Read gitonga 2 ŴaTesalonika 3 Bible Online

2 ŴaTesalonika 3 - gitonga bible

2 ŴaTesalonika 3

¹Pakumariya, mwa ŵabali, mutirombe, alinga kuti mazu gha Ambuya ghajuke ndipo ghakankhuskike, uli ndimo ghakuchitiya mwaku imwe;

²ndi kuti titaskike ku ŵanthu ŵazereza wo ndi ŵaheni; chifukwa kuti wose ŵe nacho chivwanu cha.

³Kweni Mbuya ngwamagomekezgeka, mweniyo wamkukukhozgani, ndi wamkukusungani ku mheni yo.

⁴Ndipo tagomezga mu Ambuya pa chifukwa chinu, kuti muvichita, ndipo so mukavichitanga, vyenivyo tilangula.

⁵Ndipo Mbuya wayinyoroske mitima yinu ku chanju chaku Chiuta, ndi ku unkhunthiya waku Kristu.

⁶Kweni tikulanguliyani, mwaŵabali, mu zina la Ambuyafwe Yesu Kristu, kujigauwako ku mbali yose wakwenda kwa utimbanizi, kwambura kuyana ndi mdauku womunguronde kwaku ifwe.

⁷Chifukwa mwaŵeni muziŵa mo mutenere kutezge ifwe: pakuti tengavi utimbanizi mukati mwinu;

⁸kuti tingurghapo chakurgha waka pa yumoza cha kwambura kumulipa, kweni mu nchitu ndi mu chitakataka usiku ndi msana tatataliyanga, mwakuti tireke kuzitiska yumoza waku imwe.

⁹Kuti nchifukwa chakuti tirive mtufu wo cha, kweni kuti tijipaske kwaku imwe nge nchiteskeru, kuti mutezge ifwe.

¹⁰Chifukwa penipo napo tenga kwinu, talanguliyanga imwe chenichi, kuti, Asani yumoza wareka kukhumba kutata mlimu, ipu wareke kurgha.

¹¹Chifukwa tituvwa kuti ŵanyake mbakwendaenda mwaku imwe kwaukata wakutata mlimu cha, kweni wamwendanatu.

¹²Kweni tiŵalanguliya ŵaviyo, ndipo tiŵachiskiya mu Ambuya Yesu Kristu, kuti, ŵatakatakenge kwakufwasa, ŵarghe kurgha kwaku iwo ŵeneko.

¹³Kweni imwe, mwa ŵabali, mungavuka cha pakuchita umampha.

¹⁴Ndipo asani yumoza wareka kughavwiya mazu ghidu mu kalata uyo, muthoŵeni mweniyo, mungenderananga nayo cha, alinga kuti walengeke soni.

¹⁵Kweni mungampimiyanga nge ngwamawongu cha, kweni muchenjezgeni nge ndi mbali.

¹⁶Sono Mbuya mweneko wa chimangu wakupaskeni chimangu nyengo zose mu karusu kose. Ambuya ŵaŵe namwe mose.

¹⁷Chitauzga chaku ine nda Paulo ndi janja, langu, chenicho nchisimikizgu mu kalata yose. Viyo ndilemba:

¹⁸Wezi wa Ambuyafwe Yesu Kristu uŵe namwe mose.