Read gitonga 2 ŴaTesalonika 2 Bible Online

2 ŴaTesalonika 2 - gitonga bible

2 ŴaTesalonika 2

¹Kweni tikuŵeyereni, mwa ŵabali, nge nkhu uzi wa Ambuyafwe Yesu Kristu, ndi kongana kwidu pamoza nayo,

²kusukung'ika ruŵi cha mu vinjeru vinu, chingana nkhofyeka cha pamwenga ndi mzimu, pamwenga ndi mazu, pamwenga ndi kalata nge ngwakutuliya kwaku ifwe, kuti zuŵa la Ambuya sono lafika.

³Wangamufuvyani yumoza cha panthowa ye yose; pakuti lingaza cha, kwambura kuti chaŵapo danga chidezuka ndipo wavumbulika munthu yo wa ulakwi, mwana yo wa wanangiku,

⁴yo wamikana ndi watijitumphuskiya paku yose wakuzumbulika Chiuta pamwenga paku cho chisopeka; viyo kuti iyo waja mu kasopi waku Chiuta, wakujirongo nge nkhuti ndiyo Chiuta.

⁵Asi mukumbuka kuti, ndeche kwinu, ndamkambiyaninga vyenivi?

⁶Ndipo sono muziŵa chenicho chitumjarizga, alinga kuti wavumbulike mu nyengo yake.

⁷Chifukwa chakubisika cha uchikana marangu chayamba kali kugwira nchitu yake; kweni mpaka sono walipo yo watichikanizga, wachikanizgenge mpaka po iyo watuzgikapo.

⁸Ndipo wamvumbulika chikana marangu yo mweniyo Ambuya amukumwananga ndi mvuchi wamumlomo wawo, ndipo amukumuvikita ndi chiwoneka cha uzi wawo.

⁹Uzi waku chikana marangu yo mu kachitidu kaku Satana wakaŵanga ndi nthazi yose ndi visimikizgu ndi minthondwi yitesi,

¹⁰ndipo ndi fuzi yose ya uwura-urunji kwaku wo mbakutayika; chifukwa-wangukana kwanja uneneska wo, mwakuti wataskike.

¹¹Ndipo chifukwa chenichi Chiuta waŵatumiya kachitidu ka urandizgi, alinga kuti ŵavwaniye iwo mu utesi:

¹²viyo kuti ŵeruzgike wose wo ŵengavi kuvwana mu uneneska wo, kweni ŵangukondwere mu uura-urunji.

¹³Kweni titenere ifwe kumwonga Chiuta nyengo zose pa chifukwa chinu, mwa ŵabali ŵakwanjika ndi Mbuya, pakuti Chiuta wakumusankhani pa mteneku kuti mutaskike, mukuphotoreka ndi Mzimu ndi mu chivwanu chamu uneneska.

¹⁴Kwaku chenicho wangumdaniyani mu evangeli widu, mwakuti musangane unkhankhu wa Ambuyafwe Yesu.

¹⁵Viyo na, mwa ŵabali, ngangamikani, koreskani midauku yo mwasambizgika, ndi ifwe mu mazu pamwenga mu kalata widu.

¹⁶Ndipo Ambuyafwe Yesu Kristu mweneko, ndi Chiuta Auskefwe, yo wangutanja ndi wangutipaska chisangurusku cha muyaya ndi chigomekezgu chamampha mu wezi,

¹⁷wasangaruske mitima yinu ndi wayikhozge mu mlimu wose wamampha ndi mu mazu.