Read gitonga 1 Timote 6 Bible Online

1 Timote 6 - gitonga bible

1 Timote 6

¹Wo wose mbaŵanda pasi pagoŵa ŵapimiye ŵambuyawo ŵaku ŵija nge mbakwenere thumbiku lose, alinga kuti lingatokoskeka cha zina laku Chiuta, ndichisambizgu cho.

²Ndipo wo ŵe ndi mbuya wakuvwana, ŵangaŵayuyu-wanga cha, pa chifukwa chakuti mbabali; kweni ukongwaku ŵaŵaŵetekenge, pakuti wo ŵatovyeka ndi mlimu wawo wamampha mbakuvwana ndi ŵakwanjiwa. Vyenivi sambizganga ndi chiskanga.

³Asani yumoza wasambizga chinyake, ndi wareka kuzomerezga mazu ghazirima, gho gha Ambuyafwe Yesu Kristu, ndichisambizgu cha uwopa Chiuta,

⁴watutumuka, waziŵa kanthu kamoza cha, kweni ngwakutangwamikiya pa malifumbafumba ndi masuskano gha mazu, mwenimo mutuliya chiŵinu, ndeu, matusi, masachizgu ghaheni,

⁵ndi mihohotu ya ŵanthu, wo mbakuwo mu njuŵi ndi ŵakukavuka uneneska wo, pakughanaghana kuti uwopa Chiuta mbuparauzi.

⁶Kweni uwopa Chiuta pamoza ndi kukoroka mu mtima mbuparauzi ukuru:

⁷chifukwa kuti nkhuti tingutolemu mu charu chingana nkhanthu kamoza cha, chingana nkhuti tiziŵa kutuzga mu cha chingana nkhamoza,

⁸kweni pakuŵa ndi kurgha ndi vyakuvwara, tikhorwenge navyo.

⁹Kweni wo mbakukhumba kusambasa ŵatuwa mu kesedu ndi chikhwiriki ndi malikhumbira ghanandi ghazereza ndi gharwani, ghenigho ghose ghabizga ŵanthu mu chipasuka ndi wanangiku.

¹⁰Chifukwa kwanja ndrama ndi msisi wa mauheni ghose; pakutambazukiya chenicho ŵanyake ŵarandizgika nacho kutuwako ku chivwanu cho, ndipo ŵakoreka ndi soni zinandi.

¹¹Kweni iwe, wa munthu waku Chiuta, thaŵa vyenivi, ndipo rondo urunji, uwopa Chiuta, chivwanu, chanju, unkhunthiya, upovu.

¹²Limba-limbanga mlimbanu wo weneko wa chivwanu, jibwakiye umoyo wo wamuyaya, kwaku weniwo ungudanikiya, ndipo unguzomerezga chizomerezgu cho cheneko pa maso gha ŵakaboni ŵanandi.

¹³Ndikulanguliya pa maso ghaku Chiuta, wakupaska vyose umoyo, ndi ghaku Kristu Yesu, mweniyo wangusimikizgiya paurongo paku Pontio Pilato chizomerezgu cho cheneko,

¹⁴ndikuchiska sungirizga langulu lo lizira donthu, lizira kalema, mpaka ku chiwoneka cha Ambuyafwe Yesu Kristu;

¹⁵chenicho mu nyengo zake zeneko wakachirongonga Wanthazi yo, wakutumbikika ndi wayija, Karonga yo wa ŵakaronga, ndi mweneko wa ŵakweni;

¹⁶mweniyo yija we ndi uwuranyifwa wakuja mu ukweru wambura maŵandikika, mweniyo palive munthu wamwona chingana waziŵa kumwona: kwaku mweniyo kuŵiye thamu ndi mazaza ghamuyaya. Ameni.

¹⁷Ŵalanguliye ŵasambasi mu mgonezi wa sono kuti ŵareke kujitumphuska, chingana nkhugomekezgapo pa kanthu kakuwura ukhonge ndi chuma, kweni mwaku Chiuta, mweniyo watipaska vyose kwakusakata kuti tikakondweremo;

¹⁸kuti ŵachite umampha, kuti ŵasambasiye mu nchitu zeneko, kuti ŵaŵe ŵapusu kupaska kwawezi, ndi wanangwa pakusangana;

¹⁹ŵakujiŵikiya chiŵanja chenecho chaku mkucha, alinga kuti ŵajibwakiye umoyo wo weniwo mbumoyo weniweni.

²⁰Timote we, sungirizga chakupazgika cho; pambukako ku makani ghamtonyoru ndi kuvimikiranu vya mziŵiru wo, weniwo utamulika viyo kwautesi;

²¹weniwo ŵanyake pakuuzomerezga ŵambwita pa chivwanu cho. Wezi uŵe nawe.