukuru, “Zuwukani mu Yordane.”

¹⁸Ŵazukuru ŵakunyamuwa bokosi la phanganu la Ambuya ŵanguti ŵatuwa mukati mu Yordane, ghanguti ghakanda pa mtunda uyumu marundi ghawo, maji gha Yordane ghanguwere mu malo ghake ndi ghangusapatiya ku sirgha ndi sirgha nge mphakudanga.

¹⁹Ŵanthu ŵanguzuwuka mu Yordane pa zuŵa la chumi la mwezi wakudanga, ndipo ŵangugoŵa pa gilgala ku mphaka yaku vuma ya Yeriko.

²⁰Ndipo mya chumi ndi yiŵi, yo ŵanguto mu Yordane, Yoswa wanguyimika mu Gilgala.

²¹Sono wangunena ndi ŵaYisraele, “Po ŵana ŵinu ŵazamufumba auskeu mukucha, ‘Mya iyi ying'anamuwanji?’

²²Muŵaziŵiskenge ŵana ŵinu kuti, ‘Yisraele wangwambuka Yordane uyu pa mtunda uyumu.’

²³Pakuti Ambuya Chiuta winu wangukamuska maji gha mu Yordane chifukwa chinu mpaka penipo mungwambuka; nge ndimo Ambuya Chiuta winu wanguchitiya pa Nyanja Yiyera, yo wangukamuskiya ifwe, mpaka po tingwambuka,

²⁴mwakuti ŵanthu ŵa mitundu yose mu charu chapasi ŵaziŵe kuti janja la Ambuya ndanthazi; ndikuti imwe mopenge Ambuya Chiuta winu muyaya.”