Read gitonga 2 ŴaTesalonika 1 Bible Online

2 ŴaTesalonika 1 - gitonga bible

2 ŴaTesalonika 1

¹Kalata wakutuwa kwaku Paulo, ndi Silvano, ndi Timote, ku mpingu wa ŵaTesalonika mwaku Chiuta Auskefwe ndi Ambuya Yesu Kristu.

²Wezi kwaku imwe ndi chimangu kutuwa kwaku Chiuta Dada ndi Ambuya Yesu Kristu.

³Titenere kumwonga Chiuta nyengo zose pa chifukwa chinu, mwa ŵabali; uli ndimo nadi nkhwakwenere, pakuti chikuliyakuliya ukongwa chivwanu chinu, ndipo chanju chaku mose, yumoza ndi yumoza, chifurwiya yumoza ku munyake;

⁴viyo kuti ifwe titijikuzga mwaku imwe mu mipingu yaku Chiuta chifukwa cha unkhunthiya winu ndi chivwanu chinu mu viŵembu vinu vyose ndi mu visuzgu vinu vyenivyo muvwiyapo.

⁵Ivi nchirongoleru cha cheruzgu chirunji chaku Chiuta, alinga kuti mwenereskeke ufumu waku Chiuta, weniwo musuzgikiyapo,

⁶nadi nkhwakurunjika paurongo paku Chiuta kuwerezgeyapo suzgu kwaku ŵeniwo ŵatikusuzgani,

⁷ndi kwaku imwe mwaŵakusuzgika chigowoke pamoza nafwe, pa uvumbuzi wa Ambuya Yesu kutuwa kuchanya pamoza ndi ŵangelo ŵa nthazi yake, mu moto wakulipuka,

⁸wachitayiya thayu pa ŵakuura-kuziŵa Chiuta, ndi ku ŵakureka-kuvwiya evangeli wa Ambuyafwe Yesu.

⁹Aŵa wose ŵakalangikanga ndi phasulu lamuyaya lakutuliya ku chisku cha Ambuya ndi ku unkhankhu wa nthazi zake,

¹⁰wachiza mkankhuskikiya mu zuŵa liya mu ŵakupaturika ŵake, ndi kurumbika mwaku wose ŵakuvwana (pakuti chinguvwanika chisimisimi chidu chakwaku imwe).

¹¹Ndi mwaku chenichi mo tirombe imwe nyengo zose, kuti Chiuta widu wampimiyeni ŵakwenere ku mdanu wake, ndipo wafiski ndi nthazi khumbo lose lamampha ndi mlimu wose wa chivwanu;

¹²viyo kuti zina lo la Ambuyafwe Yesu likankhuskike mwaku imwe, ndi imwe mwaku iyo, kwakulingana ndi wezi waku Chiuta widu ndi wa Ambuya Yesu Kristu.