Read gitonga 1 Timote 1 Bible Online

1 Timote 1 - gitonga bible

1 Timote 1

¹Kalata wakutuwa kwaku Paulo wakutumika waku Kristu Yesu, uli ndi langulu laku Chiuta Mtaski widu, ndi laku Kristu Yesu, Chigomekezgu chidu,

²kwaku Timote, mwana wangu mweni-mweni mu chivwanu: wezi, lisungu, chimangu, vyakutuliya kwaku Chiuta Dada ndi Kristu Yesu Ambuyafwe.

³Uli ndimo ndinguchichizgiya iwe kujaririya mu Efeso, po ndayanga ku Makedonia, alinga kuti ulanguliye ŵangana kureka kusambizga chamwenga,

⁴ndi so kureka kuphwere zinthanu ndi vikazi vyambura umari, vyenivyo vitata malifumbafumba ukongwa kwakuruska mlimu waku Chiuta wamu chivwanu; sono nako ndichitiya viyo.

⁵Kweni kamaridu ka chilangulu chonchanju chakutuwa ku mtima ukhovu ndi njuŵi yamampha ndi chivwanu chambura fuzi:

⁶kwaku vyenivyo vinthu ŵanyake pakuwindako ŵatenderukiya ku makani ghauzereza;

⁷pakukhumba kuŵa ŵasambizgi ŵa chilangulu, ŵauravi kuteska chingana ndi vyenivyo ŵakamba, chingana ndi vyenivyo ŵakokomezgapo.

⁸Kweni tiziŵa kuti dangu lo ndamampha asani munthu we yose wachitiya nalo kwadangu,

⁹wakuziŵa ichi, kuti dangu lilive kuŵikikiya murunji, kweni likuŵikikiya ŵambura kuziŵa dangu ndi ŵambura kuvwiya, ŵambura kopa Chiuta ndiŵalakwi, ŵambura urunji ndi ŵamtafu, ŵakubaya-ŵauskeu ndi ŵakubaya-ŵanyinawo, ŵakubaya ŵanthu,

¹⁰ŵareŵi, ŵakura ndi ŵanthurumi, ŵachivwamba, ŵatesi, ŵakurapa kwautesi, ndi kose kanyake asani kamikirana ndi chisambizgu chizirima;

¹¹uli ndi evangeli wa unkhankhu waku Chiuta wakutumbikika, weniwo ine ndingugomekezgeka nawo.

¹²Nditumuwonga yo wangundinthaziska, Kristu Yesu Ambuyafwe, mwakuti wangundipima wamagomekezgeka, pakujiŵikiya ine mu uteŵeti;

¹³ine ndawakuŵa kali mtokota ndi wakuŵemba ndi wamtonyoru: kweni ndinguchitikiya lisungu, pakuti kwambura kuziŵa ndinguchitiya viyo mu uwura chivwanu;

¹⁴ndipo ungufurwiya ukongwa wezi wo wa Ambuyafwe pamoza ndi chivwanu ndi chanju chamwaku Kristu Yesu.

¹⁵Ndamagomekezgeka nenedu lo, ndipo ndakwenere kurondeka kose, lakuti Kristu Yesu wanguza mu charu kwachitaska ŵalakwi; waku ŵeniwo chiŵinda ndine;

¹⁶ndikweni pa chifukwa chaku chenichi ndinguchitikiya lisungu, alinga kuti mwaku ine ndachiŵinda Yesu Kristu waurongole unkhunthiya wake uzirima, uli nchandiru cha ŵakukhasa kuvwaniya mwaku iyo ku umoyo wamuyaya.

¹⁷Kweni ku Karonga wamuyaya, mziramawoleka, wambura mawonekeka, Chiuta wayijayija, kuŵiye thamu ndi unkhankhu muyaya-muyaya. Ameni.

¹⁸Langulu lenili ndipazgiya iwe, Timote, wamwana wangu, uli ndi mauloska ghakukapo pako kali, alinga kuti mwaku gho ulipote homwa lo leneko,

¹⁹pakuŵa ndi chivwanu ndi njuŵi yamampha, yeniyo ŵanyake ŵajipankhuliya, ndipo ŵagaruka kuchiri ku chivwanu cho:

²⁰ŵaku ŵeniwo ndi Humenayo ndi Alezandro, wo ndapereka kwaku Satana, alinga ŵalangike kureka kutokoska.