Read gitonga 2 Timote 2 Bible Online

2 Timote 2 - gitonga bible

2 Timote 2

¹Viyo iwe, wamwana wangu, jikhomeske mu wezi wamwaku Kristu Yesu.

²Ndipo vyenivyo wavwa kwangu mu ŵakaboni ŵanandi, vyenivyo sambizganga ŵanthu ŵamagomekezgeke, wo ŵaŵenge ŵakwenere kwachisambizga ŵanyake nawo.

³Vwiyangapo vikomwa pamoza nane, nge ngwankhondo mweneke waku Kristu Yesu.

⁴Palive wankhondo yo wapota homwa wajiwizga mu milimu ya umoyo wuno, pakuti fundu yake, njakuti wakhorweske wakumlemba.

⁵Ndipo so asani munthu wajontho, kuti wavwalikika nkhazu cha, kwambura kuti wajonthole kwadangu.

⁶Mlimi wakutakataka yo watenere kusanganapo danga vipasi.

⁷Teskanga chenicho ndikamba; chifukwa Mbuya wakupaskenge kuwamo mwaku vyose.

⁸Kumbukanga Yesu Kristu, wakuyuskika ku ŵakufwa, wa mbeu yaku Davidi, uli ndi evangeli wangu;

⁹mwaku wo ndikomwe mpaka ku magoŵa uli ndi mchita uheni; kweni mazu ghaku Chiuta kuti ghamangika cha.

¹⁰Chifukwa chenichi ndikunthiyapo vyose pa chifwa cha ŵakusankhika, alinga kuti iwo nawo ŵafikapo pa utaski wa mwaku Kristu Yesu ndi unkhankhu muyaya.

¹¹Ndamagomekezgekea nenedu lo: Chifukwa asani tikufwiya pamoza nayo, tijariyenge ŵamoyo so pamoza nayo,

¹²asani tikunthiyapo, tiusiyenge pamoza nayo: asani timkanenge, iyo nayo wamkana ifwe:

¹³asani tiura kuvwana, wajaririya iyo wamagomekezgeka; chifukwa kuti waziŵa cha kujikana mweneko.

¹⁴Ŵakumbuske vyenivi, pakuŵasimikizgiya pa maso gha Ambuya, kuti ŵareke kurwiyana ndi mazu, kwambura chanduku chose, kweni ku chipasuka cha ŵakuvwa.

¹⁵Pamphuka kujipereka wakurumbika kwaku Chiuta, wa mlimu wambura kukanyara, wakugaŵiya kwakurunjika mazu gha uneneska wo.

¹⁶Kweni ŵeka mauŵereŵesi ghamtonyoru ghaŵaka: chifukwa ghataruliyenge ukongwa ku uwura-uwopa Chiuta,

¹⁷ndi mazu ghawo ghajemuwenge uli nchipangu: ŵaku ŵeniwo ndi Humenayo ndi Filato:

¹⁸ŵeniwo ŵambwita pa uneneska wo, pakukamba kuti chiyuka chaŵapo kali ndi ŵagadabuwa chivwanu cha ŵanyake,

¹⁹kweni chiŵanja cho chakurama chaku Chiuta chituma gwa, pakuŵa ndi chiŵali chenichi, “Waŵaziŵa Mbuya ŵeniwo mbake”: ndi “Wagaukeko ku uwura-urunji yose wakutamula zina lo la Ambuya.”

²⁰Kweni mu nyumba yikuru kuti mwe viyaŵi vya golide ndi vya siliva pe cha, kweni so vya chimuti ndi vya dongu; ndipo vinyake navyo ku ulemu, kweni vinyake ku uwura-ulemu.

²¹Viyo asani munthu wangajiphoto kwaku vyenivi, waŵenge chiyaŵi cha ku ulemu, chakupaturika, chakwanduliya, ku mweneko, chakurongosoleke nchitu yose yamampha.

²²Kweni thaŵanga maulakalaka ghauhurwa, ndipo ndondoloska urunji, chivwanu, chanju, chimangu, pamoza ndi ŵeniwo ŵadaniya pa Mbuya ndi mtima ukovu.

²³Kweni mafumbo ghakupusa ndi ghajira kananga, pakuziŵa kuti ghayuska mbembi.

²⁴Kweni muŵanda wa Mbuya kuti watenere kurwa cha, kweni kuŵa mphemberezga kwaku wose, warwana kusambizga.

²⁵Wakukunthiyapo, mu upovu wakuŵalanga wo mbakupindana, kuti vinu Chiuta wangaŵapaska chipe chakwachiziŵiska uneneska,

²⁶ndi kuti ŵangajiwezgako ku chikwiriki cha diabole, pakukoleka mkoli ndi iyo ku khumbo laku yo.