Read gitonga Yoswa 8 Bible Online

Yoswa 8 - gitonga bible

Yoswa 8

¹Ndipo Ambuya angunena ndi Yoswa, “Ungatethemanga pamwenga kugongowa cha; utore pamoza nawe wose ŵakurwa nkhondo, ndipo soka, kweriyanga ku Ai; ehe, ndapereka mu janja lako karonga waku Ai, ndi ŵanthu ŵake, msumba, ndipo ndi charu chake;

²mo unguchitiya ndi Yeriko ndi karonga wake ndimo ukachitiyanga ndi Ai ndi karonga wake; kweni vyuma vyake ndi ng'ombe zake mwamuto nge ndi muskowo winu; mubisame kuvuli kwa msumba wo.”

³Viyo Yoswa wangusoka, ndi nkhondo yake yose, kukwere ku Ai; ndipo Yoswa wangusankha ŵanthurumi vikwi machumi ghatatu (30,000) ngwazi zanthazi, wanguŵatuma kuwa ndi usiku.

⁴Ndipo wanguŵalanguliya kuti, “Ehe, mukabisame kuvuli kwa msumba wo; mungamukuya kutali ndi msumba cha, kweni mukaŵe ŵakujirongosole limu;

⁵ine ndi wose wo ŵenane pamoza, tikaŵandikanga ku msumba wo. Sono iwo ŵachituwa kulimbana ndi ifwe, nge mphakudanga tamuthaŵa paurongo pawo.

⁶Iwo ŵamukutirondo, mpaka po taŵanderezga kutali ndi msumba wo, pakuti ŵakatinge, ‘Ŵatitithaŵa nge mphakudanga.’ Viyo ifwe tamukuŵathaŵa;

⁷sono imwe mwamusoka mo mwamubisama, kwachithereska msumba wo; pakuti Ambuya Chiuta winu wakawuperekanga mu janja linu.

⁸Ndipo mutakuti mwapoka muzi, mukawuwochanga ndi moto; kuchita ulaka ndimo Ambuya akambiya; awonani; ndakulanguliyani.”

⁹Viyo Yoswa wanguŵatuma; ndipo ŵanguruta mu malo ghakubisamamo, ŵanguja pakati pa Betele ndi Ai, kuzambwe kwa Ai; kweni usiku uwa wose Yoswa wenga mukati mu ŵanthu.

¹⁰Ndipo Yoswa wangusoka ndi mlenjilenji, wanguwungang'a ŵanthu ndipo wangukwera iyo pamoza ndi ŵaraŵara ŵaYisraele, paurongo pa khamu lo ku Ai.

¹¹Ndipo zingwazi zose zakuŵa pamoza nayo zinguruta, ŵangufika kufupi ndi msumba ndipo ŵangugoŵa kuchiri ku nkhonde kwa Ai, penga kachiphwaphwazi pakati paku iwo ndi Ai.

¹²Ndipo wangutuma akhumba ŵanthurumi vikwi vinkhonde (5,000) kwachibisama pakati pa Betele ndi Ai, kuzambwe kwa msumba.

¹³Viyo ndimo ghangujariya maŵanja gha nkhondo, ugoŵi weneko wapakatikati ngweniwo wenga ku nkhonde kwa msumba wo, ndipo ŵakulonda kuvuli ŵenga kuzambwe kwa msumba. Kweni Yoswa usiku wose uwa wenga mu dambo.

¹⁴Wanguti wawona ichi karonga waku Ai, iyo pamoza ndi ŵanthu ŵake wose ŵanthurumi mu msumba wuwa, ŵangutinthimika ŵangutuwa ndi mlenjilenji kuruta kusendemu kurazga ku Araba, kwachikumana, ndi kurwana ndi ŵaYisraele; kweni ŵengavi kuziŵa kuti nkhondo yinyake yabisama kuvuli kwa msumba.

¹⁵Ndipo Yoswa ndi ŵaYisraele wose ŵanguchita chiphamaso chakuŵa nge ŵathereskeka, ndipo ŵanguthaŵiya kuchiri ku bozwa.

¹⁶Mwakuti ŵanthu wose wo ŵenga mu msumba ŵangudanikiya pamoza kuti ŵaŵandondoloske, ndipo pakundondoloska Yoswa wanguruta kutali ndi msumba.

¹⁷Mwengavi kujamo munthu nanga njumoza mu Ai pamwenga mu Betele, wambura kutuwa kundondoloska ŵaYisraele; msumba ŵanguwusiya wa mwazi.

¹⁸Penipo Ambuya angunena ndi Yoswa, “Tambaruliya mkondo wo wemu janja lako kurongo ku Ai; pakuti ndikawupaskanga mu janja lako.” Yoswa wangutambaruwa mkondo wo kurongo ku msumba.

