Read gitonga 2 Timote 4 Bible Online

2 Timote 4 - gitonga bible

2 Timote 4

¹Ndisimikizgiya pa maso ghaku Chiuta, ndi ghaku Kristu Yesu, yo wakeruzganga ŵamoyo ndi ŵakufwa, ndipo ndi chiwoneka chake ndi ufumu wake;

²memeza mazu; pamphuka mu nyengo yamampha ndi mu nyengo yiheni; panikizga, chenya, chiska mu chilekerezga chose ndi chirunguchizgu.

³Chifukwa yikazanga nyengo penipo ŵarekenge kuvwiyapo chisambizgu cho chizirima kweni pakuŵa ndi makutu ghakunyenye, ŵajiunjikiyenge ŵasambizgi kwakuyana ndi malikhumbira ghaku ŵija;

⁴ndipo ŵarekenge kuvwa uneneska wo, ndipo ŵang'anamukiyenge ku zinthanu.

⁵Kweni iwe uzize mwaku vyose, kunthiyapo uheni, chita mlimu wa evangeli, fiska uteŵeti wako.

⁶Chifukwa ine sono ndipunguka,[2] ndipo nyengo ya chifwatulika changu yaŵandika.

⁷Ndalimbiya mlimbalimba weneko, ndafiska chipharizganu cho, ndachikoreze chivwanu cho:

⁸chajako kuti chiŵikikiye ine chifuku cho cha urunji, chenicho Mbuya, cheruzga yo murunji, wandipaskenge mu zuŵa liya: ndipo kwaku ine pe cha, kweni so kwaku wose ŵeniwo ŵanja chiwoneka chake.

⁹Tinthimika kuza kwaku ine ruŵi-ruŵi:

¹⁰chifukwa Demase wandisiya, wati wanja mgonezi wasono, ndipo waruta ku Tesalonika; Kreskeno nayo ku Galatia, Tito ku Dalmatia.

¹¹Luka walipo yija pamoza nane. Wati wato Marko, zanga nayo pamoza ndi wamweni: chifukwa ku uteŵeti ngwakovya kwaku ine.

¹²Kweni Tukhiko ndingumtuma ku Efeso.

¹³Chirundu cho, chenicho ndingusiya mu Troa kwaku Karpo, uchiza, pinga ndi mabuku gho, viŵiviŵi vikopa vyo.

¹⁴Alekezandara msulasapuli yo wangundichitiya viheni vinandi: Mbuya wamwerezgiyenge kwakuyana ndi nchitu zake:

¹⁵mweniyo umcheŵe nawe; chifukwa wangumikana ndi mazu ghidu.

¹⁶Pa kwamuka kwangu kwachimoza pengavi yumoza wanguŵapo nane pamoza, kweni wose ŵangundisiya: kureke kupimikiya kwaku wo!

¹⁷Kweni Mbuya iyo wangumapo pamoza nane, ndipo wangundikhomeska; alinga kuti mwaku ine mumemezu wo ufiskike, ndipo kuti ŵanguvwa ŵaMitundu wose: ndipo ndingutaskika ku mlomo wa nkharamu.

¹⁸Mbuya iyo wandipozomoskenge ku nchitu yose yiheni ndipo wanditaskiyenge ku ufumu wake wakuchanya: kwaku mweniyo kuŵiye unkhankhu wo ku muyaya-muyaya. Ameni.

¹⁹Tauzga Priska ndi Akula, ndi nyumba yo yaku Onesiforo.

²⁰Erasto wangujaririya mu Korinth: kweni Trofimo ndingumsiya mu Mileto wakutama.

²¹Tinthimika kwachifika chindaze chipwepwe. Wakukutauzga Eubulo, ndi Pudense, ndi Lino, ndi Klaudia, ndi ŵabali wose.

²²Mbuya waŵe ndi mzimu wako Wezi uŵe namwe.