Read gitonga Tito 3 Bible Online

Tito 3 - gitonga bible

Tito 3

¹Ŵakumbuske kujithereske ku ŵara, ku mitufu, kuvwiya ŵeruzgi, kuŵa ŵakufongosoleke nchitu yose yamampha,

²kuphara[1] munthu yumoza cha, kuŵa ŵaziralisonji, ŵaroŵevu, ŵakurongo upovu wose ku ŵanthu wose.

³Chifukwa kali nafwe so taŵanga ŵakupusa ŵamtafu ŵakurandizgika ŵakuteŵeta maulakalaka ndi malikondwa ghamtundumtundu, ŵakujariya mu nkhaza ndi bina, ŵakutinkhika, ŵakutinkhana,

⁴kweni penipo ungubulika ulemu ndi wanja-ŵanthu wa Mtaski widu Chiuta,

⁵kutuliya ku nchitu zamu urunji zenizo tinguchita ifwe cha, kweni kwakulingana ndi lisungu lake wangutitaskiya mu chisambiska cha kupapika so ndi mukarengekedu kafya mu Mzimu Wakupaturika,

⁶mweniyo wangupunguliya paku ifwe kwakusambasa mwaku Yesu Kristu Mtaski widu;

⁷alinga kuti, pakurunjiskika ndi wezi wake, tiŵenge ŵakuhara kwakulingana ndi chigomekezgu cha umoyo wamuyaya.

⁸Ndamagomekezgeka nenedu lo, ndipo paku vyenivi ndikhumba ukokomezgepo iwe, alinga kuti wo ŵagomekezga maku Chiuta ŵaphwerenge kurongo milimu yeneko. Vyenivi ndivyo vyamampha ndi vyawanduzi ku ŵanthu:

⁹kweni mafumbo ghakupusa, ndi vikazi, ndi zindewu, ndi masuskano ghapa langulu, ŵekanga; chifukwa ndivyo vyambura chanduku ndi vyaŵaka.

¹⁰Munthu wapambuku kananga pavuli pa kumchenjezga kamoza ndi kaŵi,

¹¹pakuziŵa kuti waviyo watenderukiya limu, ndi ngwakulakwa, pakuŵa kajisuski.

¹²Penipo nditumenge kwako Artemase, pamwenga Tikhiko tinthimika kuza kwaku ine ku Nikopoli; chifukwa ndapima kutandara chipwepwe kweniko.

¹³Ŵapereke kwakutinthimika, Zenase, wamarangu yo, ndi Apolo, kuti kangaŵapereŵe kanthu cha.

¹⁴Ndipo ŵidu nawo ŵasambire kutataliya ku mausiwa ghaufinyi nchitu yamampha, alinga kuti ŵangaŵanga ŵazirachipasi cha.

¹⁵Wose ŵa pamoza nane ŵakutauzga. Watauzge ŵakutanjiya mu chivwanu. Wezi uŵe namwe mose.