¹⁹Ŵakubisama ŵangusoka ruŵiruŵi kutuwa mu malo ghawo, ndipo po iyo wangutaka nyoroske janja lake, iwo ŵanguchimbiya ndi kusere mu msumba wo ndipo ŵanguwuthereska; ndipo ŵangupusumpha kuwuwocha ndi moto.

²⁰Viyo penipo ŵanthurumi ŵaku Ai ŵangulereska kuvuli, alereni, usi wamu msumba ungukwere kuchanya; ndipo ŵengavi nthazi zakuthaŵiya uku pamwenga kuwa, pakuti ŵaYisraele ŵeniwo ŵanguthaŵiya ku bozwa ŵangung'anamukiya kuvuli pakuŵandondoloska.

²¹Ndipo Yoswa ndi ŵaYisraele wose ŵanguti ŵawona kuti ŵakubisama ŵa, ŵato muzi, ndikuti usi wa msumba wo ukwere kuchanya; ŵangung'anamukiya kuvuli ndi kubaya ŵanthurumi ŵaku Ai.

²²Ndipo ŵanyake ŵangutuwa mu msumba kurwana ndi iwo; viyo ŵenga mukati mu ŵaYisraele, ŵaYisraele ŵanyake kuchiri kunu, ŵanyake kuchiri kuwa; ŵanguŵabaya, mpaka penipo ŵengavi kujapo nanga njumoza wamoyo pamwenga wakuthaŵa.

²³Karonga waku Ai ŵangumuko wamoyo, ŵanguza nayo kwaku Yoswa.

²⁴ŴaYisraele ŵangumara kubaya wose ŵakuja mu Ai ndi ku bozwa ko ŵanguŵandondoloska, wose ŵangufwa kwambura nanga njumoza wakutaskika, pavuli ŵaYisraele wose ŵanguwere ku Ai, ndipo ŵangumara kubaya wose ndi lipanga.

²⁵Ndipo wose wo ŵangufwa zuŵa liya ŵanthurumi ndi ŵanthukazi, ŵenga vikwi chumi pachanya viŵi (12,000), wose ŵenga ŵanthu ŵaku Ai.

²⁶Yoswa kuti wanguliwezga ruŵi cha janja lake, lo wangutambasuliya mkondo, mpaka po wangumariya limu kubaya wose ŵamu Ai.

²⁷Ng'ombe pe ndi chuma chawo vinguŵa muskowo wa ŵaYisraele, kwakulingana nge ndimo Ambuya angulanguliya Yoswa.

²⁸Viyo Yoswa wangocha Ai, ndipo wanguwusanduska kuŵa ndundu ya mapopa muyaya, nge ndimo uliri mpaka ku zuŵa lino.

²⁹Ndipo wangupayika karonga wa Ai pa muti mpaka mazulo; pa kusere kwa dazi, Yoswa wangulangula kutuzgapo chiŵanda pa muti ndi kuchitaya pa kuserere pa likomo la msumba, wanguwunjikapo ndundu ya mya, yo yichalipo mpaka kunu ku sono.

³⁰Sono Yoswa wanguzenga jochero pa phiri Abala kuzenge Ambuya, Chiuta waku Yisraele,

³¹nge ndimo Mosese mteŵeti wa Ambuya wangulanguliya ŵaYisraele, mo ghakulembeke mu buku la marangu ghaku Mosese, “Jochero la mya yambura kusema, yeniyo munthu nanga njumoza kuti wayisemapo ndi chisulo cha”; ndipo ŵanguperekapo mipasku yakocha ku Ambuya, ndi kuperekapo sembe za chimangu.

³²Ndipo penipa, paurongo pa ŵaYisraele Yoswa wangulemba pa mya marangu ghaku Mosese ghenigho wangulemba.

³³Ndipo ŵaYisraele wose mlendo ndi mwenimuzi, pamoza ndi ŵaraŵara ndi zinduna ndi ŵeruzgi ŵawo ŵanguma kwakutghana ndi bokosi la phanganu la Ambuya paurongo pa ŵazukuru ŵaLevi wo ŵangupinga bokosi la phanganu la Ambuya, ŵa chigaŵa chimoza ŵenga paurongo pa phiri la Gerizimu, ŵa chigaŵa chinyake ŵenga paurongo pa phiri la Ebala, mo wangunene Mosese mteŵeti wa Ambuya pakudanga kuti ŵatumbike ŵaYisraele.

³⁴Pavuli pake wanguŵerenga marangu ghose, vitumbiku ndi matembu, kwakuyana ndi vyose vyakulembekamo mu buku la marangu.

³⁵Pengavi mazu ghakukambika ndi Mosese gho ghengavi kuŵerengeka ndi Yoswa paurongo pa mzinda wose wa ŵaYisraele, ŵanthukazi, ŵana ndi ŵalendo wo ŵajanga mukati mwawo.